Mukanda wa Yone 15:1-27
15 “Ngudi mutshi wa vinyo wa giamatshidia, Tata wami udi mudimi.
2 Tata wana katula luthango luagasue lushigo muhaga mabundu, uvi wana londega luthango luagasue ludi muhaga mabundu, hagula luhage mabundu avula.
3 Mudi gale muaphelegeta mukunda nu mbimbi inyi ngamiwambela.
4 Khalenu nu gudivua guabonga nu ame, ame nji mbangukhala nu gudivua guabonga nu enue. Luholo luthango luajiyilego guhaga mabundu luene hakhenji gula lushigo lua gujinginyina gu muila wa mutshi wa vinyo, enue nji muajiyilego guhaga mabundu gula mushigo nu gudivua guabonga nu ame.
5 Ngudi mutshi wa vinyo; enue mudi thango. Muthu wagasue tudi gudivua n’enji muabonga, mbawuhaga mabundu avula; handaga gula ame ndo, muajiyilego gukalagala nga gima gimoshi.
6 Gula muthu gashigo gudivua muabonga nu ame, udi gifua luthango luabishidiwa hanze nu luamigina. Athu mbaabungisa thango jiene, mbaajimba ha tshuya nu mbaajiwotshia.
7 Gula mualandula gudivua muabonga nu ame nu gula mbimbi jiami jidi mukatshi dienu, ndaga yagasue mbamutoga mbayimikalegewa.
8 Tata wami wana tumbuishiwa gula mualandula guhaga mabundu avula nu muamonesa egi mudi alandudi ami.
9 Ngamizumba gifua muanguzumba Tata. Khalenu mu guzumba guami.
10 Gula mudi mutumagela mikhuala yami, mbamukhala mu guzumba guami, gifua luholo ngana tumagela mikhuala ya Tata nu ngana khala mu guzumba guenji.
11 “Ngamiwambela ndaga eji hagula gusuanguluga guami gukhale mukatshi dienu, nu hagula gusuanguluga guenu gukhale guatagana.
12 Mukhuala ngudi gumihana wenyowu: dizumbenu gifua luholo ngamizumbile.
13 Gushigo nu muthu udi nu guzumba guakoma gubalega gua muthu udi muhana monyo wenji mukunda nu mafuta enji.
14 Mudi mafuta ami gula mudi mukalagala ndaga ngudi gumiwambela.
15 Ngushigo gumitamega luko egi ahiga, handaga muhiga gana jiya ndo ndaga yana kalagala fumu wenji. Uvi ngamitamega egi mafuta handaga ngamiwambela ndaga jiagasue ngavile gudi Tata wami.
16 Enue muangutombelego, uvi ame ngamitombele. Ngamitombele ha guya nu ha gulandula guhaga mabundu hagula mabundu ene asale. Ngenyi ndaga yagasue muatoga gudi Tata wami mu jina diami, mbawumihana nayo.
17 “Ngudi gumiwambela ndaga eji hagula mudizumbe.
18 Gula athu a ha mavu awa adi n’enu umbalagaji, jiyenu egi adiangele gukhala umbalagaji nu ame gutuama egi akhale n’enu umbalagaji.
19 Nga muakhalele athu a ha mavu awa, nga enya ha mavu awa ana gumizumba gifua akuaku’awo. Luholo mushigo athu a ha mavu awa, uvi ngamitombele ha mavu awa, gishina giene enya ha mavu awa akhala n’enu umbalagaji.
20 Mujimbilago ndaga ngamiwambelele egi: Muhiga gakhalago wakoma gubalega fumu wenji. Gula angumonesele lamba, mbaamimonesa nji nu enue lamba. Gula atumagele mbimbi yami, mbaatumagela nji yenu.
21 Uvi mbaamikalegela ndaga eji jiagasue jiabola mukunda nu jina diami, handaga ashigo mujiya Muthu wangutumine.
22 Nga ngajilego nu ngazuelelego nawo, nga ashigo nu gubola. Uvi henyaha ashigo nu luholo lua gudibingisa mukunda nu gubola guawo.
23 Muthu wagasue udi nu umbalagaji nu ame, udi nji nu umbalagaji nu Tata wami.
24 Gula nga ngakalegelego ndaga jinyi muthu muko gajiyilego gukalagala mukatshi diawo, nga ashigo nu gubola. Uvi henyaha ene angumona, adi nu ame nu Tata wami umbalagaji.
25 Uvi ndaga eyi yakalegewa ha gutagenesa ndaga idi ya gufunda mu Mukhuala wawo egi: ‘Ene akhalele nu ame umbalagaji wa githuhu.’
26 Tangua mbadiza mukuateshi yonu mbangumitumina, mbawukatuga gudi Tata, nyuma ya giamatshidia, inyi idi muza gudi Tata, yene mbayizuela mukunda nu ame.
27 Uvi enue mbamulongesa handaga muakhalele nu ame sendese gu gisendeselo.
