Mukanda wa Yone 9:1-41
9 Tangua diakhalele muene mubalega, wamonele muthu mumoshi wavualewe gifofo.
2 Mulandudi wenji mumoshi wamuhudile egi: “Rabi, nanyi watshitshile gubola hagula muthu yowu avualewe gifofo? Muene nga mvuaji jienji?”
3 Yesu wamuvutudile egi: “Ishigo muene nga mvuaji jienji jiakalegele gubola; uvi yakalegewe ngenyi hagula midimo ya Nzambi imonege haphelo gudi muene.
4 Tudi naye gutshita midimo ya Muthu wangutumine tangua muanya udi guene; handaga phipha idi muza, gushigo nga muthu wajiya gutshita mudimo.
5 Tangua ngudi ha mavu, ngudi muanya wa ha mavu.”
6 Gungima dia guzuela ndaga eji, wafitshile mate hashi, waafutuile nu mavu, gungima wakungile muthu muene gu meso.
7 Wamuwambelele egi: “Nda uzue meya mu gijiba gia* Siloe” (yakotelesa egi “Watumiwa”). Muthu muene wayile, wazuile meya, wasendesele gumona.
8 Gungima, athu akhalele n’enji hehi nu athu akhalele gumumona thomo mutoga ima, asendesele gudihula egi: “Muthu yowu muene wakhalele mu njila mutoga ima, ishigo ngenyi?”
9 Athu ako akhalele muzuela egi: “Muene.” Uvi ako egi: “Ndo, muthu wamufuana.” Uvi muene wakhalele muzuela egi: “Ame.”
10 Hene, amuhudile egi: “Luholo lutshi meso aye akanguga?”
11 Muene waavutudile egi: “Muthu munu wana tamegewa egi Yesu wafutula mate nu mavu, wangukunga gu meso, wanguwambela egi, ‘Nda uzue meya gu Siloe.’ Ngayi, ngazua meya hene ngamona.”
12 Gungima ene amuhudile egi: “Muthu muene udi gui?” Muene wazuelele egi: “Ngushigo mujiya.”
13 Ayile nu muthu yonu wakhalele thomo gifofo gudi Afalese.
14 Uvi lusugu luafutuile Yesu mate nu mavu ha gukangula meso a muthu muene, luakhalele Lusugu lua Guhuluguga.
15 Afalese nji asendesele guhula muthu muene luholo meso enji amonele. Waawambelele egi: “Wafutula mavu nu mate wangukunga gu meso, ngazua meya, hene ngamona.”
16 Afalese ako asendesele guzuela egi: “Muthu yowu gakatugilego gudi Nzambi, handaga gashigo munemesa Lusugu lua Guhuluguga.” Ako akhalele muzuela egi: “Luholo lutshi muenya gubola wajiya gukalagala ndaga jia gushimana jia luholo elu?” Hene adikhaphumuine mukatshi diawo.
17 Ahudile luko gifofo egi: “Itshi udi muzuela mukunda nu muene luholo gakangula meso aye?” Waavutudile egi: “Muene udi profete.”
18 Uvi enya Yuda akhalelego mutshigina egi muthu muene wakhalele thomo gifofo uvi henyaha udi mumona. Hene atamegele mvuaji jia muthu muene wakangudiwe meso.
19 A ahudile egi: “Yowu mun’enu muana zuela egi wavualewe gifofo? Henyaha na luholo lutshi gadi mumona?”
20 Mvuaji jienji jiazuelele egi: “Tudi mujiya egi yowu mun’etu. Tudi nji mujiya egi wavalewe gifofo.
21 Uvi luholo luasendesa muene gumona, tushigo mujiya; tushigo mujiya nji muthu wamukangula meso. Muhulenu hakhenu, muene udi muthu wagukula. Udi naye gudizuelela hakhenji.”
22 Mvuaji jienji jiazuelele ngenyi handaga akhalele muvua woma wa enya Yuda; handaga enya Yuda akhalele adivui gale egi gula muthu watshigina egi Yesu udi Klisto, adi naye gumukaya mu sinagoga.
23 Gishina giene mvuaji jienji jiazuelele egi: “Udi muthu wagukula, muhulenu hakhenu.”
24 Atamegele luko gifofo, amuwambelele egi: “Tumbuisa Nzambi; tudi mujiya egi muthu yowu udi muenya gubola.”
25 Muene waavutudile egi: “Ngushigo mujiya gula udi muenya gubola. Uvi ndaga imoshi ngudi mujiya idi egi, ngakhalele gifofo uvi henyaha ngudi mumona.”
26 Gungima amuhudile egi: “Ndaga itshi yagukalagala muene? Luholo lutshi luagukangula muene meso?”
27 Muene waavutudile egi: “Ngamiwambela gale naye, uvi enue mushigo muvua. Mukunda natshi mudi mutshigina guyivua luko? Enue nji mudi mutshigina gubua alandudi enji ba?”
28 Ene amuseguluile egi: “Aye udi mulandudi wa muthu yonu, uvi esue tudi alandudi a Moize.
29 Tudi mujiya egi Nzambi wazuelele nu Moize, uvi muthu yowu, tushigo mujiya gula wakatuga gui.”
30 Muthu muene waavutudile egi: “Idi diago ndaga ya gudihula gula mushigo mujiya fundo diakatugile muthu yowu. Uvi muene wangukangula meso.
31 Tudi mujiya egi Nzambi gana tegelelago enya gubola. Uvi gula muthu udi muvuila Nzambi woma nu udi mukalagala gutshigina guenji, muene wana gumutegelela.
32 Sendese mualeha, khenji tuavile galego egi muthu wakangula meso a muthu wavualewe gifofo.
33 Gula muthu yowu gajilego gudi Nzambi, muene gajiyilego gutshita nga ndaga imoshi.”
34 Ene amuwambelele egi: “Aye diago wavualewe mu gubola, udi mutshigina gutulongesa esue?” Hene, amubishidile hanze!
35 Yesu wavile egi muthu muene wabishidiwe hanze. Hamumonele muene, wamuhudile egi: “Aye udi musha gutshigina gudi Mun’a muthu ba?”
36 Muthu muene wamuhudile egi: “Fumu, muene udi nanyi hagula ame ngushe gutshigina gudi muene?”
37 Yesu wamuwambelele egi: “Wamumonyi gale, muene udi muzuela naye.”
38 Muthu muene wazuelele egi: “Fumu, ngudi musha gutshigina gudi muene.” Wafugamene gutuama dienji.
39 Gungima Yesu wazuelele egi: “Ngajile ha mavu ha gusophesa athu gu ndaga eyi: hagula athu ashigo mumona amone, anyi adi mumona abue ifofo.”
40 Afalese anyi akhalele n’enji avile ndaga eji, amuhudile egi: “Aye watumona tudi ifofo ba?”
41 Yesu waawambelele egi: “Gula nga mudi ifofo, nga mushigo nu gubola ndo. Uvi luholo mudi muzuela egi, ‘Esue tudi mumona,’ na gubola guenu mbagushigo mutotesewa.”
Mbimbi goshi'a diyiji
^ Nga “pisine ya.”
