Mukanda wa Yone 14:1-31
14 “Mudisagesago mu mitshima yenu. Khalenu nu gutshigina gudi Nzambi; khalenu nji nu gutshigina gudi ame.
2 Monzo ya Tata wami mudi nu mafundo avula a gukhala. Gula ndo, nga ngamiwambela gale; ngudi muya ha gumilondela fundo.
3 Gula ngaya gumilondela fundo, mbanguvutuga luko, mbangumiyamba monzo yami, hagula mukhale fundo ngudi ame.
4 Enue mudi mujiya njila ya fundo ngudi muya.”
5 Toma wamuwambelele egi: “Fumu, tushigo mujiya gui udi muya. Na luholo lutshi tuajiya gujiya njila?”
6 Yesu wamuwambelele egi: “Eme ngudi njila, giamatshidia nu monyo. Muthu gajiyilego guya gudi Tata gula gabalegelego gudi eme.
7 Gula nga muangujiyile, nga muajiyile nji Tata. Sendese henyaha, muamujiya nu muamumonyi gale.”
8 Filipho wamuwambelele egi: “Fumu, tuleze Tata, ngenyi mitshima yetu mbayisuanguluga.”
9 Yesu wamuwambelele egi: “Filipho, matangua agasue ngudi gale n’enu, aye khenji ungujiya gaye ndo? Muthu wangumona ame, wamona nji Tata. Na luholo lutshi udi gunguwambela egi, ‘Tuleze Tata’?
10 Aye ushigo mutshigina egi eme nu Tata, tuana gudivua muabonga ba? Ndaga ngudi gumiwambela jishigo mukatuga gudi ame, uvi Tata yago tuana gudivua n’enji muabonga, muene udi mukalagala midimo yenji.
11 Tshiginenu ndaga ngudi gumiwambela egi, eme nu Tata tuana gudivua muabonga; gula ndo, tshiginenu midimo yene hakhenji.
12 Ngudi gumiwambela giamatshidia egi, muthu washa gutshigina gudi ame mbawutshita nji midimo ngudi mutshita. Mbawutshita midimo yakoma gubalega eyi, handaga ame ngudi muya gudi Tata.
13 Ndaga yagasue mbamutoga mu jina diami, mbanguyitshita, hagula Tata atumbuishiwe mu njila ya Mona.
14 Gula muatoga gima gimoshi mu jina diami, mbangudi gugitshita.
15 “Gula muanguzumba, mbamutumagela mikhuala yami.
16 Mbangutoga Tata ha gumihana mukuateshi* muko yonu mbamukhala n’enji ivo nu ivo,
17 nyuma ya giamatshidia, inyi enya ha mavu awa ajiyilego guheta, handaga anago guyimona nu ashigo guyijiya. Uvi enue mudi guyijiya handaga yakhala nu enue nu idi mukatshi dienu.
18 Ame mbangushigo gumibemba enue hakhenu.* Mbanguza luko gudi enue.
19 Guasala tangua diazonda, enya ha mavu awa mbaashigo gungumona luko. Uvi enue mbamungumona, handaga ngudi nu monyo; enue nji mbamukhala nu monyo.
20 Mu lusugu luene mbamujiya egi, eme nu Tata wami tuana gudivua muabonga; enue nu eme tuana gudivua nji muabonga.
21 Muthu watshigina mikhuala yami nu wayitumagela, muene wana gunguzumba. Muthu udi gunguzumba ame, Tata wami mbawumuzumba, ame nji mbangumuzumba, mbangudimonesa haphelo gudi muene.”
22 Yudasa, uvi ishigo Isakaliote, wamuwambelele egi: “Fumu, ndaga itshi yabua hene udi mutshigina gudimonesa haphelo gudi esue uvi gudi enya ha mavu ndo?”
23 Yesu wamuvutudile egi: “Gula muthu wanguzumba, mbawutumagela mbimbi yami; Tata wami nji mbawumuzumba. Mbatuza gudi muene nu mbatukhala gudi muene.
24 Muthu gashigo gunguzumba, gashigo mutumagela mbimbi jiami. Mbimbi eyi mudi muvua ishigo yami, uvi idi ya Tata munu wangutumine.
25 “Ngamiwambela ndaga eji hangudi n’enu.
26 Uvi mukuateshi, nyuma ya Nzambi, inyi Tata wami mbawumitumina mu jina diami, mbayimilongesa ndaga jiagasue. Mbayimiwunguluisa nji ndaga jiagasue ngamiwambelele.
27 Ngudi gumibembela guhuima; ngudi gumihana guhuima guami. Ngushigo gumihana nago gifua luholo mavu ana guhana. Mudisagesago mu mitshima yenu, muvuigo nji woma.
28 Muavi luholo ngamiwambela egi, ‘Ngudi muya nu mbanguvutuga luko gudi enue.’ Nga muanguzumbile, nga muasuangulugile ha guvua egi ame ngudi muya gudi Tata, handaga Tata udi wangubalega ame gukoma.
29 Ngamiwambela ndaga eji gutuama egi jikalegewe, hagula mbamushe gutshigina tangua mbajikalegewa.
30 Mbangushigo muzuela luko n’enu muavula, handaga fumu wa mavu awa waza. Muene gashigo nu ngolo holu diami.*
31 Uvi hagula mavu agasue ajiye egi ngana zumba Tata, ngana kalagala ndaga jiangutogele Tata ha gutshita. Zugenu tuyenu.
Mbimbi goshi'a diyiji
^ Nga “muwalaganyi.”
^ Nga “gifua an’a shiye.”
^ Nga “gashigo nu ufumu holu diami.”
