Mukanda wa Yone 19:1-42
19 Gungima, Philato wazanguile Yesu, wamubetesele fimbo.
2 Masuta alondele gifulu gia miya, amusudigile nagio mu muto, amusudigile nji lopho dialeha diabenga.
3 Akhalele muza gudi muene, akhalele gumuwambela egi: “Moyo* Fumu wa enya Yuda!” Akhalele nji gumubeta mbanda gu phala.
4 Philato wazogele luko hanze, wazuelele egi: “Talenu! Ngudi gumuzola hanze hagula mujiye egi ngamonelego nga gima gimoshi gia gumufishila milonga.”
5 Yesu wazogele hanze wagusudiga gifulu gia miya nu lopho dialeha diabenga. Philato waawambelele egi: “Talenu! Yala muene mueny’owu!”
6 Uvi hamumonele mafumu a nganga-nzambi nu maphulushi, akalugile egi: “Akhokhewe ha mutshi! Akhokhewe ha mutshi!”* Philato waawambelele egi: “Muzangulenu hakhenu mumushiye,* handaga ame ngushigo mumona nga ndaga imoshi ya gumufishila milonga.”
7 Enya Yuda amuvutudile egi: “Esue tudi nu mukhuala. Ha gutadila mukhuala wene, muene udi naye gufua, handaga udi gudibuisa mun’a Nzambi.”
8 Tangua diavile Philato ndaga jiakhalele muzuela ene, wavile luko woma wavula.
9 Wanginyine luko monzo ya guvelenele, wahudile Yesu egi: “Aye udi muenya gui?” Uvi Yesu gamuhanelego nga mvutu.
10 Gungima Philato wamuwambelele egi: “Aye udi mutuna gunguhana mvutu? Ushigo mujiya egi ngudi nu ufumu wa gugubemba, ngudi nji nu ufumu wa gugushiya?”*
11 Yesu wamuvutudile egi: “Aye ushigo nga nu ufumu umoshi holu diami gula waguhanewego mu dilu. Gishina giene, muthu wanguhanyi ha mago aye wakalagala gubola guakoma.”
12 Gishina giene Philato wakhalele mukamba luholo lua gumubemba, uvi enya Yuda akhalele muzuela mu dijui diakola egi: “Gula wabemba muthu yowu, ushigo luko futa dia Sezale. Muthu wagasue udi gudibuisa fumu, udi mbalagaji wa Sezale.”
13 Havile Philato mbimbi eji, wazogele nu Yesu hanze, wakhalele hashi ha fundo dia gusophesela milonga. Fundo diene Dialondewe nu Maseso, diana tamegewa mu Hebelu egi Gabata.
14 Yakhalele mu lusugu lua Gudilondega mukunda nu Wano wa Pake; yakhalele mu tangua dia midi.* Philato wawambelele enya Yuda egi: “Talenu! Fumi’enu mueny’owu!”
15 Uvi ene azuelele mu dijui diakola egi: “Mushiye! Mushiye! Akhokhewe ha mutshi!”* Philato waahudile egi: “Ngushiya fumi’enu ba?” Mafumu a nganga-nzambi avutudile egi: “Tushigo nu fumu muko phamba Sezale.”
16 Gungima, waahanele Yesu hagula amukhokhe ha mutshi.
Hene amuzudile aya n’enji.
17 Muene hakhenji wakhalele gudibatela mutshi wa lamba.* Wazogele, wayile ha fundo diana tamegewa egi Gibozo-bozo gia Muto. Mu Hebelu diana tamegewa egi Gologota.
18 Amukhokhele ha mutshi ha fundo diene nu athu ako mbadi, muko gu khanda iko, muko gu khanda iko, Yesu hakatshi.
19 Philato wasonegele nji isona, wayihagele holu dia mutshi wa lamba;* wayisonegele egi: “Yesu wa gu Nazaleta, Fumu wa enya Yuda.”
20 Enya Yuda avula atangele isona eyi, handaga fundo diakhokhewe Yesu ha mutshi diakhalele hehi nu dimbo. Isona yene yakhalele yagufunda mu zuelelo dia Hebelu, dia Latin nu dia Greke.
21 Uvi mafumu a nganga-nzambi a enya Yuda awambelele Philato egi: “Usonegago egi, ‘Fumu wa enya Yuda.’ Uvi sonega egi wakhalele muzuela egi, ‘Ngudi Fumu wa enya Yuda.’”
22 Philato wazuelele egi: “Ingasonega, ikhale ngenyi.”
23 Tangua masuta akhokhele Yesu ha mutshi, azudile milele yenji ya holu, ayikhaphele mu mashinda nguana. Suta diagasue diazudile shinda dimoshi. Azudile nji mulele wenji wa mukatshi, wakhalelego wagutunga, uvi wakhalele phamba umoshi sendese gosa uu nu hashi.
24 Asendesele guzuela mukatshi diawo egi: “Tuwutawula ndo, uvi tutenu mubela ha gujiya gula nanyi uwuzula.” Yakalegewe ngenyi ha gutagenesa ndaga idi muzuela mukanda wa Nzambi egi: “Ene akhaphele milele yami mukatshi diawo, ayitele mubela.” Masuta akalegele diago ndaga eji.
25 Gin’a Yesu nu phangi’enji muko wa mukhetu akhalele agumagana hehi nu mutshi wa lamba* wa Yesu. Madiya mukaji’a Kelophase nu Madiya wa gu Magadala akhalele nji hene.
26 Hamonele Yesu mama wenji nu mulandudi munu wakhalele muene muzumba muavula agumagana hehi, wawambelele gin’enji egi: “Mukhetu, tala mun’aye mueny’owu!”
27 Wawambelele mulandudi muene egi: “Tala! Gin’aye mueny’owu!” Gungima, mulandudi muene wayile nu Madiya gumbo dienji.
28 Gungima dia ndaga eji, Yesu wajiyile egi ndaga jiagasue jiasonegewe mu mukanda wa Nzambi jiataganele, wazuelele egi: “Ngudi muvua luhungu.”*
29 Guakhalele nu bungu diaguzala pha nu vinyo ilakhua.* Athu akhalele agumagana hene azanguile eponje, ayimbile mu vinyo ilakhua, ayihagele gu mutshi wa isophe,* amuhagele nayo gu kano.
30 Tangua amuhanele vinyo ilakhua, Yesu wazuelele egi: “Yatagenesewa!” Gungima wazebuile muto, wafuile.
31 Handaga yakhalele lusugu lua Gudilondega, enya Yuda atogele Philato ha gubogola malu a athu akhokhewe ha mitshi ya lamba nu gukatula imbi yawo hagula isadigo ha mitshi ya lamba mu Lusugu lua Guhuluguga (handaga yakhalele Lusugu lua Guhuluguga Luakoma).
32 Hene masuta ajile, aboguele malu a muthu wa thomo nu a muthu wa mbadi munu wakhokhewe n’enji hehi ha mutshi wa lamba.
33 Uvi tangua ahetele gudi Yesu, amumonele egi wafui gale. Hene aboguelego malu enji.
34 Uvi suta mumoshi wamutuile mulumbu mu luphatshi; mahatshi nu meya azogele mbala imoshi.
35 Muthu wamonele ndaga yene udi guyizuelela hagula enue nji mushe gutshigina. Ndaga idi muzuela muene idi ya giamatshidia. Muene udi mujiya egi ndaga adi muzuela idi ya giamatshidia.
36 Yadiago, ndaga eji jiabuile ha gutagenesa ndaga yazuelele mukanda wa Nzambi egi: “Gushigo nga gifuwa gienji gimoshi mbagiboga.”
37 Mbimbi jiko jia mukanda wa Nzambi jidi muzuela egi: “Ene mbaatala muthu atuile ene mulumbu.”
38 Gungima dia ndaga eji, Yozefe wa gu dimbo dia Alimataya, munu wakhalele mulandudi wa Yesu mu gisuegi handaga wakhalele muvua woma wa enya Yuda, watogele Philato gila wajiya guzula kimbi gia Yesu; Philato watshiginyile. Hene wajile, wazanguile kimbi gia Yesu, wayile nagio.
39 Nikodemo yago wayile mutala Yesu mu phipha mbala ya thomo, wajile nji. Wajile nu mula wagufutula* nu Alowese; yakhalele bakilo 30.*
40 Azanguile kimbi gia Yesu, agilangele milele ya linene, agimbile maji a vumba diabonga gifua luholo enya Yuda akhalele mulondega mvumbi ha guyifunda.
41 Guakhalele nu gilanga gimoshi ha fundo diashiyiwe Yesu.* Mu gilanga giene, guakhalele nu malumba* ahe-ahe anyi akhalele khenji afundjiwa galego nga muthu.
42 Yakhalele mu lusugu lua Gudilondega lua enya Yuda; malumba nji akhalele hehi. Hene, ahagele kimbi gia Yesu mu malumba ene.
Mbimbi goshi'a diyiji
^ Nga “Tuagumenega.”
^ Nga “Ashiyiwe ha mutshi! Ashiyiwe ha mutshi!”
^ Nga “mumukhokhe ha mutshi.”
^ Nga “gugukhokha ha mutshi?”
^ Mu Greke: “mu kumbi dia samano.”
^ Nga “Ashiyiwe ha mutshi!”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Nga “phuila.”
^ Nga “ya nganyi.”
^ Tala Ukoteleshi wa Mbimbi.
^ Nga ndo yajiya gukhala egi, “rulo imoshi.”
^ Yakotelesa egi, kilo gia enya Roma.
^ Nga “diakhokhewe Yesu ha mutshi.”
^ Nga “malumba a guwunguluga.”
