Mukanda wa Yuda 1:1-25
1 Ame Yuda, muhiga wa Yesu Klisto, phangi’a Yakoba, ngudi musonegela athu atamegewe, ana zumbiwa gudi Tata Nzambi nu abambewe mukunda nu Yesu Klisto.
2 Ngudi mukombelela egi khenda jidivudise mukatshi dienu nu guhuima nu guzumba.
3 Aphangi’ami ngana zumba, ngatshitshi yagasue ha gumisonegela mukunda nu felela dia guhuluga tuana khala nadio, ngamonyi egi idi nu ndando ha gumisonegela, hagula ngumitemese mulue ita yakola mukunda nu gutshigina gunu guahanewe athu a gijila mbala imoshi.
4 Ngudi gumisonegela handaga athu ako adinginyisa gale mu gisuegi mukatshi dienu, anyi Mbimbi ya Nzambi yadiangele gujiyisa usopheshi wawo. Athu ene adi musegulula Nzambi nu adi mubuisa khenda jiavula jia Nzambi wetu gifua luendu ha gukalagala ndaga jia musonyi,* adi muzuela ndaga jiabola mukunda nu Fumu wetu mumoshi ha mumoshi Yesu.
5 Ngudi gumiwunguluisa ndaga eji ngatshima mudi gujijiya muabonga. Yehowa wahuluishile athu enji mu gifutshi gia Ejipitu, uvi gungima washiyile athu anyi akhalelego nu gutshigina.
6 Gu khanda iko, anjelo anyi abembele mudimo wawo fundo akhalele mu dilu, Nzambi waabambele agujitshiga mu malenge a ivo nu ivo mu phipha yakola mukunda nu usopheshi wa lusugu luakoma.
7 Luholo lumoshi nji Sodoma nu Gomola nu membo a hehi adihanele ha gukalagala uthambi* nu gutagenesa nzala jia muila mu luholo luabola, hene ahetele ndola ya tshuya tua mayilago. Adi gifezegeselo gidi gututemesa.
8 Uvi athu awa nji ana tangiza ndaga jiabola* tangua diagasue, ana bolesa muila nu ndaga jia usala, ana segulula mafumu nu ana zuela ndaga jiabola mukunda nu athu a lutumbu.
9 Uvi tangua Mikaele fumu ya anjelo wakhalele mumana nu Diabulu mukunda nu ndaga yatadila muila wa Moize, gamusopheselego nu gamuwambelelego mbimbi jia mashingo, uvi wazuelele egi: “Yehowa agubalele.”
10 Uvi athu awa adi musegulula ndaga jiagasue jinyi ashigo mukotelesa, ndaga jiagasue jinyi jidi mukotelesa ene gifua shitu jishigo nu gutema, jidi mulandula guabolesa tangua adi gujitshita.
11 Lamba diawo handaga adi mulandula gifezegeselo gia Gayino, adinginyishile gale muphushi mu njila yabola ya Balama ha guheta gishimbigo. Ene afile gale handaga azuelele ndaga jiana tuma athu ha gulumbuga gifua muatshitshile Kora!
12 Athu awa muana khala nawo tangua muana kalagala mawano ha gumonesa guzumba gudi aphangi. Uvi adi gifua maseso adi agudisuega goshi’a meya; ene adi abambi a imeme anyi adi mudia woma guvua ndo, adi matuta anyi ashigo nu meya adi muhungumuga gu funji khanda nu khanda; adi gifua mitshi ishigo muhaga mabundu mu sungi idi naye guhaga mabundu, yafile gale mbala jiyadi* nu yavumbudiwe gale.
13 Adi gifua matshipha-tshipha akola a mu kianga adi muthuphula musonyi wawo gifua mafulo-fulo holu dia muta. Adi gifua themua jishigo nu njila ya gulandula. Nzambi waahagele gale mu phipha yabalega gubuita fundo mbaakhala ivo nu ivo.
14 Henoke, muthu wa sambadi sendese gudi Adama, wazuelele nji profesi yatadila athu awa hazuelele muene egi: “Talenu! Yehowa waji gale nu anjelo enji a ngolo inunu nu inunu
15 ha gusophesa athu agasue nu ha gumonesa gubola gua athu agasue ashigo munemesa Nzambi mukunda nu ndaga jiawo jiabola akalegele, nu mukunda nu ndaga jiagasue jia musonyi jinyi enya gubola anyi ashigo munemesa Nzambi azuelele mukunda nu muene.”
16 Athu awa ana boguta, ana suanguluga ndo nu ndaga jia monyo wawo, ana landula nzala jiawo jia muila nu ana zuela ndaga jiakoma ha gudisunzula. Ana lepha athu ako ha guheta ima.
17 Uvi enue aphangi’ami ngana zumba, khalenu muwunguluga mbimbi jiazuelele* apostolo a Fumu wetu Yesu Klisto sendese mualeha
18 tangua amiwambelele egi: “Mu masugu a gisugishilo enya gulela mbaazoga, ene mbaakhala mukamba ha gutagenesa nzala jiawo jia ima ishigo munemesa Nzambi.”
19 Adi athu ana bata ukhaphumunyi, adi nu makalegelo gifua a shitu nu ana tuamezewa ndo mu nyuma ya Nzambi.
20 Uvi enue aphangi ami ngana zumba, dikolesenu mu njila ya gutshigina guenu gua gijila, kombelelenu mu utuameji wa nyuma ya Nzambi,
21 hagula mukhale mu guzumba gua Nzambi tangua mudi munengena khenda jia Fumu wetu Yesu Klisto jinyi jiana bata gu monyo wa mayilago.
22 Landulenu nji guvua khenda mukunda nu athu anyi adi nu iphapha;
23 akatulenu ha tshuya ha guahuluisa. Landulenu guvila athu ako khenda, itshitenu nu woma, tunenu milele yabuishiwe ya usala mu midimo yabola.*
24 Nzambi udi nu ngolo jia gumibamba hagula mubuigo mu gubola nu mukhale ya gumagana, mukhadigo nga nu ditona dimoshi, mukhale nu gusuanguluga guavula gutuama dia lutumbu luenji,
25 Nzambi mumoshi ha mumoshi watuhuluishile mu njila ya Fumu wetu Yesu Klisto, atumbuishiwe, uhinyinyi wenji nu ufumu wenji nu ngolo jienji jikhale mayilago sendese mualeha nu mangino uu ivo nu ivo. Amen.
Mbimbi goshi'a diyiji
^ Mu Greke: “aselgeya.” Tala Ukoteleshi wa Mbimbi.
^ Tala Ukoteleshi wa Mbimbi.
^ Nga “nzoji.”
^ Nga “afile gale diago.”
^ Nga “ndaga adiangele guzuela.”
^ Mu Greke: “midimo ya muila.”
