Mukanda wa Yone 20:1-31
20 Mu lusugu lua thomo lua phoso,* Madiya wa gu Magadala wayile mu gimenegena gia mutshiatshia gu malumba.* Guma guakhalele gula vuvunyi, wasangele seso diakhalele ha mufulo wa malumba* diakatuga gale.
2 Wayile muphushi gudi Simona Phetelo nu gudi mulandudi muko munu Yesu wakhalele muzumba muavula, waawambelele egi: “Akatula Fumu mu malumba, tushigo mujiya gui amuhagi.”
3 Hene Phetelo nu mulandudi muko munu ayile gu malumba.
4 Mukut’awo agasue mbadi asendesele guzula phushi, uvi mulandudi muko munu wabalegele Phetelo phushi, wahetele muthu wa thomo gu malumba.
5 Washiwugile ha gutala mu malumba, wamonele milele ya linene hashi uvi ganginyinego moshi.
6 Simona Phetelo wajile nu gumulandula gungima, hahetele muene wanginyine mu malumba. Wamonele milele ya linene ya guhaga hashi.
7 Mulele wahagewe gu muto wa Yesu wakhalelego fundo dimoshi nu milele iko, uvi wakhalele waguwonga, wagusha ha fundo diko wene hakhenji.
8 Mulandudi muko munu wadiangele guheta gu malumba, wanginyine nji, wamonele nu watshiginyile ndaga jiaawambelewe.
9 Handaga akhalele khenji akotelesa galego ndaga yazuelele mukanda wa Nzambi egi muene udi naye gufuzumuga mu gufua.
10 Hene alandudi avutugile gu jinzo jiawo.
11 Uvi, Madiya wakhalele wagumagana hanze hehi nu malumba, wakhalele mudila. Hakhalele muene mudila, washiwugile ha gutala mu malumba.
12 Wamonele anjelo mbadi agusudiga milele yaphelegeta, agukhala fundo diakhalele kimbi gia Yesu, muko gu muto uvi muko gu malu.
13 Amuhudile gamba: “Mukhetu eye itshi udi mudidila?” Muene waavutuile egi: “Athu akatula Fumu wami, ngushigo mujiya gula amuhagi gui.”
14 Hazuelele muene ngenyi, wabalumugile wamonele Yesu mumagana hene. Uvi gamujiyilego egi Yesu.
15 Yesu wamuhudile gamba: “Mukhetu eye itshi udi mudidila? Udi mukamba nanyi?” Madiya watangijile egi yakhalele muenya mudimo wa dihia, hene wamuvutuile egi: “Fumu gula aye wamukatula, nguleze fundo wamuhagi hagula nguye ngumuzule.”
16 Yesu wamuwambelele egi: “Madiya!” Muene wabalumugile, wamuwambelele mu zuelelo dia Hebelu egi: “Rabuni!” (yakotelesa egi “Mulongeshi!”)
17 Yesu wamuwambelele egi: “Ungujinginyinago, handaga khenji ngukanduga galego gudi Tata. Uvi nda umone aphangi’ami, waawambele egi ‘Ngudi mukanduga gudi Sh’ami yago udi nji Sh’enu, gudi Nzambi wami nu Nzambi wenu.’”
18 Madiya wa gu Magadala wayile muwambela alandudi egi: “Ngamona Fumu!” Waatele lumene lua ndaga jiagasue jiamuwambelele muene.
19 Mu ngueze ya lusugu luene lua thomo lua phoso, fundo diakhalele alandudi diakhalele dia gujidiga mifulo muabonga, handaga akhalele muvua woma wa enya Yuda. Uvi Yesu wamonegele mukatshi diawo, waawambelele egi: “Guhuima gukhale nu enue.”
20 Gungima, waalezele mago enji nu luphatshi luenji. Hene alandudi asuangulugile luholo amonele Fumu.
21 Yesu waawambelele luko egi: “Guhuima gukhale nu enue. Luholo Tata wangutumine, ame nji ngudi gumituma.”
22 Hazuelele muene ngenyi, waafujile muhehe, waawambelele egi: “Hetenu nyuma ya Nzambi.
23 Gula muatotesela muthu gubola, gubola guenji mbagutotesewa. Uvi gula muatoteselego muthu gubola, gubola guenji mbagushigo mutotesewa.”
24 Uvi Toma, mumoshi mukatshi dia apostolo 12, yago wana tamegewa egi phasa, gakhalelego hene tangua diajile Yesu.
25 Hene alandudi ako amuwambelele egi: “Tuamona Fumu!” Uvi muene waalezele gamba: “Gula ngamonelego ishilo* ya phuta jia misumadi gu mago enji nu ngambilego muno wami mu ishilo yene, nu gula nganginyishilego koko diami mu luphatshi luenji, ngajiyilego gutshigina.”
26 Gungima dia masugu nage, alandudi adibungishile luko mukatshi dia inzo, Toma nji wakhalele nawo; mifulo yakhalele yagujidiga. Yesu wajile, wamaganele mukatshi diawo, waawambelele egi: “Guhuima gukhale nu enue.”
27 Gungima wawambelele Toma egi: “Nginyisa muno waye haha, tala mago ami, zangula nji koko diaye dinginyise mu luphatshi luami, bemba gusha giphapha* uvi tshigina.”
28 Toma wamuvutudile egi: “Fumu wami, Nzambi wami!”
29 Yesu wamuwambelele egi: “Aye watshigina handaga wangumona? Gusuanguluga gudi nu athu ashigo mumona, uvi adi mutshigina.”
30 Mu guzuela guabonga, Yesu wakalegele ndaga jiavula jia gushimana gu meso a alandudi, uvi jiasonegewego mu rulo eyi.
31 Uvi ndaga eji jiasonegewe hagula mutshigine egi Yesu udi Klisto, Mun’a Nzambi; nu hagula muhete monyo mu njila ya jina dienji handaga mudi mumonesa gutshigina.
Mbimbi goshi'a diyiji
^ Lusugu luene lua thomo luene tuana tamega egi lua lubingo. Gudi enya Yuda, ludi lusugu lua thomo lua phoso.
^ Nga “malumba a guwunguluga.”
^ Nga “malumba a guwunguluga.”
^ Nga “ifunya ya phuta.”
^ Nga “bemba gumba maya.”
