Mukanda wa Yone 7:1-52
7 Gungima, Yesu walanduile guwenda mu Galilea. Gakhalelego mutshigina guwenda mu Yudea handaga enya Yuda akhalele mukamba gumushiya.
2 Uvi Wano wa Isasa wa enya Yuda wasuenele hehi.
3 Hene aphangi’enji amuwambelele egi: “Katuga haha, nda gu Yudea, hagula alandudi aye amone nji midimo udi mukalagala.
4 Handaga gula muthu udi mukamba egi ajiyiwe, ganago gutshita ndaga mu gisuegi. Gula aye udi mukalagala ndaga eji, dimonese gudi athu agasue.”
5 Giamatshidia, aphangi’enji akhalelego musha gutshigina gudi muene.
6 Hene Yesu waavutudile gamba: “Kumbi diami khenji ditagana galego, uvi kumbi dienu didi guene masugu agasue.
7 Athu a ha mavu awa ashigo nu gishina gia gukhala n’enu umbalagaji. Uvi adi nu umbalagaji nu ame handaga ngudi mulongesa egi midimo yawo idi yabola.
8 Enue kandugenu gu wano; ame ngushigo mukanduga gu wano wene handaga tangua diami khenji ditagana galego diago.”
9 Gungima dia guaawambela ndaga eji, wasalele gu Galilea.
10 Uvi hakandugile aphangi’enji gu wano, muene nji wakandugile guene. Uvi wayile mu gisuegi, gatshiginyilego egi athu amumone.
11 Enya Yuda akhalele gumukamba gu wano wene. Akhalele muzuela egi: “Muthu muene udi gui?”
12 Athu avula akhalele muzuela hashi-hashi mukunda nu muene. Ako akhalele muzuela egi: “Udi muthu wabonga.” Uvi ako egi: “Ndo, muene udi muhuiga athu.”
13 Uvi gushigo nga muthu wakhalele muzuela ndaga jienji haphelo, handaga akhalele muvuila enya Yuda woma.
14 Tangua wano wahetele hakatshi na katshi, Yesu wanginyine mu tempelo, wasendesele gulongesa.
15 Enya Yuda akhalele gudihula muavula egi: “Luholo lutshi muthu yowu adi mujiya Mukanda wa Nzambi* uvi muene ganginyinego makhalasa?”*
16 Yesu waavutudile egi: “Ndaga ngudi mulongesa jishigo jiami, uvi jidi jia Tata wangutumine.
17 Gula muthu wasuanguluga gukalagala gutshigina guenji, mbawujiya gula ndaga ngudi mulongesa jidi muza gudi Nzambi, nga ndo ngudi muzuela ndaga jiami hakhami.
18 Muthu udi muzuela ndaga jienji hakhenji, udi mukamba lutumbu luenji. Uvi muthu udi mukamba lutumbu lua muthu wamutumine, muene udi muzuela giamatshidia; gushigo nga ndaga imoshi yabola gudi muene.
19 Moize wamihuile Mikhuala, ishigo ngenyi? Uvi gushigo nga muthu mumoshi mukatshi dienu wana guyitumagela. Na mukunda natshi mudi mukamba gungushiya giwa?”
20 Athu ene amuvutudile gamba: “Aye na udi nu demo. Nanyi udi mukamba gugushiya?”
21 Yesu waavutudile egi: “Ngakalagala phamba ndaga imoshi, uvi mukut’enu agasue muashimana.
22 Gishina giene Moize wamihanele mukhuala wa gumba athu gu mukanda—uvi wakatugilego gudi Moize, udi mukhuala wa akhakh’enu—mudi mumba athu gu mukanda mu lusugu lua guhululuga.
23 Gula muthu wambiwa gu mukanda mu lusugu lua guhululuga, yanago gushiya Mukhuala wa Moize. Na mukunda natshi muanguvuila khabu jiabala luholo ngasaga muthu mu lusugu lua guhululuga?
24 Bembenu gusophesa athu gu ndaga jidi mumuenega gu meso, uvi sophesenu nu usopheshi watagana.”
25 Athu ako a gu Yelusalema asendesele guzuela egi: “Muthu owu muene udi mukambewa hagula ashiyiwe, ishigo ngenyi?
26 Uvi tala! muene udi muzuela ha meso a athu agasue, uvi ene ashigo gumuwambela nga gima. Na mafumu atshigina gawo egi muene udi Klisto ba?
27 Esue tudi mujiya fundo diakatuga muthu yowu. Uvi tangua mbadiza Klisto, gushigo nga muthu mbawujiya fundo diakatuga muene.”
28 Hakhalele Yesu mulongesa mu tempelo, wazuelele mangololo egi: “Enue mudi gungujiya nu mudi mujiya guma ngakatugile. Ame ngadijidilego hakhami, uvi yago wangutumine udi wa giamatshidia; uvi enue mushigo gumujiya.
29 Ame ngamujiya handaga ngudi mumoneshi wenji; muene nji wangutumine.”
30 Asendesele gukamba ha gumukuata. Uvi nga muthu mumoshi gamukuatelego, handaga tangua dienji diakhalele khenji ditagana galego.
31 Uvi athu avula ashile gutshigina gudi muene. Akhalele muzuela egi: “Tangua mbadiza Klisto, mbagashigo mukalagala ndaga jiavula jia gushimana gubalega jiakalagala muthu owu, ishigo ngenyi?”
32 Afalese avile athu avula muzuela ndaga eji hashi-hashi mukunda nu Yesu. Hene, mafumu a nganga-nzambi nu Afalese, atumine maphulushi ha gumukuata.
33 Yesu wazuelele egi: “Ngudi n’enu luko matangua azonda uu nu tangua mbanguya gudi Muthu wangutumine.
34 Enue mbamungukamba, uvi mbamushigo gungumona. Guma mbanguya, enue muajiyilego guza.”
35 Hene, enya Yuda adihudile egi: “Muthu yowu udi mutshigina guya gui hagula esue tumumonyigo? Muene udi mutshigina guya gudi enya Yuda amuanganele mukatshi dia enya Greke ha gulongesa enya Greke ba?
36 Itshi adi mutshigina diago guzuela hadi muzuela muene egi, ‘Enue mbamungukamba, uvi mbamushigo gungumona? Guma mbanguya enue muajiyilego guza’?”
37 Mu lusugu lua gisugishilo, lusugu luakoma lua wano, Yesu wazugile mu molu, wazuelele mu dijui diakola egi: “Muthu udi nu luhungu,* aze gudi ame anue meya.
38 Gifua muazuelele mukanda wa Nzambi, muthu washa gutshigina gudi ame: ‘Mita ya meya a monyo mbayizoga mukatshi dienji.’”
39 Uvi Yesu wakhalele muzuela ndaga eji mukunda nu nyuma, inyi yakhalele naye guheta athu akhalele musha gutshigina gudi muene. Mu tangua diene, nyuma yakhalelego guene handaga Yesu wakhalele khenji gatumbuishiwa galego.
40 Athu ako mukatshi dia thundu ya athu, avile mbimbi jiazuelele Yesu. Hene, asendesele guzuela egi: “Muthu owu udi diago Profete.”
41 Ako akhalele muzuela egi: “Muthu owu udi Klisto.” Uvi ako egi: “Klisto wajiya guzoga mu Galilea ba?
42 Mukanda wa Nzambi ushigo muzuela egi Klisto mbawukhala mujigulu wa Davidi, nu mbawuzoga gu Beteleheme dimbo diakhalele Davidi ba?”
43 Hene, athu adikhaphumuine mukunda nu Yesu.
44 Athu ako mukatshi diawo akambele gumukuata. Uvi nga muthu mumoshi gamukuatelego.
45 Maphulushi avutugile gudi mafumu a nganga-nzambi nu Afalese. Ene a ahudile gamba: “Mukunda natshi muajilego n’enji?”
46 Maphulushi a avutudile egi: “Khenji tuavile galego muthu muzuela luholo elu.”
47 Afalese a awambelele gamba: “Nu enue nji, wamihuiga genu ba?
48 Gushigo nga fumu mumoshi nga Mufalese mumoshi washile gutshigina gudi muene, ishigo ngenyi?
49 Uvi athu awa, ashigo mujiya Mukhuala, adi athu atewe mukumbu.”
50 Nikodemo, yago wadiangele guya mutala Yesu, wakhalele nji mukatshi dia Afalese ene. Waalezele egi:
51 “Mukhuala wetu wanago gufuisa muthu milonga gula thomo amusopheselego ha gujiya ndaga yakalagala muene, ishigo ngenyi?”
52 Ene amuvutudile egi: “Aye nji udi muenya gu Galilea ba? Kamba muabonga mu mukanda wa Nzambi, mbawumona egi gushigo nga profete mumoshi mbawuzoga mu Galilea.”*
Mbimbi goshi'a diyiji
^ Mu Greke: “isona.”
^ Yakotelesa egi, makhalasa a ba Rabi.
^ Nga “phuila.”
^ Bamaniskri avula a mualeha anyi athu ana gushila mutshima, akhalago nu verse 53 uu nu mukhapho 8 verse 1 uu nu 11.
