Mukanda wa Yone 16:1-33
16 “Ngamiwambela ndaga eji hagula mubuigo mu gubola.
2 Athu mbaamikaya mu sinagoga. Yadiago tangua didi muza, muthu wagasue mbawumishiya mbawutangiza egi udi mukalegela Nzambi mudimo wa gijila.
3 Ene mbaatshita ndaga eji handaga ashigo mujiya Tata nu ashigo gungujiya ame.
4 Uvi ngamiwambela ndaga eji hagula tangua mbajibua, mbamujiye egi ngamiwambelele najio.
“Ngamiwambelelego ndaga eji gu gisendeselo handaga ngakhalele n’enu.
5 Uvi henyaha ngudi muya gudi Muthu wangutumine. Uvi gushigo nga muthu mukatshi dienu wanguhula egi, ‘Gui udi muya?’
6 Uvi mitshima yenu yazala nu gikenene handaga ngamileza ndaga eji.
7 Ngudi gumiwambela giamatshidia egi ngudi muya mukunda nu gubonga guenu. Handaga gula ngayilego, mukuateshi mbagashigo gumijila. Uvi gula ngaya, mbangudi gumitumina n’enji.
8 Uvi tangua mbadiza muene, mbawuhana enya ha mavu ijiyishilo mukunda nu gubola, mukunda nu ndaga jiabonga nu mukunda nu usopheshi:
9 thomo mukunda nu gubola, handaga ene ana sha ndo gutshigina gudi ame;
10 gungima, mukunda nu ndaga jiabonga, handaga ame ngudi muya gudi Tata, nu enue mbamushigo gungumona luko;
11 gu gisugishilo, mukunda nu usopheshi, handaga fumu wa mavu awa wasophesewe gale.
12 “Ngudi nu ndaga jiavula jia gumiwambela, uvi muajiyilego gujikotelesa jiagasue henyaha.
13 Uvi tangua mbadiza mukuateshi muene, nyuma ya giamatshidia, mbawumituameza mu njila ya giamatshidia handaga mbagashigo muzuela ndaga mu gutshigina guenji, uvi mbawuzuela ndaga jiavile muene nu mbawumiwambela ndaga jidi naye gubua.
14 Muene mbawungutumbuisa, handaga mbawumiwambela nji ndaga mbajivua muene gudi ame.
15 Ima yagasue idi nayo Tata, idi nji yami. Gishina giene ngazuedi egi, muene mbawumiwambela ndaga mbajivua muene gudi ame.
16 Guasala tangua diazonda, mbamushigo gungumona luko. Uvi gungima dia tangua diazonda, mbamungumona luko.”
17 Alandudi enji ako asendesele gudihula egi: “Itshi idi muene mutshigina guzuela hadi muene gutuleza egi, ‘Guasala tangua diazonda, mbamushigo gungumona luko; uvi gungima dia tangua diazonda, mbamungumona luko,’ nu egi ‘handaga ngudi muya gudi Tata’?”
18 Akhalele muzuela egi: “Udi mutshigina guzuela diago itshi hadi muene gutuleza egi, ‘guasala tangua diazonda’? Tushigo mujiya ndaga idi muzuelela muene.”
19 Yesu wajiyile egi akhalele mutshigina gumuhula mihu, hene waawambelele egi: “Mudi gudihula handaga ngamiwambela egi: ‘Guasala tangua diazonda mbamushigo gungumona luko, uvi gungima dia tangua diazonda, mbamungumona luko?’
20 Ngudi gumiwambela giamatshidia egi, mbamudila nu mbamukhala nu gikenene, uvi enya ha mavu mbaasuanguluga. Mbamukhala nu gikenene, uvi gikenene gienu mbagibalumuga gusuanguluga.
21 Hadi mukhetu nu misongo ya guvuala, wana khala nu gikenene handaga kumbi dienji dia lamba diatagana. Uvi gula wavuala mona, ganago luko gutangiza lamba dienji handaga gusuanguluga guenji gudi egi muthu wavualewa ha mavu.
22 Enue nji henyaha mudi nu gikenene. Uvi mbangumimona luko, mitshima yenu mbayikhala nji nu gusuanguluga. Gushigo nga muthu mumoshi mbawumikatula gusuanguluga guenu.
23 Mu lusugu luene, mbamushigo gunguhula nga muhu umoshi. Ngudi gumiwambela giamatshidia egi, gima giagasue mbamutoga gudi Tata, muene mbawumihana nagio mu jina diami.
24 Uu nu henyaha, khenji mutogago nga gima gimoshi mu jina diami. Togenu nu mbamuheta, hagula gusuanguluga guenu gukhale guatagana.
25 “Ngamiwambelele ndaga mu ifezegeselo. Uvi tangua didi muza mbangushigo luko gumiwambela mu ifezegeselo; uvi mbangumiwambela ndaga jiatadila Tata haphelo.
26 Mu lusugu luene, mbamutoga ima gudi Tata mu jina diami. Hangazuela ngenyi, ishigo mukotelesa egi eme mbangutoga ima mukunda nu enue.
27 Tata hakhenji wana gumizumba, handaga enue muanguzumbile nu muatshiginyile egi ngajile gifua mumoneshi wa Nzambi.
28 Ngakatugile gudi Tata, ngajile ha mavu gifua mumoneshi wenji. Henyaha ngudi mukatuga ha mavu, ngudi muya gudi Tata.”
29 Alandudi enji amuwambelele egi: “Henyaha na udi muzuela ndaga haphelo, ushigo mukalegela ifezegeselo.
30 Henyaha tuajiya lume egi aye udi mujiya ima yagasue, ushigo nu funu egi muthu aguhule muhu. Ngenyi tuatshigina diago egi aye wakatugile gudi Nzambi.”
31 Yesu waavutudile egi: “Henyaha na muatshigina giwa?
32 Talenu! Tangua didi muza, tangua diene diatagana gale, mukut’enu agasue mbamulenga, muthu nu muthu mbawulengela gumbo dienji, mbamungubemba hakhami. Uvi ngushigo hakhami, handaga Tata udi nu ame.
33 Ngamiwambela ndaga eji hagula muhete guhuima mu njila yami. Ha mavu mbamutagana nu malamba, uvi khalenu nu ngolo! Ame ngabinga mavu.”
