Mu lusugu lua 19 Mai 2022, mafumu akoma gubalega 75 ahanele rapore gu Conseil de sécurité ya ONU egi: “Misongo ya COVID-19 nu usombegeshi wa climat wabatele lamba dia ima ya gudia ha mavu agasue. Henyaha ita ya gu Ukraine yavudisa diago nzala ha mavu agasue.” Gungima, zulunalu imoshi (The Economist) yazuelele egi: “Tuana tagana gale nu malamba avula ha mavu, uvi ita ya gu Ukraine yalezela luko lamba diavula dia ima ya gudia.” Biblia yadiangele guzuela egi mu masugu etu nzala yakola mbayikhala, uvi yana gutuhana malongo ana gutukuatesa ha gukolesela mu malamba ene.

•    Yesu wazuelele egi: “Handaga gifutshi mbagiluisa gifutshi giko, ufumu mbawuluisa ufumu uko. Nzala yabala mbayikhala.”​—Matayo 24:7.

•    Mukanda wa Gumonesa wana zuelela athu nguana adi muwendesa tubalu. Muthu mumoshi mukatshi dia athu ene adi muwendesa tubalu wana monesa ita. Yago udi gumulandula gungima wana monesa nzala, yakotelesa egi mbayikhala lamba ha guheta ima ya gudia, mibando ya ima yene nji mbayikola. “Ngamonele gabalu gabuita, muthu wakhalele holu dia gabalu gene wakhalele nu kilo ha koko dienji. Ngavile gifua dijui . . . muzuela egi: ‘Litre imoshi ya ble mukunda nu lufuto lua lusugu lumoshi lua mudimo! Ba litre thathu a orje mukunda nu lufuto lua lusugu lumoshi lua mudimo.’”​—Gumonesa 6:5, 6, Mukanda wa Nzambi mu Giphende.

 Profesi eji jia Biblia jiana zuelela nzala, jidi mutagenesewa mu masugu etu. Biblia yana tamega masugu ene egi “masugu a gisugishilo.” (2 Timote 3:1) Ha gujiya ndaga jiavula jiatadila “masugu a gisugishilo”, nu athu nguana ana wendesa tubalu adi muzuelewa mu mukanda wa Gumonesa, tala video Le monde a changé depuis 1914, tanga nji longo didi muzuela egi: “Les cavaliers de l’Apocalypse: qui sont-ils?”

•    Biblia idi nu malongo abonga ajiya gutukuatesa ha gulua nu malamba tudi mutagana nawo, gifua nzala yabala nga gula mibando ya ima ya gudia yakanduga. Wajiya gutala ifezegeselo idi mu longo didi muzuela egi “Comment vivre avec moins.”

•    Biblia yana gutuhana nji felela egi mu masugu adi muza mbatukhala nu lujingu luabonga. Yana gutulaya egi ‘mbuto mbajikhala jiavula ha mavu’, athu agasue mbaakhala nu ima ya gudia yavula. (Ngimbo 72:16) Ha gujiya ndaga jiavula jiatadila felela Biblia yana gutuhana mukunda nu masugu adi muza nu gishina tudi naye gusha mutshima mu felela diene, tanga longo didi muzuela egi: “Une espérance réelle pour des jours meilleurs.”