Mukanda wa Yone 6:1-71
6 Gungima, Yesu wazawugile ha sambua diko dia kianga gia Galilea nga Tibeliade.
2 Uvi athu avula diago akhalele gumulandula, handaga amonele ndaga jia gushimana jiakhalele mukalagala muene luholo luakhalele muene musaga enya misongo.
3 Hene Yesu wakandugile gu mulundu, wakhalele guene hashi nu alandudi enji.
4 Uvi Wano wa Pake wa enya Yuda wasuenele hehi.
5 Tangua diazumbuile Yesu meso, wamonele athu avula muza gudi muene. Wawambelele Filipho egi: “Gui tuajiya gusumba mapha hagula athu awa adie?”
6 Uvi wakhalele muzuela ngenyi ha gumulola, handaga wakhalele mujiya ndaga jiakhalele naye muene gutshita.
7 Filipho wamuvutudile gamba: “Denye 200 jiajiyilego gusumba mapha atagana hagula muthu nu muthu ahete nga gagitshinyi gazonda.”
8 Mulandudi wenji muko, Andele, phangi’a Simona Phetelo, wamuwambelele egi:
9 “Gudi nu mona mumoshi wa yala haha udi nu mapha thano alondewe nu phupha ya orje nu jishui mbadi jiazonda. Uvi yajiya gutagana athu awa avula ba?”
10 Yesu wazuelele egi: “Wambelenu athu akhale hashi.” Fundo diene diakhalele nu muangu wavula. Hene athu akhalele hashi; akhalele mala guvula 5 000.
11 Yesu wazanguile mapha, wahanele Nzambi mersi. Gungima, waakhaphelele athu akhalele ha fundo diene. Wakalegele luholo lumoshi nu jishui jinyi jiazonda. Athu azanguile ima luholo akhalele mutshigina.
12 Uvi tangua adile nu akutshile, Yesu wawambelele alandudi enji egi: “Nonenu itshinyi yasala hagula nga gima gimoshi gizangelewago.”
13 Hene ayinonele, azalesele inda 12 nu itshinyi ya mapha yasalele gu mapha thano adile athu, anyi alondewe nu phupha ya orje.
14 Tangua athu amonele ndaga ya gushimana yakalegele Yesu, asendesele guzuela egi: “Muthu yowu udi diago Profete munu wakhalele naye guza ha mavu.”
15 Hajiyile Yesu egi athu akhalele mutshigina guza gumukuata ha gumubuisa fumu, wakatugile ha fundo diene, wayile luko gu mulundu muene hakhenji.
16 Habuile ngueze, alandudi enji abulumugile gu kianga.
17 Anginyine mu wato, asendesele guzawuga kianga ha guya gu Kaphelenauma. Yakhalele mu phipha; Yesu wakhalele khenji gaza galego ha guasanga.
18 Kianga giakhalele nu matshipha-tshipha akola handaga funji yakhalele mubunda.
19 Uvi hatshitshile ene bakilometre thano nga samano,* amonele Yesu muza nu guwenda holu dia meya, musuena hehi nu wato. Avuile woma.
20 Uvi muene waawambelele egi: “Muvuigo woma; yowu ame.”
21 Ene atshiginyile gumunginyisa mu wato; uvi mu tangua diene, wato wahetele gonze ha fundo diakhalele ene mutshigina guya.
22 Mu lusugu lualanduile, athu avula anyi asalele ha sambua diko dia kianga, amonele egi guakhalelego nu wato uko phamba unu wazonda. Akotelesele egi Yesu ganginyilego mu wato umoshi nu alandudi enji, uvi alandudi ayile ene hakhawo.
23 Mawato anyi akatugile gu Tibeliade, ahetele hehi nu fundo dinyi ene adile mapha tangua Fumu wahanele Nzambi mersi.
24 Tangua athu avula amonele egi Yesu nu alandudi enji akhalelego hene, anginyine mu mawato, ayile gu Kaphelenauma ha gukamba Yesu.
25 Tangua amusangele ha sambua diko dia kianga, amuhudile egi: “Rabi, tangua ditshi wahetshi haha?”
26 Yesu waavutudile gamba: “Ngudi gumiwambela giamatshidia egi, mushigo gungukamba mukunda nu ndaga jia gushimana muamonele. Uvi mudi gungukamba handaga muadile mapha nu muakutshile.
27 Mukalagalago mudimo mukunda nu ima ya gudia idi mubola. Uvi kalagalenu mudimo mukunda nu ima ya gudia idi musala mukunda nu monyo wa ivo nu ivo, yinyi mbayimihana Mun’a muthu; handaga Tata Nzambi hakhenji wamuhagele gale njimbu idi mumonesa egi wamutshigina.”
28 Ene amuhudile gamba: “Itshi tudi naye gutshita ha gukalagala midimo ya Nzambi?”
29 Yesu waavutudile egi: “Mudimo wa Nzambi udi egi, mushe gutshigina gudi muthu watumiwe gudi muene.”
30 Gungima, amuhudile gamba: “Itshi udi mukalagala idi gifua ndaga ya gushimana hagula esue tuyimone nu tugutshigine? Mudimo utshi udi mukalagala aye?
31 Akhakh’etu adile mana mu mavu a luselenga, gifua luholo yasonegewe egi: ‘Muene waahuile mapha akatugile mu dilu ha gudia.’”
32 Yesu waalezele gamba: “Ngudi gumiwambela giamatshidia egi Moize gamihanelego mapha akatugile mu dilu. Uvi Tata wami udi gumihana dipha dia giamatshidia diakatuga mu dilu.
33 Handaga dipha dia Nzambi didi muthu wakatuga mu dilu nu udi muhana monyo gudi athu a ha mavu.”
34 Ene amuwambelele gamba: “Fumu, khala gutuhana dipha diene tangua diagasue.”
35 Yesu waalezele egi: “Ame ngudi dipha dia monyo. Muthu udi muza gudi ame, mbagashigo muvua nzala nga hazonda. Muthu udi musha nji gutshigina gudi ame, mbagashigo muvua luhungu nga hazonda.
36 Uvi gifua luholo ngamiwambela, enue muangumona uvi mushigo mutshigina.
37 Athu agasue Tata wana gunguhana, mbaaza gudi ame. Ame mbangushigo mukaya nga hazonda muthu udi muza gudi ame;
38 handaga ame ngakatugile mu dilu ha guza mukalagala gutshigina gua Tata wami wangutumine. Uvi ngajilego ha gukalagala gutshigina guami hakhami.
39 Gutshigina gua Tata wangutumine gudi egi, ame ngutotesago nga muthu mumoshi mukatshi dia athu agasue anguhanele muene, uvi nguaafuzumune mu lusugu lua gisugishilo.
40 Handaga gutshigina gua Tata gudi egi, muthu wagasue udi mujiya Mona nu udi musha gutshigina gudi muene, ahete monyo wa ivo nu ivo. Ame mbangumufuzumuna mu lusugu lua gisugishilo.”
41 Uvi enya Yuda asendesele guzuela ndaga jiabola mukunda nu muene, handaga wazuelele egi: “Ame ngudi dipha diakatugile mu dilu.”
42 Akhalele muzuela egi: “Yowu Yesu mun’a Yozefe. Tudi mujiya sh’enji nu gin’enji, ishigo ngenyi? Henyaha luholo lutshi muene adi muzuela egi, ‘Ngakatugile mu dilu’?”
43 Yesu waavutudile egi: “Bembenu guzuela ndaga jiabola mukatshi dienu.
44 Gushigo nga muthu wajiya guza gudi ame gula Tata wangutumine gamunanelego. Ame mbangumufuzumuna mu lusugu lua gisugishilo.
45 Baprofete asonegele egi: ‘Mukut’awo agasue mbaalongesewa gudi Yehowa.’ Muthu wagasue wategelela Tata nu walonguga gudi muene, wana guza gudi ame.
46 Gushigo nga muthu mumoshi wamonele gale Tata, phamba muthu munu wakatugile gudi Nzambi; muene wamonele gale Tata.
47 Ngudi gumiwambela giamatshidia egi, muthu udi musha gutshigina, udi nu monyo wa ivo nu ivo.
48 “Ngudi dipha dia monyo.
49 Akhakh’enu adile mana mu mavu a luselenga, uvi afuile.
50 Didi dipha diakatuga mu dilu, hagula muthu wagasue adidie nu gafuigo.
51 Ame ngudi dipha dia monyo dinyi diakatugile mu dilu. Gula muthu wadia dipha edi, mbawukhala nu monyo wa ivo nu ivo. Giamatshidia, dipha mbanguhana ame, didi muila wami mukunda nu monyo wa athu agasue a ha mavu.”
52 Enya Yuda asendesele gumana mukatshi diawo; akhalele muzuela egi: “Luholo lutshi muthu owu wajiya gutuhana muila wenji hagula tuwudie?”
53 Hene Yesu waalezele gamba: “Ngudi gumiwambela giamatshidia egi, gula muadilego muila wa Mun’a muthu nu muanuilego mahatshi enji, enue mushigo nu monyo mukatshi dienu.
54 Muthu udi mudia muila wami nu udi munua mahatshi ami, udi nu monyo wa ivo nu ivo. Ame mbangumufuzumuna mu lusugu lua gisugishilo.
55 Handaga muila wami udi ima ya gudia ya giamatshidia, mahatshi ami adi ima ya gunua ya giamatshidia.
56 Muthu udi mudia muila wami nu udi munua mahatshi ami, udi musala mu gudivua nu ame, ame nji ngudi mu gudivua nu muene.
57 Luholo Tata wangutumine udi nu monyo, eme nji ngudi nu monyo mukunda nu Tata. Luholo lumoshi nji, muthu udi mudia muila wami, mbawukhala nu monyo mukunda nu eme.
58 Didi dipha diakatugile mu dilu. Ishigo gifua tangua akhakh’enu adile, uvi gungima afua. Muthu udi mudia dipha edi mbawukhala nu monyo wa ivo nu ivo.”
59 Wazuelele ndaga eji tangua diakhalele muene mulongesa mu sinagoga* gu Kaphelenauma.
60 Havile ene ndaga eji, alandudi enji avula azuelele gamba: “Mbimbi eji jidi jiakola sha; nanyi wajiya gujitshigina?”
61 Uvi Yesu hakhenji wajiyile egi alandudi enji amuvidile gubola mukunda nu mbimbi jienji. Hene, waahudile gamba: “Mbimbi eji jidi gumisagesa ba?*
62 Itshi mbamukalagala giwa gula muamona Mun’a muthu mukanduga fundo diakhalele muene thomo?
63 Gima giana hana muthu monyo gidi nyuma. Muila wakhalago nu ndando nga hazonda. Mbimbi ngamiwambela jidi nyuma, jidi nji monyo.
64 Uvi gudi nu athu ako mukatshi dienu ashigo musha gutshigina.” Handaga Yesu wajiyile sadige gu gisendeselo athu anyi akhalelego musha gutshigina nu muthu mbawumudiga.
65 Waalezele luko gamba: “Gishina giene ngamiwambelele egi, gushigo muthu wajiya guza gudi ame gula Tata gamuhanelego njila.”
66 Mukunda nu ndaga yene, alandudi enji avula avutugile mu midimo yawo abembele; akhalelego luko gumulandula.
67 Yesu wahudile apostolo enji 12 egi: “Nu enue nji, muatshigina guya genu ba?”
68 Simona Phetelo wamuvutudile egi: “Fumu, tuya gudi nanyi? Aye udi nu mbimbi jia monyo wa ivo nu ivo.
69 Esue tuatshiginyine gale nu tudi mujiya egi aye udi Muthu wa Gijila wa Nzambi.”
70 Yesu waavutudile gamba: “Ngamitombele enue kumi nu muyadi, ishigo ngenyi? Uvi mumoshi mukatshi dienu udi gifua diabulu.”*
71 Muene wakhalele muzuelela Yudasa, mun’a Simona Isakaliote, handaga muene wakhalele naye gumudiga, ikhale muene wakhalele mumoshi mukatshi dia apostolo 12.
Mbimbi goshi'a diyiji
^ Mu Greke: “ba stade 25 nga 30.”
^ Nga ndo yajiya gukhala egi, “athu avula.”
^ Mu Greke: “jidi gumikhakhuisa ba?”
^ “Mu Greke, mbimbi ‘diabulu’ idi mukotelesa egi muthu wana bolesa lukuma lua athu ako.”
