Athu avula ana zuelela diago muavula ndaga yatadila gisugushilo gia mavu. Ana tangiza egi mavu agasue mbaashiyiwa, nu athu nu ima yagasue tangua aksida amoshi mbaakalegewa ha mavu agasue. Athu avula ana tangiza ngenyi tangua ana tanga mene gifua eji:

•   “Ita yakola mbayizoga ha mavu. Yajiya gukhala egi athu mbaayizola, nga aksida nga ndo yajiya guzoga handaga athu ashigo gudivua muabonga.”​—Bulletin of the Atomic Scientists.

•   “Mu ivo kumi yabalega, mvula yakola yanogele, Ishitu yavula yahile tshuya, gishiyo giakola giakhalele mu mafundo avula nu giashiphile nji, shitu jia mu muta jiavula jiafile, sungi ya muanya wakola yakhalele, meya azalele ha fundo athu ana khala.”​—National Geographic.

•   “Matulu anyi ana bolesa ima, akhalele avula mu Afrique gubalega ivo iko.”​—The Associated Press.

 Mavu ajiya gufua mu masugu adi muza gula ndaga eji tuatanga jialandula gukalegewa ba? Ndaga itshi Biblia yana zuela?

 Ndo. Mbimbi ya Nzambi yana gututshiginyisa egi mavu mbaakhala ivo nu ivo. (Mulongeshi 1:4) Nzambi mbagashigo mushiya mavu afugile muene, uvi “[mbawushiya] athu adi mubolesa mavu.”​—Gumonesa 11:18.

 Mu Biblia, gisugishilo gia “mavu”, giana kotelesa gushiyiwa gua athu anyi ashigo munemesa Nzambi nu adi mutshita ndaga jiabola. Gifua luholo Nzambi wakalegele mu masugu a Nowa, gu gisugishilo gia mavu, Nzambi mbawushiya ‘athu ashigo gumunemesa.’​—2 Phetelo 2:5; 3:7.

 Mukanda wa 1 Yone 2:17 wana zuela egi: “Mavu awa adi mubalega nu nzala jienji jidi nji mubalega.” Verse eyi idi mumonesa egi Nzambi mbagashigo mushiya mavu, uvi mbawushiya athu anyi ana landula gukalagala ndaga jiabola.

 Biblia yana gutuwambela ndo tangua gisugishilo mbagiza. (Matayo 24:36) Uvi, yana gutumonesa egi gisugishilo giene giasuena. Biblia yadiangele guzuelela ndaga jiji:

•   Ndaga gifua ita, nzala yakola, misongo ya gisambugila, nu gudigita gua mavu mbajikhala “khanda nu khanda.”​—Matayo 24:3, 7, 14; Luka 21:10, 11; Gumonesa 6:1-8.

•   Athu avula mbaakamba phamba gubonga guawo. Ha gufezegesa, Biblia yazuelele egi, athu “mbaakhala muzumba makuta,” “mbaakhadigo muhana mersi,” nu “mbaakhadigo gudikanda.”​—2 Timote 3:1-5.

 Athu avula ana tshigina diago egi, sendese mu givo 1914, ndaga jiadiangele guzuela Biblia jiasendesele gale gutagenesewa; idi mumonesa egi gisugishilo giasuena. Ha gujiya ndaga jiavula, tala longo “Que révèle la chronologie de la Bible sur l’année 1914?” nu longo “Quel est le signe des “derniers jours”?”

 Mukanda wa gisugishilo wa Biblia wana zuelela tangua dia ‘gumonega gua Fumu Yesu,’ mbaaza nu ngolo jiavula ha gukatula gubola guagasue ha mavu nu ha guhuluisa athu ana kombelela Nzambi.”​—2 Tesalonike 1:6, 7; 1 Phetelo 1:7, 13.

 Mukanda wene wa gisugishilo wana monesa ndaga mbajibua mu masugu adi muza. (Gumonesa 1:1) Mukanda wene wana khala nu lukuma luabonga lunu luana hana felela diabonga. (Gumonesa 1:3) Wana monesa egi Nzambi mbawukatula ndaga jiagasue jiabola, mbawubuisa mavu phaladiso. Mu tangua diene, athu mbaashigo mumona luko lamba, gufua nji mbagukhadigo luko.​—Gumonesa 21:3, 4.

 Udi mutshigina gulonguga ndaga jiavula jiatadila malaji abonga adi mu Biblia ba? Matemue a Yehowa ajiya gugukuatesa ha gujiya ndaga jiene, handaga ana longesa athu Biblia, mbaashigo gugutoga mbongo. Wajiya guakamba nga mangino.