Mukanda wa Yone 21:1-25
21 Gungima Yesu wamonegele luko gudi alandudi enji gu Kianga gia Tibeliade. Wamonegele gudi ene luholo elu:
2 Guakhalele Simona Phetelo, Toma (wakhalele mutamegewa egi Phasa), Natanaele wa gu dimbo dia Kana gu Galilea, ana a Zebedayo nu alandudi ako mbadi.
3 Simona Phetelo waawambelele egi: “Ngaya ngulowe.” Ene amuvutudile egi: “Esue nji tudi muya naye.” Azogele, anginyile mu wato, ayile. Uvi mu phipha inyi yagasue akuatelego nga gima.
4 Hakhalele mutshia guma, Yesu wamagenele mu khulo ya kianga, uvi alandudi enji ajiyilego egi yakhalele Yesu.
5 Hene Yesu waawambelele egi: “An’ami, mushigo nga nu gima gimoshi* gia gudia ba?” Ene amuvutudile egi: “Ndo!”
6 Waawambelele egi: “Mbenu wanda gu khanda ya madia ya wato, mudi mukuata jishui.” Hene ambile wanda, uvi akhalelego nu luholo lua guwunana handaga jishui jiakhalele jiavula.
7 Gungima, mulandudi munu Yesu wakhalele muzumba muavula wawambelele Phetelo egi: “Yonu Fumu!” Havile Simona Phetelo egi yonu wakhalele Fumu, wasudigile* mulele wenji wa holu handaga wakhalele thowa,* gungima wadimbile mu kianga.
8 Uvi alandudi ako ajile mu gawato gazonda, akhalele munana wanda wa guzala nu jishui, handaga akhalelego gualeha nu gonze, akhalele ha mutango wa bametre 90.*
9 Tangua azogele gonze, amonele makala a tshuya nu ishui holu nu dipha.
10 Yesu waawambelele egi: “Izenu nu ndambo ya jishui muakuata luenyelu.”
11 Simona Phetelo wanginyine mu wato, wananele wanda gonze wakhalele wa guzala nu jishui jiakoma 153. Ikhale wanda wene wakhalele wa guzala nu jishui, uvi watawugilego.
12 Yesu waawambelele egi: “Izenu mudie.” Uvi nga mulandudi mumoshi gamuhudilego egi: “Aye nanyi?” handaga akhalele mujiya egi muene udi Fumu.
13 Yesu wajile, wazudile dipha waahanele, waahanele nji nu ishui.
14 Sendese hafuzumugine Yesu, egi giphungu gia thathu giamonegele muene gudi alandudi.
15 Hamanesele ene gudia, Yesu wahudile Simona Phetelo egi: “Simona mun’a Yone, wana gunguzumba* gubalega ima eyi ba?” Phetelo wamuvutudile egi: “Ayi Fumu, aye mujiya egi ngana guguzumba* muavula diago.” Yesu wamuwambelele egi: “Disa ana a imeme yami.”
16 Wamuhudile luko mbala ya ngiadi egi: “Simona mun’a Yone, aye wana gunguzumba ba?” Phetelo wamuvutudile egi: “Ayi Fumu, aye mujiya egi ngana guguzumba muavula diago.” Yesu wamuwambelele gamba: “Bamba imeme yami yazonda.”
17 Yesu wamuhudile mbala ya thathu egi: “Simona mun’a Yone, wana gunguzumba muavula diago ba?” Phetelo wavuile gikenene handaga Yesu wamuhudile mbala ya thathu egi: “Wana gunguzumba muavula diago ba?” Hene, Phetelo wamuvutudile egi: “Fumu, aye wana jiya ndaga jiagasue, udi mujiya egi ngana guguzumba muavula diago.” Yesu wamulezele egi: “Disa imeme yami yazonda.
18 Ngudi guguwambela giamatshidia egi, tangua wakhalele muvuala, wakhalele gudisudiga milele aye hakhaye, wakhalele nji muya fundo watshigina. Uvi tangua mbawubua muthu wa gukola, aye mbawusununa mago aye, muthu muko mbawugusudiga mulele nu mbawugutuala fundo ushigo mutshigina guya.”
19 Yesu wazuelele ndaga eji ha gumonesa gula gufua gua luholo lutshi mbagufua Phetelo ha gutumbuisa Nzambi. Gungima dia guzuela ndaga eji, wamuwambelele egi: “Landula gunguhata.”
20 Phetelo wabalumugile, wamonele mulandudi munu Yesu wakhalele muzumba muavula yowu gualandula. Mulandudi owu muene washiwugile ha thulo ya Yesu tangua akhalele mudia mu ngueze ha gumuhula egi: “Fumu nanyi uza gugudiga?”
21 Hamumonele Phetelo, wahudile Yesu egi: “Fumu, uvi muthu owu giwa itshi mbayimubuila?”
22 Yesu wamuwambelele egi: “Gula gutshigina guami gudi egi muene akhale uu nu tangua mbanguza, na yagutadila gu itshi? Aye landula gunguhata.”
23 Ndaga eyi yamuangenele mukatshi dia aphangi egi mulandudi muene mbagashigo mufua. Uvi Yesu gazuelelego ngenyi, wazuelele egi: “Gula gutshigina guami gudi egi muene akhale uu nu tangua mbanguza, na yagutadila gu itshi?”
24 Mulandudi muene, muene udi muzuela ndaga eji, muene nji wajisonega. Tudi mujiya luko egi ndaga jidi muzuela muene jidi jia giamatshidia.
25 Ya diago, gudi nji nu ndaga jiko jiavula jiakalegele Yesu. Gula nga ndaga eji jiagasue jiasonegewe, ngudi mutangiza egi nga mavu ashigo nu fundo dia guhaga rulo jiene jia gusonega.
Mbimbi goshi'a diyiji
^ Nga “nga ishui imoshi ndo.”
^ Nga “wasudigile ha kete.”
^ Nga “gakhalelego diago nu milele.”
^ Mu Greke: “bakude 200.”
^ Mu Greke: “agape.”
^ Mu Greke: “filia.”
