Mukanda wa Yone 4:1-54
4 Hajiyile Fumu egi Afalese avile gamba muene* wakhalele mubuisa athu alandudi nu gubatiza athu avula gubalega Yone—,
2 ikhale Yesu muene hakhenji gakhalelego mubatiza athu, uvi alandudi enji akhalele guabatiza—,
3 wakatugile gu Yudea, wavutugile gu Galilea.
4 Uvi yakhalele mutoga egi abalegele gu Samaliya.
5 Wahetele mu dimbo dimoshi dia Samaliya diana tamegewa egi Sishale, hehi nu dihia dinyi Yakoba gahanele mun’enji Yozefe.
6 Guene guakhalele wina dia meya dia Yakoba. Yesu wahuidile handaga wakatugile gualeha, wayile mukhala hehi nu wina* diene. Yakhalele mu kumbi dia midi.*
7 Mukhetu mumoshi wa gu Samaliya wajile muthaya* meya. Yesu wamuwambelele egi: “Nguhane meya a gunua.”
8 (Alandudi enji ayile mu dimbo ha gusumba ima ya gudia.)
9 Mukhetu wa gu Samaliya wamuhudile egi: “Aye udi muenya Yuda, luholo lutshi udi gungutoga ame mukhetu wa gu Samaliya meya a gunua?” (Handaga enya Yuda anago gudivua nu enya Samaliya.)
10 Yesu wamuvutudile egi: “Nga wajiyile khapho dia Nzambi dia khenda, nu muthu udi guguwambela egi, ‘Nguhane meya a gunua,’ nga aye wamutogi meya a gunua, nga muene waguhanyi meya a monyo.”
11 Muene wamuwambelele egi: “Fumu, aye ushigo nga nu kantine ga guthayela meya, wina nji didi dialeha. Gui giwa mbawuzula meya ene a monyo?
12 Aye wabalega khakh’etu Yakoba gukoma ba? Muene watubembele wina didi, muene nu an’enji nu shitu jienji anuile meya a wina didi .”
13 Yesu wamuvutudile egi: “Muthu wagasue udi munua meya awa, mbawuvua luko luhungu.*
14 Muthu wagasue udi munua meya anyi mbangumuhana, muene mbagashigo luko muvua luhungu, uvi meya anyi mbangumuhana mbaabua mukatshi dienji gifua mudidi wa meya adi muzoga ha guhana monyo wa ivo nu ivo.”
15 Mukhetu muene wamuwambelele egi: “Fumu, nguhane meya ene hagula egi mbanguvuigo luko luhungu nu mbangulandulago luko guza ha fundo edi ha guthaya meya.”
16 Yesu wamuwambelele egi: “Nda utamege mulumi’aye, uze n’enji haha.”
17 Mukhetu muene wamuwambelele egi: “Ngushigo nu yala.” Yesu wamuvutudile egi: “Wazuela giamatshidia luholo wazuela egi, ‘Ngushigo nu yala.’
18 Handaga aye wazudile mala mutano, uvi yala udi n’enji henyaha gashigo mulumi’aye. Wazuela giamatshidia.”
19 Mukhetu muene wamuwambelele egi: “Fumu, ngudi mumona egi aye udi profete.
20 Akhakh’etu akombelele ha mulundu wuwu; uvi enue mudi muzuela egi fundo athu agasue adi naye gukombelela Nzambi didi gu Yelusalema.”
21 Yesu wamuwambelele egi: “Mukhetu, sha gutshigina gudi ame, handaga ngudi guguwambela egi tangua didi muza, enue mbamushigo mukombelela Tata ha mulundu owu nga gu Yelusalema.
22 Enue mudi mukombelela imushigo mujiya; esue tudi mukombelela itudi mujiya, handaga guhuluga gudi musendesa nu enya Yuda.
23 Uvi tangua didi muza, tangua diene dienyedi, akombeledi a giamatshidia mbaakombelela Tata mu nyuma nu mu giamatshidia, handaga Tata wana kamba athu a luholo elu ha gumukombelela.
24 Nzambi udi nyuma; athu adi gumukombelela adi naye gumukombelela mu nyuma nu mu giamatshidia.”
25 Mukhetu muene wamuwambelele egi: “Ngudi mujiya egi Masiya udi muza, yonu wana tamegewa egi Klisto. Tangua mbadiza muene, mbawutuwambela ndaga jiagasue haphelo.”
26 Yesu wamuvutudile egi: “Ame ngudi muzuela n’aye, ngudi muene.”
27 Mu tangua diene, alandudi enji ajile, adihudile luholo amumonele muta maga nu mukhetu. Uvi gushigo nga muthu mumoshi mukatshi diawo wamuhudile egi: “Itshi udi mukamba?” nga “Mukunda natshi udi muta maga nu mukhetu yowu?”
28 Gungima, mukhetu muene wabembele bungu dienji dia meya, wayile mu dimbo, wawambelele athu egi:
29 “Izenu mutale muthu mumoshi wanguwambela ndaga jiagasue ngatshitshile gale. Muthu muene wajiya gukhala Klisto ba?”
30 Athu azogele mu dimbo, ayile gudi Yesu.
31 Mu tangua diene, alandudi akhalele gumububila egi: “Rabi, dia.”
32 Uvi muene waawambelele egi: “Ngudi nu ima ya gudia inyi enue mushigo mujiya.”
33 Hene, alandudi akhalele gudihula egi: “Gudi nu muthu wamubatela ima ya gudia ba?”
34 Yesu waavutudile egi: “Ima yami ya gudia idi gukalagala gutshigina gua Tata wangutumine nu gumanesela mudimo wenji.
35 Enue mudi muzuela egi mbeji jiasala nguana ha gukatula mbuto mu mahia, ishigo ngenyi? Ngudi gumiwambela egi: Zumbulenu meso, talenu mahia. Mbuto jiakodi gale ha gukatudiwa.
36 Muthu udi mukatula mbuto wahetshi gale gishimbigo nu udi gujibungisa mukunda nu monyo wa ivo nu ivo, hagula mukunyi nu muthu udi mukatula mbuto asuanguluge hamoshi.
37 Mukunda nu ndaga eyi, mbimbi eji jidi jia giamatshidia: Muthu mumoshi wana gukuna, muthu muko wana gukatula mbuto.
38 Ngamitumine ha gukatula mbuto jinyi enue muatshitshilego mudimo wakola. Athu ako atshitshile mudimo wakola uvi enue muaheta gubonga gua mudimo wawo wakola.”
39 Enya Samaliya avula a mu dimbo dinyi, ashile gutshigina gudi Yesu mukunda nu mbimbi jiaawambelele mukhetu yonu wazuelele egi: “Muene wanguwambela ndaga jiagasue ngatshitshile gale.”
40 Tangua enya Samaliya ajile gudi muene, amutogele ha gusala nawo. Wasalele nawo guene masugu mbadi.
41 Hene, athu avula ashile gutshigina mukunda nu ndaga jiakhalele muzuela Yesu.
42 Awambelele mukhetu muene egi: “Tuashilego gutshigina mukunda nu ndaga wazuedi; handaga esue hakhetu tuadivuila ndaga jiazuedi muene nu tudi mujiya egi muthu yowu udi diago muhuluishi wa mavu.”
43 Gungima dia masugu mbadi, wakatugile ha fundo diene, wayile gu Galilea.
44 Uvi Yesu hakhenji wazuelele egi profete ganago gunemesewa mu dimbo dienji.
45 Hahetele muene gu Galilea, enya gu Galilea amuyambele, handaga amonele ndaga jiagasue jiatshitshile muene gu Yelusalema mu tangua dia wano, handaga ene nji ayile gu wano wene.
46 Gungima, wayile gu dimbo dia Kana gu Galilea, fundo diabalumuine muene meya matombe. Guakhalele nu muenya mudimo mumoshi wa fumu gu Kaphelenauma, mun’enji wakhalele mukata.
47 Tangua diavile muthu muene egi Yesu wakatuga gu Yudea ha guza gu Galilea, wayile gumumona, nu wamutogele ha guya musaga mun’enji wakhalele hehi nu gufua.
48 Uvi Yesu wamuwambelele egi: “Gula muamonelego ijiyishilo nu ndaga jia gushimana, enue muanago gutshigina nga hazonda.”
49 Muenya mudimo wa Fumu wamuwambelele egi: “Fumu, iza tuye gutuama egi mun’ami wazonda afue.”
50 Yesu wamuwambelele egi: “Vutuga gumbo diaye; mun’aye udi nu monyo.” Muthu muene watshiginyile mbimbi jiamuwambelele Yesu, wavutugile.
51 Uvi hakhalele muene muvutuga gumbo dienji, athu enji a mudimo ajile gumutagana ha gumuwambela egi mun’enji udi nu monyo.*
52 Waahudile egi tangua ditshi mona muene gavi muabonga. Ene amuvutudile egi: “Tshuya* akhadi nato gu muila tuahui hamene mu tangua dia thomo gungima dia midi.”*
53 Sh’enji wakotelesele egi yakhalele diago mu tangua dinyi Yesu wamuwambelele egi: “Mun’aye udi nu monyo.” Hene, muene nu enya fami yenji agasue ashile gutshigina gudi Yesu.
54 Yakhalele ndaga ya mbadi ya gushimana yatshitshile Yesu hakatugile muene gu Yudea ha guya gu Galilea.
Mbimbi goshi'a diyiji
^ Mu Greke: ‘Yesu.’
^ Nga “mutumbua.”
^ Yakotelesa egi, mu tangua dia samano.
^ Nga “mutaha.”
^ Nga “phuila.”
^ Nga “mun’aye wavui gale muabonga.”
^ Nga “fievre.”
^ Yakotelesa egi, “mu tangua dia sambadi.”
