Mukanda wa Yone 2:1-25
2 Mu lusugu lua thathu, guakhalele nu wano wa ulo gu dimbo dia Kana gu Galilea. Gin’a Yesu wakhalele hene.
2 Yesu nu alandudi enji atamegewe nji gu wano wene.
3 Tangua matombe ahuile, gin’a Yesu wamuwambelele gamba: “Ene ashigo luko nu matombe.”
4 Uvi Yesu wamuwambelele egi: “Mukhetu eye, ndaga itshi udi nayo nu ame?* Tangua diami khenji ditagana galego.”
5 Gin’enji wawambelele athu akhalele muhana athu ima ya gudia egi: “Kalagalenu yagasue iza gumiwambela muene.”
6 Ha fundo diene, guakhalele nu mabungu a meya asamano alondewe nu maseso, gifua luholo mikhuala ya gudiwevua ya enya Yuda yakhalele mutoga. Bungu nu bungu diakhalele naye gungina izongelo ya meya mbadi nga thathu.*
7 Yesu waawambelele egi: “Zalesenu meya mu mabungu awa.” Hene a azalesele nu meya fuafuafua.
8 Gungima Yesu waawambelele egi: “Zulenu ndambo muye nayo gudi mutuameji wa wano.” Hene ayile nayo.
9 Tangua dialolele mutuameji wa wano meya anyi abalumugile matombe, gajiyilego fundo diakatugile matombe ene. Uvi athu akhalele muhana ima ya gudia anyi athayele* meya, akhalele mujiya. Mutuameji wa wano watamegele yala wakhalele muzula mukhetu mu ulo,
10 wamuwambelele egi: “Muthu wagasue wana hana thomo matombe abonga; gula athu akuatewa matombe, gungima ahanyi giwa matombe abola. Uvi aye na wabamba matombe abonga uu nu luenyelu.”
11 Yesu watshitshile ndaga eyi mu dimbo dia Kana gu Galilea. Yakhalele gisendeselo gienji gia gutshita ndaga jia gushimana. Wamonesele lutumbu luenji, alandudi enji ashile gutshigina gudi muene.
12 Gungima muene nu gin’enji nu aphangi enji a mala nu alandudi enji, abulumugile gu Kaphelenauma. Uvi atshitshilego masugu avula guene.
13 Wano wa Pake wa enya Yuda wasuenele hehi. Hene Yesu wakandugile gu Yelusalema.
14 Wayile mu tempelo, wasangele athu akhalele musumbisa ngombe nu imeme nu mayembe, nu athu akhalele musombegesa makuta. Waasangele agukhala ha ife.
15 Walondele fimbo nu ngonji, wakayele athu agasue akhalele musumbisa imeme nu ngombe mu tempelo. Wamuangele makuta a athu akhalele musombegesa mbongo, wasendumuine mesa awo.
16 Wawambelele athu akhalele musumbisa mayembe egi: “Katulenu ima eyi haha! Bembenu gubuisa inzo ya Tata wami, inzo ya mungenda!”*
17 Alandudi enji awungulugile ndaga yasonegewe egi: “Gikhesa mukunda nu inzo yaye mbagilema gifua tshuya mukatshi diami.”
18 Uvi enya Yuda amuwambelele egi: “Ndaga itshi ya gushimana wajiya gutudijiga idi mumonesa egi udi nu ngolo jia gukalagala ndaga eji?”
19 Yesu waawambelele egi: “Muangenu tempelo eyi, mbangudi guyitunga mu masugu thathu.”
20 Enya Yuda amuhudile egi: “Tempelo eyi yatungiwe mu ivo 46, aye na mbawuyitunge mu masugu thathu?”
21 Uvi tempelo yakhalele muzuelela muene yakhalele muila wenji.
22 Uvi tangua diafuzumugile muene, alandudi enji awungulugile egi wakhalele muzuelela ndaga yene muavula. Ashile gutshigina mu mbimbi ya Nzambi nu mu ndaga jiakhalele muzuela Yesu.
23 Uvi tangua diakhalele muene gu Yelusalema gu Wano wa Pake, athu avula ashile gutshigina mu jina dienji tangua amonele ndaga jia gushimana jiakhalele mutshita muene.
24 Uvi Yesu gakhalelego guashila mutshima handaga wakhalele guajiya mukut’awo agasue.
25 Muene gakhalelego nu funu egi muthu amukotelesele ndaga yatadila athu, handaga wakhalele mujiya ndaga jidi mu mutshima wa muthu.
Mbimbi goshi'a diyiji
^ Mu Greke: “Itshi aye nu ame, mukhetu?” Mbimbi eji jidi mumonesa matangi a muthu udi mutuna ndaga. Hamutamegele muene egi “mukhetu,” ishigo mukotelesa egi gakhalelego gumunemesa.
^ Yajiya gukhala egi, gizongelo giene gia meya giakhalele bate. Bate imoshi yakhalele nu ba litre 22.
^ Nga “atahele.”
^ Nga “fundo dia zando; fundo dia gusumbishila.”
