Mukanda wa Yone 8:12-59
8 12 Gungima Yesu waawambelele luko egi: “Ame ngudi muanya wa ha mavu. Muthu wangulandula, mbagashigo muwenda nga hazonda mu phipha, uvi mbawuheta muanya udi muhana monyo.”
13 Afalese amuwambelele egi: “Aye udi muzuela ndaga jia gutadila aye; mbimbi jiaye jishigo jia giamatshidia.”
14 Yesu waavutudile egi: “Ikhale ngudi muzuela ndaga jiangutadila ame, mbimbi jiami jidi jia giamatshidia handaga ame ngudi mujiya fundo ngakatugile nu fundo ngudi muya. Uvi enue mushigo mujiya gui ngakatugile nu gui ngudi muya.
15 Enue muana sophesa athu ha gutadila ndaga mudi mumona gu meso.* Ame ngushigo musophesa nga muthu mumoshi.
16 Uvi gula ame ngasophesa, usopheshi wami udi wa giamatshidia handaga ngushigo hakhami, uvi ngudi nu Tata wangutumine.
17 Idi yagusonega nji mu mikhuala yenu egi: ‘Uthemua wa athu mbadi udi wa giamatshidia.’
18 Ngudi muzuela ndaga jiangutadila. Tata wangutumine udi muzuela nji mukunda nu ame.”
19 Ene amuwambelele egi: “Sh’aye udi gui?” Yesu waavutudile egi: “Enue mushigo gungujiya ame, mushigo mujiya nji Tata. Nga muangujiyile, nga muajiyile nji Tata.”
20 Wazuelele mbimbi eji hakhalele muene mulongesa mu tempelo ha mushete wa umonyi. Uvi nga muthu mumoshi gamukuatelego, handaga kumbi dienji diakhalele khenji ditagana galego.
21 Waawambelele luko egi: “Ame ngudi muya gami, mbamungukamba, uvi mbamufua mu gubola guenu. Fundo ngudi muya, enue muajiyilego guza.”
22 Enya Yuda asendesele guzuela egi: “Uya gudishiya ba? Handaga udi muzuela egi, ‘Fundo ngudi muya, enue muajiyilego guza.’”
23 Muene waawambelele luko egi: “Enue mudi athu a hashi, uvi ame ngudi muthu wa gosa. Enue mudi athu a ha mavu awa, uvi ame ngushigo muthu wa ha mavu awa.
24 Gishina giene ngamiwambela egi: Mbamufua mu gubola guenu. Handaga gula muatshiginyilego egi ame ngudi muthu wakhalele naye guza, enue mbamufua mu gubola guenu.”
25 Ene amuhudile egi: “Aye na udi nanyi?” Yesu waavutudile egi: “Yene thomo gishina gitshi ngudi muzuelela n’enu?
26 Ngudi nu ndaga jiavula jia guzuela mukunda nu enue nu mukunda nu gusophesa. Yadiago, muthu wangutumine udi wa giamatshidia. Ndaga ngavile gudi muene, jiene ngudi muzuela ha mavu.”
27 Ene akoteleselego egi wakhalele guaawambela ndaga jiatadila Tata.
28 Gungima Yesu waawambelele egi: “Tangua mbamumagenesa Mun’a muthu ha mutshi, enue mbamujiya egi ame ngudi muene, mbamukotelesa nji egi ngana tshita ndo nga gima gimoshi mu gutshigina guami. Uvi ngana zuela ndaga gifua luholo luangulongesele Tata.
29 Muthu wangutumine udi nu ame; muene gangubembelego ame hakhami, handaga tangua diagasue ngana kalagala ndaga jiana gumusuanguluisa.”
30 Hakhalele muene muzuela ndaga eji, athu avula ashile gutshigina gudi muene.
31 Yesu wawambelele luko enya Yuda anyi ashile gutshigina gudi muene egi: “Gula muasala agujinginyina gu mbimbi jiami, mudi diago alandudi ami,
32 mbamujiya giamatshidia, giamatshidia mbagimikatula mu uhiga.”
33 Ene amuvutudile egi: “Esue tudi ajigulu a Abalahama, khenji tuabuile galego ahiga nga a muthu mumoshi. Na luholo lutshi aye udi muzuela egi, ‘Mbamukatuga mu uhiga’?”
34 Yesu waavutudile egi: “Ngudi gumiwambela giamatshidia egi, muthu wagasue udi mutshita gubola, udi muhiga wa gubola.
35 Muhiga gana sala ndo gumbo dia fumi’enji mayilago; uvi mun’a fumu wana sala mayilago.
36 Hene, gula Mona wamikatula mu uhiga, mbamushigo mukhala luko ahiga.
37 Ngudi mujiya egi mudi ajigulu a Abalahama. Uvi enue mudi mukamba ha gungushiya, handaga mbimbi yami ishigo musanga fundo mu mitshima yenu.
38 Ame ngudi muzuela ndaga ngavile tangua ngakhalele nu Tata. Uvi enue mudi mukalagala ndaga muavile gudi sh’enu.”
39 Ene amuvutudile egi: “Tata wetu Abalahama.” Yesu waawambelele egi: “Gula nga mudi ana a Abalahama, nga mudi mutshita midimo ya Abalahama.
40 Uvi enue mudi mukamba gungushiya, ame ngudi gumiwambela giamatshidia ngavile gudi Nzambi. Abalahama gatshitshilego ngenyi.
41 Enue mudi mutshita midimo ya sh’enu.” Ene amuvutudile egi: “Esue tuavualewego mu uthambi;* tudi nu Tata phamba mumoshi, Nzambi.”
42 Yesu waawambelele egi: “Gula nga Nzambi udi Sh’enu, nga muanguzumbile, handaga ame ngakatugile gudi Nzambi hene ngudi haha. Ngajilego mu gutshigina guami, uvi muene wangutumine.
43 Mukunda natshi mushigo mukotelesa ndaga ngudi muzuela? Handaga enue muajiyilego gutegelela mbimbi yami.
44 Enue muakatuga gudi sh’enu Diabulu; mudi mutshigina gukalagala nzala jia sh’enu. Gu gisendeselo* muene wakhalele mushiyi, gakhalelego wagujinginyina mu giamatshidia handaga giamatshidia giakhalago mukatshi dienji. Tangua diana mba muene mambo, wana zuela ndaga gifua mudi gutshigina guenji, handaga muene udi muenya mambo nu sha mambo.
45 Uvi ame ngudi gumiwambela giamatshidia, enue mushigo mutshigina.
46 Nanyi mukatshi dienu wajiya gunguwambela egi ngudi muenya gubola? Gula ngudi gumiwambela giamatshidia, na mukunda natshi mushigo mutshigina?
47 Muthu wakatugile gudi Nzambi, wana vua mbimbi jia Nzambi. Uvi enue mushigo mutegelela mbimbi jia Nzambi, handaga muakatugilego gudi Nzambi.”
48 Enya Yuda amuvutudile egi: “Na tuabinga getu luholo tuazuedi egi, ‘Aye udi muenya Samaliya nu udi nu demo’?”
49 Yesu waavutudile gamba: “Ngushigo nu demo, uvi ngudi munemesa Tata, enue mushigo gungunemesa.
50 Uvi ame ngana kamba ndo lutumbu luami hakhami; Nzambi wana tshigina egi ame ngutumbuishiwe, muene wana sophesa.
51 Ngudi gumiwambela giamatshidia egi, muthu wagasue watumagela mbimbi yami, mbagashigo mufua nga hazonda.”
52 Enya Yuda amuwambelele egi: “Henyaha na tuajiya giwa egi udi nu demo. Abalahama wafuile, baprofete nji afuile. Uvi aye udi muzuela egi, ‘Muthu wagasue watumagela mbimbi yami, mbagashigo mufua nga hazonda.’
53 Aye udi wakoma gubalega khakh’etu Abalahama yonu wafuile ba? Baprofete nji afile. Aye na udi mutangiza egi udi nanyi?”
54 Yesu waawambelele egi: “Gula ngudi guditumbuisa hakhami, lutumbu luami ludi lua githuhu. Uvi Tata wami, yago mudi muzuela egi Nzambi wenu muene udi gungutumbuisa.
55 Enue mushigo gumujiya, uvi ame ngudi gumujiya. Gula ngazuela nji egi ngushigo gumujiya, ngudi mubua muenya mambo gifua enue. Uvi ngudi gumujiya muabonga nu ngana tumagela mbimbi yenji.
56 Khakh’enu Abalahama wasuangulugile muavula ha gumona lusugu luami. Walumonele nu wasuangulugile.”
57 Gungima, enya Yuda amuwambelele egi: “Aye khenji utaganesa galego ivo 50, na luholo lutshi wamonele Abalahama?”
58 Yesu waawambelele egi: “Ngudi gumiwambela giamatshidia egi, gutuama egi Abalahama avualewe, ame ngakhalele guene.”
59 Hene anonele maseso ha gumusonona; uvi Yesu wadisuegele nu wazogele mu tempelo.
Mbimbi goshi'a diyiji
^ Nga “mu gudivua nu mikhuala ya athu.”
^ Nga “ndaga jia musonyi.” Mu Greke, porneya. Tala Ukoteleshi wa Mbimbi.
^ Nga “hasendesele muene.”
