Mukanda wa Yone 18:1-40
-
Yudasa wadiga Yesu (1-9)
-
Phetelo wakalegela phogo ya khusa (10, 11)
-
Abata Yesu gudi Ana (12-14)
-
Phetelo watuna Yesu mbala ya thomo (15-18)
-
Yesu udi gutuama dia Ana (19-24)
-
Phetelo watuna Yesu mbala ya ngiadi nu ya thathu (25-27)
-
Yesu udi gutuama dia Philato (28-40)
-
“Ufumu wami ushigo wa ha mavu awa” (36)
-
18 Hamanesele Yesu gukombelela, wazogele nu alandudi enji, ayile ha sambua diko dia Baba dia Kidelona,* fundo diakhalele gilanga, anginyine mu gilanga giene.
2 Uvi Yudasa yonu wamudigile, wakhalele nji mujiya fundo diene, handaga Yesu wakhalele muya guene muavula nu alandudi enji.
3 Hene Yudasa wayile nu masuta avula nu mafumu a masuta anyi atumiwe gudi mafumu a nganga-nzambi nu Afalese. Ayile nu mienda nu tshuya nu iluilo.
4 Yesu wajiyile ndaga jiagasue jiakhalele naye gumubuila, hene wazugile, wasuenele hehi nawo, waahudile gamba: “Nanyi mudi mukamba?”
5 Ene amuvutudile egi: “Yesu wa gu Nazaleta.” Muene waawambelele gamba: “Ame yowu.” Yudasa munu wamudigile, wakhalele nji wagumagana nu athu ene.
6 Uvi tangua diawambelele Yesu egi, “Ame yowu,” ene avutugile gungima, abuile hashi.
7 Muene waahudile luko egi: “Nanyi mudi mukamba?” Ene avutudile gamba: “Yesu wa gu Nazaleta.”
8 Yesu waalezele egi: “Ngamiwambela gale egi ame yowu. Gula ame mudi mukamba, bembenu athu awa aye.”
9 Wazuelele ngenyi ha gutagenesa ndaga yazuelele muene egi: “Ame ngatoteselego nga mumoshi mukatshi dia athu anyi wanguhanele.”
10 Simona Phetelo wakhalele nu phogo ya khusa; wayizolele, wawasele muenya mudimo wa nganga-nzambi wakoma, wamubatuile ditshi dia madia. Muenya mudimo muene jina dienji Malekusu.
11 Uvi Yesu walezele Phetelo egi: “Vutula phogo yaye ya khusa mu gindalo. Ame ngajiyilego gunua khopho dianguhanyi Tata ba?”
12 Masuta nu komanda wa masuta nu maphulushi a enya Yuda, akuatele Yesu, amujitshigile.
13 Ayile n’enji thomo gudi Ana, handaga Ana wakhalele giwaji gia Kayifa munu wakhalele nganga-nzambi wakoma wa givo ginyi.
14 Kayifa yowu muene wawambelele enya Yuda egi, yakhalele mukunda nu gubonga guawo egi muthu mumoshi afue mukunda nu athu agasue.
15 Simona Phetelo nu mulandudi muko, akhalele mulandula Yesu. Mulandudi muko munu wakhalele mujiyiwa gudi nganga-nzambi wakoma. Hene, wanginyine nu Yesu mu luphango lua nganga-nzambi wakoma.
16 Uvi Phetelo wamaganele hanze ya luphango, hehi nu mufulo. Mulandudi muko yonu wakhalele gudijiya nu nganga-nzambi wakoma, wayile muzuela nu muenya mudimo wa mukhetu wakhalele ha mufulo, hene anginyishile Phetelo.
17 Muenya mudimo wa mukhetu wawambelele Phetelo egi: “Aye nji ushigo mulandudi wa muthu owu ba?” Muene wamuvutudile egi: “Ndo gami.”
18 Guma guakhalele guahuma, hene enya mudimo nu maphulushi alondele tshuya; akhalele agujieta gu jigo ha guweta tshuya. Phetelo nji wakhalele wagumagana nawo, wakhalele muweta tshuya.
19 Fumu wa nganga-nzambi wasendesele guhula Yesu mihu mukunda nu alandudi enji nu mukunda nu malongo enji.
20 Yesu wamuvutudile egi: “Ngakhalele mulongesa mu mafundo a athu avula, ngakhalele mulongesa nji mu sinagoga nu mu tempelo, fundo enya Yuda agasue ana gudibungisa. Ngazuelelego nga gima mu gisuegi.
21 Mukunda natshi udi gunguhula mihu? Hula mihu gudi athu avile ndaga ngakhalele guawambela. Adi mujiya muabonga ndaga ngaalezele.”
22 Hazuelele Yesu ndaga eji, phulushi mumoshi wakhalele wagumagana hene wamuhuile mbanda gu phala. Wamuwambelele egi: “Mvutu udi muhana fumu wa nganga-nzambi yenyeyi?”
23 Yesu wamuvutudile egi: “Gula ngazuedi ndaga yabola, zuela ndaga yene yabola. Uvi gula ndaga ngazuedi idi ya giamatshidia, na mukunda natshi udi gungubeta?”
24 Ana wamutumine wagujitshiga gudi nganga-nzambi wakoma Kayifa.
25 Simona Phetelo wakhalele muweta tshuya. Amuwambele egi: “Aye nji ushigo mulandudi wenji ba?” Muene watunyile egi: “Ndo gami, ngushigo mulandudi wenji.”
26 Muenya mudimo mumoshi wa nganga-nzambi wakoma, phangi’a muthu munu Phetelo wabatuile kutshi, wamuwambelele egi: “Aye ngagumonyi mu gilanga nu muthu yowu, ishigo ngenyi?”
27 Uvi Phetelo watunyine luko. Mu tangua diene, kolombolo diadidile.
28 Akatugile nu Yesu gumbo dia Kayifa, ayile n’enji gumbo dia guvelenele. Yakhalele mu gimenegena gia mutshiatshia. Uvi enya Yuda anginyilego mu luphango lua guvelenele hagula abuigo usala nu hagula adie Wano wa Pake.
29 Hene Philato wazogele hanze gudi ene, waahudile egi: “Itshi mudi mufundjila muthu yowu?”
30 Amuvutudile egi: “Nga muthu yowu gashigo mutshitshi wa ndaga jiabola,* nga tuamuhanelego ha mago aye.”
31 Philato waawambelele egi: “Enue hakhenu muzangulenu mumusophese mu gudivua nu mukhuala wenu.” Enya Yuda amuvutudile gamba: “Mukhuala ushigo gutuhana njila ha gushiya muthu.”
32 Yakalegewe ngenyi ha gutagenesa mbimbi yazuelele Yesu ha gumonesa gula gufua gua luholo lutshi guakhalele naye gufua muene.
33 Philato wanginyile luko mu luphango lua guvelenele, watamegele Yesu, wamuhudile egi: “Aye udi Fumu wa enya Yuda ba?”
34 Yesu wamuvutudile gamba: “Mukunda natshi udi gunguhula ngenyi? Ndaga eji udi gunguhula jiakatuga mu mutshima waye, nga ndo athu ako aguwambela ndaga jiami?”
35 Philato wamuvutudile egi: “Ame ngushigo muenya Yuda ndo. Enya gifutshi giaye nu mafumu a nganga-nzambi aguhanyi ha mago ami. Aye itshi wakalagala?”
36 Yesu wamuvutudile egi: “Ufumu wami ushigo wa ha mavu awa. Nga Ufumu wami udi wa ha mavu awa, nga enya mudimo ami alui hagula nguhanewago ha mago a enya Yuda. Uvi Ufumu wami ushigo wa ha mavu awa.”
37 Hene, Philato wamuwambelele egi: “Na udi fumu ba?” Yesu wamuvutudile gamba: “Aye hakhaye wazuela egi ngudi fumu. Handaga gishina giene ngavalewe, gishina giene ngajile ha mavu hagula ngulongese giamatshidia. Muthu wagasue udi gu khanda ya giamatshidia, avue mbimbi yami.”
38 Philato wamuhudile egi: “Giamatshidia gidi itshi?”
Hazuelele muene ngenyi, wazogele, wayile luko gudi enya Yuda. Waawambelele egi: “Ngushigo mumona nga gima gimoshi gia gufuishila muthu owu milonga.
39 Mu sungi yagasue ya Wano wa Pake, muana gungutoga ha gumizolela muthu mumoshi mu bologo. Henyaha, muatshigina ngumizolele Fumu wa enya Yuda ba?”
40 Ene azuelele luko mangololo egi: “Muthu yowu ndo. Tuzolele Barabase.” Uvi Barabase muene wakhalele nzangi.
