Tangua tudi mu mudimo wa gulongesa Mbimbi ya Nzambi, gula tuasanga mona, tudi naye gumuwambela egi tudi nu funu ya guta maga nu mvuaji jienji. Ngenyi, mbatumonesa egi tudi munemesa ufumu wa mvuaji jienji. (Ish 6:20) Gula mona watuwambela egi tungine, tudi naye gutuna. Gula mvuaji jienji jishigo nu tangua ndo, tudi naye guvutuga mu tangua diko.

Gula mona muene udi gale wagukula, nga udi nu ivo 15 uu nu 19, yajiya gukhala muabonga egi tutoge njila gudi mvuaji jienji. Gula mvuaji jishigo nu tangua, tuajiya guatoga egi gula atshigina tuhane mun’awo mikanda ya gutanga. Gula mvuaji jienji jiatshigina, tuajiya gumuhana mukanda nga gumuleza site Internet yetu jw.org.

Tangua tudi muvutugila mona wasuangulugile nu giamatshidia, tudi naye gumutoga egi tumone mvuaji jienji. Gukalagala ngenyi mbagutuhana njila ya gualeza mukunda natshi tueji mutala mun’awo, enji tuajiya gualeza longo dimoshi diabonga dia Biblia didi mutalela fami. (Ngi 119:86, 138) Gunemesa mvuaji mbagutuma athu haguzuela ndaga jiabonga mukunda nu esue, enji guajiya gutuhana njila ya gulongesa athu ako a mu fami yene lukuma lua bonga.​—1 Phet 2:12.