Mukanda wa Yone 3:1-36
3 Guakhalele nu Mufalese mumoshi, jina dienji Nikodemo, wakhalele fumu wa enya Yuda.
2 Wayile mumona Yesu mu phipha. Wamuwambelele egi: “Rabi, tudi mujiya egi aye udi mulongeshi wakatugile gudi Nzambi, handaga gushigo muthu wajiya gutshita ndaga jia gushimana eji udi mutshita gula Nzambi gashigo n’enji.”
3 Yesu wamuvutudile gamba: “Ngudi guguwambela giamatshidia egi, gula muthu gavualewego luyadi,* muene gajiyilego gungina mu Ufumu wa Nzambi.”
4 Nikodemo wamuhudile egi: “Luholo lutshi muthu wajiya guvualewa gula muene wakudi gale? Gajiyilego gungina luko mu vumo dia gin’enji ha guvualewa luko mbala ya mbadi, ishigo ngenyi?”
5 Yesu wamuvutudile gamba: “Ngudi guguwambela giamatshidia egi gula muthu gavualewego mu meya nu mu nyuma, gajiyilego gungina mu Ufumu wa Nzambi.
6 Yavualewe mu muila idi muila, uvi yavualewe mu nyuma idi nyuma.
7 Udihudigo handaga ngaguwambela egi: Mudi naye guvualewa luko.
8 Muhehe wana bunda khanda watshigina wene. Aye wana vua matululu enji, uvi wana jiya ndo gui udi muza nu gui udi muya. Idi luholo lumoshi nu athu avualewa mu nyuma.”
9 Nikodemo wamuhudile egi: “Luholo lutshi yajiya gukalegewa?”
10 Yesu wamuvutudile gamba: “Aye udi mulongeshi wa Isalele, uvi luholo lutshi ushigo mujiya ndaga eji?
11 Ngudi guguwambela giamatshidia egi tuana zuela ndaga tudi mujiya. Tuana zuela nji ndaga tuamonele uvi enue mushigo mutshigina ndaga tudi muzuela.
12 Ngamiwambela ndaga jia ha mavu uvi enue mushigo mutshigina, na luholo lutshi mbamutshigina gula ngamiwambela ndaga jia mu dilu?
13 Gushigo nji nga muthu wayile gale mu dilu, phamba Mun’a muthu yonu wakatugile mu dilu.
14 Gifua luholo Moize wamagesele nyoga mu mavu a luselenga, Mun’a muthu nji udi naye gumagenesewa ngenyi,
15 hagula athu agasue adi musha gutshigina gudi muene ahete monyo wa mayilago.
16 “Handaga Nzambi wazumbile athu a ha mavu* muavula, wahanele Mun’enji mumoshi ha mumoshi* hagula muthu wagasue washa gutshigina gudi muene, gafuigo uvi ahete monyo wa ivo nu ivo.
17 Handaga Nzambi gatuminego Mun’enji ha mavu ha gusophesa* athu a ha mavu. Uvi wamutumine hagula ene ahuluishiwe mu njila yenji.
18 Muthu wagasue wamonesa gutshigina gudi muene, mbagashigo musophesewa. Uvi muthu gashigo mumonesa gutshigina gudi muene, wasophesewe gale handaga muene gamoneselego gutshigina mu jina dia mona mumoshi ha mumoshi* wa Nzambi.
19 Ndaga mbaasophesela athu yenyeyi: muanya wajile ha mavu, uvi athu atshiginyile phipha ha fundo dia muanya, handaga midimo yawo yakhalele yabola.
20 Muthu udi mukalagala ndaga jiabola, udi nu umbalagaji nu muanya, nu muene gashigo muza gudi muanya hagula midimo yenji imonegago haphelo.
21 Uvi muthu udi mutshita ndaga jiabonga, wana guza gudi muanya hagula midimo yenji imonese egi yakalegewe mu gudivua nu gutshigina gua Nzambi.”
22 Gungima, Yesu nu alandudi enji ayile mu membo azonda-zonda a gu Yudea. Wakhalele nawo guene tangua diazonda nu wakhalele mubatiza athu.
23 Uvi Yone nji wakhalele mubatiza athu gu Enona hehi nu Salima, handaga meya akhalele guene avula. Athu akhalele muza tangua diagasue, wakhalele guabatiza.
24 Handaga mu tangua diene Yone wakhalele khenji gambiwa galego mu bologo.
25 Alandudi a Yone akhalele musha giphapha nu muenya Yuda mumoshi mukunda nu ndaga yatadila gudiphelegetesa.
26 Ayile gudi Yone, amuwambelele egi: “Rabi, muthu muakhalele n’enji ha sambua diko dia Muta wa Yordani, yonu aye wakhalele muzuelela, udi mubatiza athu. Athu agasue adi muya gudi muene.”
27 Yone waavutudile egi: “Muthu gajiyilego guheta gima nga gimoshi gula Nzambi gamuhuilego nagio.
28 Enue hakhenu muadividile ndaga ngazuelele egi, ‘Ame ngushigo Klisto ndo, uvi ngatumiwe gutuama dienji.’
29 Muthu udi nu mukhetu udi muzudiwa mu ulo, muene mulumi’enji. Uvi hamagana futa dienji nu hadi gumutegelela muene, wana suanguluga muavula gula wavua dijui dia yala udi muzula mukhetu mu ulo. Na gusuanguluga guami guatagana.
30 Muene udi naye gukanduga uvi ame ngudi naye gubulumuga.”
31 Muthu wakatuga mu dilu, wabalega athu agasue. Muthu wa ha mavu, udi wa ha mavu nu wana zuelela ndaga jia ha mavu. Muthu wakatuga mu dilu, wabalega athu agasue.
32 Muene udi muzuela ndaga jiavile nu jiamonele muene, uvi gushigo nga muthu udi mutshigina mbimbi jienji.
33 Muthu watshigina ndaga jiazuelele muene, udi mumonesa egi Nzambi wana zuela giamatshidia.
34 Handaga muthu watumiwe gudi Nzambi, wana zuela mbimbi jia Nzambi, handaga Nzambi wana hana athu nyuma yenji muavula.
35 Tata wana zumba Mona, wahanele ima yagasue ha mago enji.
36 Muthu udi mumonesa gutshigina gudi Mona, udi nu monyo wa mayilago. Muthu gashigo mutumagela Mona, mbagashigo muheta monyo, uvi khabu jia Nzambi mbajikhala holu dienji.
Mbimbi goshi'a diyiji
^ Nga ndo yajiya gukhala egi, “guvalewa gua mu dilu.”
^ Mu Greke: “mavu.”
^ Mu Greke: “mona mumoshi wavalewe.”
^ Nga “ha guafuisa milonga.”
^ Mu Greke: “mona mumoshi wavalewe.”
