LONGO DIA 01

Luholo Lutshi Biblia Yajiya Gugukuatesa?

TEGELELA MU

Athu avula ana gudihula mihu yatadila monyo, malamba, gufua nu masugu adi muza. Tuana tagana nji nu lamba dia makuta nga dia gukamba luholo fami yetu yajiya gukhala nu gusuanguluga. Athu avula ana kotelesa egi Biblia yana guakuatesa ha guheta mvutu (kueteya) gu mihu yakoma yatadila monyo. Yana guahana nji malongo ana guakuatesa lusugu nu lusugu. Udi mutangiza egi Biblia yajiya gukuatesa muthu wagasue ba?

1. Biblia yana hana mvutu gu mihu itshi?

Biblia yana hana mvutu gu mihu eyi ya ndando: Luholo lutshi monyo wasendesele? Mukunda natshi tudi nu monyo? Mukunda natshi athu ana tagana nu malamba? Gula muthu wafua wana guya gui? Gula athu agasue ana tshigina guhuima, mukunda natshi ita idi giwa yavula ha mavu awa? Mavu mbaabua gikuatshi mu masugu adi muza? Biblia idi gututoga ha gukamba mvutu jia mihu ya luholo elu. Athu avula ana suanguluga diago nu mvutu jiana hana Biblia gu mihu yene.

2. Luholo lutshi Biblia yajiya gutukuatesa ha gukhala nu gusuanguluga mu monyo wetu?

Biblia yana gutuhana malongo awaha diago. Ha gufezegesa, yana kuatesa athu ha gukhala diago nu gusuanguluga mu fami jiawo. Yana gutumonesa ndaga tuajiya gukalagala tangua tudi nu gikenene, nu luholo tuajiya gusuanguluga nu mudimo wetu. Uza mulonguga ndaga Biblia yana longesa mukunda nu ndaga eji; uza mumona nji ndaga jiko jiavula tangua tudi mulonguga mukanda owu. Yajiya gugutuma ha gutshigina egi “Ndaga jiagasue jidi mu [Biblia] jidi . . . nu ndando.”—2 Timote 3:16.

Mukand’owu ushigo Biblia. Uvi udi gugukuatesa ha gulonguga Biblia hakhaye. Hene tudi gugutoga ha gutanga verse jiagasue jiasonegewa mu malongo a mukanda wuwu nu ha gutala gila jidi gudivua nu ndaga udi mulonguga.

NDAGA JIKO JIA NDANDO

Tala luholo Biblia yakuatesele athu ako nu luholo wajiya gusuanguluga tangua udi guyitanga nu gishina udi naye gukamba ukuateshi ha guyikotelesa muabonga.

3. Biblia yajiya gututuameza

Biblia idi gifua muinda udi mulema tshuya tuavula. Biblia yajiya gutukuatesa ha guzula badesizio abonga nu ha gujiya ndaga mbajibua mu masugu adi muza.

Tanga Ngimbo 119:105, gungima zuelelenu mihu eyi:

Muthu wasonegele lungimbo elu wakhalele mutadila Biblia luholo lutshi?
Aye luholo lutshi wana tadila Biblia?

4. Biblia yajiya guhana mvutu gu mihu yetu

Mukhetu mumoshi wamonele egi Biblia yamukuatesele ha guheta mvutu gu mihu yakhalele gumusagesa ivo yavula. Talenu VIDEO, gungima zuelelenu mihu yalandula.

VIDEO: Ubembigo Felela Diaye nga Hazonda! (1:48)

Mukhetu tuamonyi mu video eyi wakhadile gudihula mihu ya luholo lutshi?
Luholo lutshi gulonguga Biblia guamukuatesele?

Biblia idi gutuwambela ha gukhala nu khadilo dia guhula mihu. Tanga Matayo 7:7, gungima zuelelenu muhu walandula:

Mihu itshi udi naye, udi mutangiza egi Biblia yajiya gugukuatesa ha guheta mvutu?

5. Wajiya gusuanguluga ha gutanga Biblia

Athu avula ana suanguluga ha gutanga Biblia, yana guakuatesa nji muavula. Talenu VIDEO, gungima zuelelenu mihu yalandula.

VIDEO: Utangi wa Biblia (2:05)

Video eyi yamonesa egi luholo lutshi mavuala ana gudivua tangua ana tanga mikanda?
Uvi mukunda n’atshi ana tshigina gutanga Biblia?

Malongo a Biblia ajiya gutukuatesa nu gutuhana felela diabonga. Tanga Lomo 15:4, gungima zuelelenu muhu owu:

Felela nu gikhesa gidi muhana Biblia yana gugusuanguluisa nji ba?

6. Athu ako ajiya gutukuatesa ha gukotelesa Biblia

Athu avula ana tanga Biblia hakhawo, uvi ana mona egi guta maga a Biblia nu athu ako guana kuatesa muavula. Tanga Makalegelo 8:26-31, gungima zuelelenu muhu owu:

Luholo lutshi tuajiya gukotelesa Biblia?—Tala verse 30 nu 31.

Yala mumoshi wa gu Etiopia wakhalele nu funu ya ukuateshi ha gukotelesa mbimbi ya Nzambi. Mangino athu avula ana kotelesa egi guzuelela Biblia nu athu ako guana guakuatesa muavula

ATHU AKO ANA ZUELA EGI: “Gulonguga Biblia gushigo nu ndando.”