Mukanda wa Yone 13:1-38
13 Gutuama egi Wano wa Pake usendese, Yesu wajiyile egi tangua dienji dia gukatuga ha mavu awa ha guya gudi Sh’enji diataganele. Hene, wazumbile alandudi enji akhalele ha mavu, waazumbile uu nu gu gisugishilo.
2 Hakhalele ene mudia mu ngueze, Diabulu wakhalele wanginyisa gale matangi a gudiga Yesu mu mutshima wa Yudasa Isakaliote, mun’a Simona.
3 Yesu wajiyile egi Tata wahanele ima yagasue ha mago enji, muene wakatugile gudi Nzambi nu wakhalele naye guvutuga gudi Nzambi.
4 Wabembele gudia, wazugile mu molu. Wakatuile milele yenji ya holu, wazanguile sume, wadijitshigile nayo ha kete.
5 Gungima wambile meya ha longa, wasendesele guweva ikanzo ya alandudi enji nu guakukumuna nu sume yakandele muene ha kete.
6 Hahetele muene gudi Simona Phetelo, Simona wamuhudile gamba: “Fumu, udi mutshigina guweva ikanzo yami?”
7 Yesu wamuvutudile gamba: “Ndaga ngudi mukalagala, aye ushigo guyikotelesa henyaha, uvi mbawuyikotelesa gungima.”
8 Phetelo wamuwambelele gamba: “Ndo, aye wajiyilego gunguweva ikanzo nga hazonda.” Yesu wamuvutudile egi: “Gula ngaguwevelego, wajiyilego gukhala nu ame.”
9 Simona Phetelo wamuwambelele gamba: “Fumu, unguwevigo phamba ikanzo, nguweve nji mago nu muto.”
10 Yesu wamulezele egi: “Muthu wazui gale meya, wana khala nu funu ya guweva phamba malu handaga muila wenji wagasue udi waphelegeta. Enue mudi muaphelegeta uvi mukut’enu agasue ndo.”
11 Handaga wakhalele mujiya muthu wakhalele naye gumudiga, hene wazuelele egi: “Mudi muaphelegeta uvi mukut’enu agasue ndo.”
12 Hamanesele muene guaweva ikanzo, wasudigile milele yenji ya holu, wakhalele luko gu mesa, waawambelele egi: “Muakotelesa ndaga ngamikalagala ba?
13 Muana gungutamega egi, ‘Mulongeshi’ nu ‘Fumu,’ muana zuela muabonga handaga idi ngenyi.
14 Hene, gula ame ngudi Fumu nu Mulongeshi, ngamiweva ikanzo, enue nji mudi naye* gudiweva ikanzo.
15 Handaga ngamihana gifezegeselo hagula enue nji mukalagale gifua luholo ngakalagala ame.
16 Ngudi gumiwambela giamatshidia egi, muenya mudimo gakhalago wakoma gubalega fumu wenji. Muthu munu watumiwa, gakhalago wakoma gubalega muthu wamutumi.
17 Gula mudi mujiya ndaga eji, mbamukhala nu gusuanguluga gula mudi gujitumagela.
18 Ngushigo muzuela mukunda nu mukut’enu agasue. Ngudi mujiya athu ngatombele. Uvi ndaga eyi idi ngenyi ha gutagenesa ndaga yazuelele mukanda wa Nzambi egi: ‘Muthu ngakhalele mudia n’enji dipha, wangubalumugila.’*
19 Ngamiwambela ndaga eyi henyaha gutuama egi ikalegewe, hagula tangua mbayikalegewa, enue mbamutshigine egi ame ngudi muthu muene.
20 Ngudi gumiwambela giamatshidia egi, muthu wagasue wayamba muthu ngatuma, wanguyamba nji eme. Muthu wagasue wanguyamba eme, wayamba nji Muthu wangutumine.”
21 Hazuelele Yesu ndaga eji, wavile gikenene giavula. Gungima wazuelele egi: “Ngudi gumiwambela giamatshidia egi, mumoshi mukatshi dienu uza gungudiga.”
22 Alandudi asendesele guditala nu gudihula muavula gula wakhalele muzuelela nanyi.
23 Mulandudi mumoshi, munu Yesu akhalele muzumba muavula, wakhalele gu mesa hehi nu Yesu.*
24 Hene Simona Phetelo wateguile mulandudi muene, wamuhudile egi: “Tuwambele, nanyi adi muzuelela.”
25 Gungima, mulandudi muene wazegemene ha thulo ya Yesu, wamuhudile egi: “Fumu, nanyi muene?”
26 Yesu wamuvutudile egi: “Muthu munu nguhana gitshinyi gia dipha edi ngabonda, muene.” Habondele muene dipha, wadihanele Yudasa, mun’a Simona Isakaliote.
27 Hazudile Yudasa gitshinyi gia dipha, Satana wanginyine mu mutshima wenji. Hene Yesu wamuwambelele egi: “Ndaga udi mukalagala, itshite mu phushi.”
28 Uvi mukatshi dia athu agasue akhalele mudia n’enji gu mesa, gushigo nga mumoshi wajiyile mukunda natshi Yesu wamuwambelele ngenyi.
29 Ako akhalele mutangiza egi, luholo Yudasa wakhalele mubamba mushete wa makuta, Yesu wakhalele gumuwambela ha gusumba ima akhalele nayo funu mukunda nu wano, nga ndo ha guhana phutu ima.
30 Hazudile muene gitshinyi gia dipha, wazogele mbala imoshi. Yakhalele mu phipha.
31 Hazogele muene, Yesu wazuelele egi: “Henyaha Mun’a muthu watumbuishiwa. Nzambi nji watumbuishiwa mu njila yenji.
32 Nzambi hakhenji mbawumutumbuisa, nu mbawumutumbuisa mbala imoshi.
33 Ana azonda, ngudi n’enu mukunda nu tangua diazonda. Mbamungukamba, gifua luholo ngawambelele enya Yuda. Henyaha ngudi gumiwambela nji nu enue egi, ‘Fundo ngudi muya enue muajiyilego guza.’
34 Ngudi gumihana mukhuala uhe-uhe egi, khalenu nu guzumba mukatshi dienu. Gifua luholo ngamizumbile, enue nji dizumbenu.
35 Gula mudi nu guzumba mukatshi dienu, athu agasue mbaajiya egi mudi alandudi ami.”
36 Simona Phetelo wamuhudile egi: “Fumu, gui udi muya?” Yesu wamuvutudile egi: “Fundo ngudi muya, aye wajiyilego gungulandula luenyelu, uvi mbawungulandula gungima.”
37 Phetelo wamuwambelele egi: “Fumu, mukunda natshi ngajiyilego gugulandula luenyelu? Ame mbanguhana monyo wami mukunda nu eye.”
38 Yesu wamuhudile egi: “Aye mbawuhana monyo waye mukunda nu eme? Ngudi guguwambela giamatshidia egi, gutuama egi kolombolo didile, aye mbawungutuna mbala jitatu.”
Mbimbi goshi'a diyiji
^ Nga “mudi nu ginemo gia.”
^ Nga “wanguhilugila.”
^ Mu Greke: “ha thulo ya Yesu.”
