TEMIENU!
Biblia idi Muzuela Itshi Luholo Ikombelelo idi Gudinginyisa mu Ndaga jia Ita ya gu Ukraine?
Tala ndaga jidi muzuela mafumu a ikombelelo mukunda nu ita ya gu Ukraine:
Zulunalu EUobserver, ya 7 Mars 2022 idi muzuela egi: “Kirill, Fumu wakoma wa gikombelelo gia Orthodoxe gia gu Russie, gashigo muzuela nga ndaga imoshi idi mumonesa egi gifutshi gia Russie gidi mutshita gubola luholo gidi muluisa Ukraine. . . . Gikombelelo gienji gidi mulandula guzuela ndaga jia mambo mukunda nu Ukraine. Poutine udi mukalegela ndaga jiene ha guluisa enya gu Ukraine.”
Zulunalu AP News, ya 8 Mars 2022 idi muzuela egi: “Fumu Kirill . . . wazuedi egi gifutshi giawo gia Russie gidi naye guluisa Ukraine, handaga gudi muene idi gifua adi muluisa gubola.”
Zulunalu Jerusalem Post, ya 16 Mars 2022 idi muzuela egi: “Mu lusugu lua thomo lua phoso, Épiphane, Fumu wa gikombelelo gia Orthodoxe gia gu Kiev, wakombelele mukunda nu enya gu Ukraine hagula ‘aluise masuta a gu Russie’ . . . [Wazuelele] nji egi gushiya masuta a gu Russie gushigo gubola ndo.”
Mu 24 Fevrier 2022, enya UCCRO a azuelele egi: “Esue [ba organizasio a ikombelelo ya gu Ukraine], tudi muhana mago gudi masuta nu athu agasue a gu Ukraine adi mulua ita mukunda nu gifutshi gietu. Tudi mukombelela nji Nzambi hagula a akuatese ha gubinga mbalagaji jietu.”
Tangiza gale. Ikombelelo yana zuela egi yana landula gifezegeselo gia Yesu Klisto, idi naye diago gutuma athu ha guya mulua ita ba? Itshi Biblia yana zuela mukunda nu ndaga yene?
Ikombelelo yana gudinginyisa mu ndaga jia ita sendese mualeha
Ikombelelo yavula yana monesa egi yana kamba guhuima, uvi yana zuela nji egi gulua ita gushigo ndaga yabola. Uvi sendese mualeha, Matemue a Yehowa ana kuatesa athu ha gujiya egi ndaga jiana zuela ikombelelo yene jidi jia mambo. Tala ndaga tuasonegele gale mu mikanda yetu mukunda nu ndaga yene.
Longo “Les croisades: une “illusion tragique”” didi mumonesa luholo gikombelelo gia Katolike gia gu Roma giashiyishile athu avula avula mu jina dia Nzambi nu dia Klisto.
Longo “L’Église catholique en Afrique” didi mumonesa luholo ikombelelo yabingilego ha gukuatesa athu ha gutuna gulua ita.
Longo “La religion est-elle responsable?”, “Le rôle de la religion dans les guerres” nu longo “La religion prend parti”, adi mumonesa luholo gikombelelo gia Katolike, gia Orthodoxe nu gia Protestant yakuatesele masuta a mu ifutshi yagudisha anyi akhalele gudiluisa.
Aklisto a giamatshidia adi naye gulua ita ba?
Yesu wazuelele egi: “Zumba muthu na muku’enu gifua luholo wana zumba muila waye.” (Matayo 22:39) “Landulenu guzumba mbalagaji jienu.”—Matayo 5:44-47.
Tangiza gale: Ikombelelo yajiya diago guzuela egi yana tumagela mukhuala wa Yesu watadila guzumba, gula adi mutuma athu awo ha gushiya athu ako mu ita ba? Ha guheta mvutu, tanga longo didi muzuela egi “Les vrais chrétiens et la guerre” nu longo “Est-il possible d’aimer ses ennemis?”
Yesu wazuelele egi: “Ufumu wami ushigo wa ha mavu awa. Nga Ufumu wami udi wa ha mavu awa, nga enya mudimo ami alui hagula nguhanewago ha mago a enya Yuda.” (Yone 18:36) “Athu agasue adi mukuata phogo ya khusa, mbaafua gu phogo ya khusa.”—Matayo 26:47-52.
Tangiza gale: Gula Aklisto akhalelego naye gulua ha gubamba Yesu, adi naye diago gulua ita mukunda nu ndaga iko ba? Ha gumona luholo Aklisto a mu siekle ya thomo alanduile gifezegeselo gia Yesu nu malongo enji, tanga longo “Peut-on concilier guerre et christianisme?
Itshi mbayibuila ikombelelo yana tuma athu ha guya mulua ita?
Biblia idi muzuela egi Nzambi ganago gutshigina ikombelelo yinyi yana zuela egi yana landula gifezegeselo gia Yesu, uvi yanago gutumagela malongo enji.—Matayo 7:21-23; Tito 1:16.
Mu mukanda wa Gumonesa, Nzambi udi mumonesa egi mahatshi a “athu agasue ashiyiwe ha mavu” adi ha mito ya ikombelelo ya luholo elu. (Gumonesa 18:21, 24) Ha gujiya mukunda natshi, tanga longo “Qu’est-ce que Babylone la Grande?”
Yesu wamonesele egi ikombelelo yagasue yanago gutumagela Nzambi mbayishiyiwa mukunda nu makalegelo ayo abola, gifua luholo mutshi wabola wana guhaga mabundu abola “udi naye gukokewa umbiwa ha tshuya.” (Matayo 7:15-20) Ha gujiya luholo ndaga jiene mbajikalegewa, tanga longo “La fin de la fausse religion est proche!”
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Ba organizasio a ikombelelo ya gu Ukraine ana tamegewa egi UCCRO, adi nu ikombelelo 15 mukatshi. Ikombelelo yene idi ya Orthodoxe, ya Katolike ya gu Grece, Katolike ya gu Roma, ya protestant, ya évangélique, nu gikombelelo gia enya Yuda nu gia ba Musulman.
Tala Malongo ako Ajiya Gugusuanguluisa
ESSENTIAL BIBLE TEACHINGS
Ufumu wa Nzambi udi Itshi?
Hakhalele Yesu mulongesa ha mavu, walongele ndaga yatadila Ufumu wa Nzambi muavula gubalega ndaga jiko. Sendese mualeha, alandudi enji ana toga mu gisambu hagula Ufumu uze.
