Mukanda wa Yone 12:1-50
12 Masugu samano gutuama dia Wano wa Pake, Yesu wahetele gu Betaniya, dimbo diakhalele Lazalo yonu wafuzumuine muene mu gufua.
2 Amuhanele ima ya gudia guene. Mata wakhalele guashila ima ya gudia. Uvi Lazalo wakhalele mukatshi dia athu akhalele mudia n’enji gu mesa.
3 Gungima, Madiya wazudile mulondo* wa mananashi a ndando yakola, alondewe nu nardo ya giamatshidia; waambile mu ikanzo ya Yesu, wasendesele gukukumuna ikanzo yenji nu sanga dienji. Inzo yagasue yazalele pha nu vumba dia mananashi.
4 Uvi Yudasa Isakaliote, mulandudi wenji munu wajile gumudiga gungima, wazuelele egi:
5 “Mukunda natshi mananashi awa adigiwego mu ndando ya denye 300 ha guhana mbongo gudi phutu?”
6 Yudasa gazuelelego ngenyi handaga wakhalele gudisagesa mukunda nu phutu. Uvi wakhalele nzangi nu wakhalele mukuya mbongo jiakhalele mumbiwa mu mushete wakhalele mubamba muene.
7 Yesu wazuelele egi: “Bemba mukhetu yowu, handaga udi mutshita ndaga idi naye gukalegewa mu lusugu lua gufundjiwa guami.
8 Handaga phutu mbamukhala najio tangua diagasue, uvi ame mbangushigo mukhala n’enu tangua diagasue.”
9 Mu tangua diene, enya Yuda avula ajiyile egi Yesu wakhalele guene, ajile ha gutala Yesu nu Lazalo, yonu Yesu gafuzumuine.
10 Mafumu a nganga-nzambi ayile giphungi ha gushiya nji Lazalo.
11 Handaga enya Yuda avula ayile gu Betaniya mukunda nu muene nu ashile gutshigina gudi Yesu.
12 Lusugu lualanduile, athu avula anyi ajile gu wano, avile egi Yesu udi muza gu Yelusalema.
13 Azudile mandala a samba, azogele ha guya gumutagana, nu akhalele muzuela mu dijui diakola egi: “Nzambi tuagububila, muhuluise! Gusuanguluga gukhale nu muthu udi muza mu jina dia Yehowa, Fumu wa gu Isalele.”
14 Tangua diamonele Yesu mun’a phunda, wanginyile holu dienji, gifua luholo yasonegewe egi:
15 “Mon’a mukhetu wa gu Siona uvuigo woma. Tala! Fumu waye udi muza, wagukhala holu dia mun’a phunda.”
16 Thomo alandudi enji akoteleselego ndaga eji. Uvi tangua diatumbuishiwe Yesu, awungulugile egi ndaga eji jiasonegewe mukunda nu muene, nu amukalegele najio.
17 Athu avula anyi akhalele hene tangua atamegele muene Lazalo ha guzoga mu malumba* nu hamufuzumuine muene, alanduile guzuelela ndaga amonele.
18 Gishina giene athu avula akhalele muza luko ha gumutagana, handaga avile egi wakalegele ndaga eyi ya gushimana.
19 Afalese akhalele gudiwambela egi: “Mudi mumona muabonga egi mushigo mukalagala nga gima. Talenu! Athu agasue adi gumulandula.”
20 Mukatshi dia athu ajile mukombelela mu tangua dia wano guakhalele nji nu enya Greke.
21 Ajile gudi Filipho, muenya gu Betesayida, dimbo dia gu Galilea, amuwambelele egi: “Fumu, tudi mutshigina gumona Yesu.”
22 Filipho wayile muwambela Andele. Gungima, Andele nu Filipho ayile muwambela Yesu.
23 Uvi Yesu waavutudile egi: “Tangua diatagana hagula Mun’a muthu atumbuishiwe.
24 Ngudi gumiwambela giamatshidia egi, gula lumbale lua ble luabuilego mu mavu nu luafilego, ludi musala hakhenji. Uvi gula luafua, luana zola mbale jiko jiavula.
25 Muthu wagasue udi muzumba monyo wenji muavula, udi guwushiya. Uvi muthu udi nu umbalagaji nu monyo wenji ha mavu awa, mbawuwubamba mukunda nu monyo wa ivo nu ivo.
26 Gula muthu watshigina gungukalegela mudimo, angulandule. Fundo ngudi ame, diene mbadikhala nji muenya mudimo wami. Gula muthu watshigina gungukalegela mudimo, Tata mbawumutumbuisa.
27 Henyaha ngudi* nu gikenene giavula, itshi nguzuela? Tata, nguhuluise mu tangua edi. Uvi tangua edi dia lamba didi naye gungubuila, handaga yene ndaga ngajidile ha mavu .
28 Tata, tumbuisa jina diaye.” Mu tangua diene, dijui diazogele mu dilu egi: “Ngaditumbuishile gale nu mbanguditumbuisa luko.”
29 Athu avula akhalele hene anyi avile dijui diene, azuelele egi muandu wanuma. Ako egi: “Muanjelo wazuela n’enji.”
30 Yesu waavutudile egi: “Dijui edi diazogelego mukunda nu ame, uvi mukunda nu enue.
31 Henyaha mavu awa adi musophesewa. Henyaha fumu wa ha mavu awa mbawubishidiwa hanze.
32 Uvi ame gila ngakanduishiwa* ha mavu, mbangunana athu a maluholo agasue gudi ame.”
33 Mu guzuela guabonga, wazuelele ndaga eyi ha gumonesa gula gufua gua luholo lutshi guakhalele gumunengena.
34 Athu avula amuvutudile egi: “Tuavile mu Mukhuala egi Klisto udi naye gusala mayilago. Henyaha luholo lutshi aye udi muzuela egi Mun’a muthu udi naye gukanduishiwa?* Mun’a muthu muene udi nanyi?”
35 Yesu waawambelele egi: “Muanya mbawukhala mukatshi dienu mukunda nu tangua diazonda. Wendenu hamudi nu muanya, hagula phipha imihinyinago. Handaga muthu udi muwenda mu phipha ganago gujiya fundo didi muya muene.
36 Tangua mudi nu muanya, monesenu gutshigina gudi muanya hagula mubue ana a muanya.”
Yesu wazuelele ndaga eji, ngungima wayile gudisuega hagula ene amumonyigo.
37 Yesu wakalegele ndaga jiavula jia gushimana gu meso awo. Uvi ene ashilego gutshigina gudi muene.
38 Ngenyi yataganesele mbimbi jiazuelele profete Yeshaya egi: “Yehowa, nanyi washile gutshigina gu ndaga yavile muene gudi esue?* Koko dia Yehowa diamonesewe gudi nanyi?”
39 Yeshaya wamonesele nji gishina giatunyile ene gusha gutshigina. Wazuelele egi:
40 “Muene washiyile meso awo, wakolesele mitshima yawo hagula ene amonyigo nu meso awo, akotelesago nu mitshima yawo nu avutugago gudi ame hagula nguasage.”
41 Yeshaya wazuelele ndaga eji handaga wamonele lutumbu luenji, nu wazuelele mukunda nu muene.
42 Mafumu ako avula, ashile nji gutshigina gudi muene. Uvi akhalelego guyimonesa haphelo mukunda nu Afalese, hagula a akayigo mu sinagoga.
43 Handaga akhalele muzumba muavula lutumbu lua athu gubalega lutumbu lua Nzambi.
44 Uvi Yesu wazuelele mu dijui diakola egi: “Muthu wagasue washa gutshigina gudi eme, wahagi nji gutshigina gudi Tata wangutumine.
45 Muthu wagasue wangumona eme, wamona nji Yago wangutumine.
46 Ngajile ha mavu gifua muanya, hagula muthu wagasue washa gutshigina gudi eme gakhadigo mu phipha.
47 Uvi gula muthu wategelela mbimbi jiami, muene nu gujikalegela ndo, ngushigo gumusophesa. Handaga eme ngajilego ha gusophesa athu ha mavu, uvi ngajile ha guahuluisa.
48 Muthu udi gungutuna, nu gashigo mutshigina mbimbi jiami, gudi nu muthu udi gumusophesa. Mbimbi ngazuedi, jiene mbajimusophesa mu lusugu lua gisugishilo.
49 Handaga eme ngushigo muzuela mu gutshigina guami; uvi Tata wangutumine wanguhanele mukhuala umoshi watadila ndaga ngudi naye guzuela nu luholo ngudi naye gujizuela.
50 Ngudi mujiya egi mukhuala wenji udi mukotelesa monyo wa ivo nu ivo. Hene, ndaga jiagasue ngudi muzuela, ngudi gujizuela gifua muanguwambelele Tata.”
Mbimbi goshi'a diyiji
^ Yakotelesa egi, gamulondo enya Roma akhalele muzongela ima. Gakhalele nu ginemo gia 327 g.
^ Nga “malumba a guwunguluga.”
^ Nga “monyo wami udi.”
^ Yakotelesa egi, gushiyiwa ha mutshi.
^ Yakotelesa egi, gushiyiwa ha mutshi.
^ Nga “mu mbimbi jietu?”
