LONGO DIA 10
Luholo Lutshi Gudibungisa gua Matemue a Yehowa Guajiya Gugubatela Gubonga?
Agutamegele gale ha guya mu gudibungisa gua Matemue a Yehowa ba? Gula khenji wayilego, wajiya guvua woma ha guya mu gudibungisa guene mbala ya thomo. Wajiya gudihula egi: ‘Ndaga jitshi jiana kalegewa mu gudibungisa guene? Gudibungisa guene guana khala nu ndando ba? Mukunda natshi ngudi naye guya mu gudibungisa guene?’ Longo edi diza mumonesa luholo gudibungisa nu athu ako guajiya gugukuatesa ha gukuata ufuta nu Nzambi nu gubonga wajiya guheta.
1. Mukunda natshi Matemue a Yehowa ana gudibungisa hamoshi?
Muthu mumoshi wasonegele mikanda iko ya Biblia, wasonegele ndaga ya ndando yatadila gudibungisa nu athu ako. Wazuelele egi: ‘Ame mbangutumbuisa Yehowa mu gudibungisa gua athu.’ (Ngimbo 26:12) Mangino nji, Matemue a Yehowa ana suanguluga muavula ha gudibungisa hamoshi. Ana gudibungisa phoso nu phoso ha gutumbuisa Nzambi, ha gumuyimbila ngimbo nu ha gumukombelela. Ana kalagala nji gudibungisa guakoma givo nu givo.
2. Ndaga jitshi mbawulonguga mu gudibungisa guetu?
Mu gudibungisa guetu, tuana longuga Mbimbi ya Nzambi, ana ‘gutukotelesela nayo muabonga nu gutukuatesa ha guyijiya.’ (Tanga Nehemiya 8:8.) Mu gudibungisa guetu, mbawulonguga ndaga jiavula jiatadila Yehowa nu makalegelo enji awaha. Gula wakotelesa egi Yehowa wana guguzumba muavula, mbawukuata n’enji ufuta. Mbawukotelesa nji egi muene udi nu ngolo jia gugukuatesa ha gukhala nu gusuanguluga guavula.—Yeshaya 48:17, 18.
3. Luholo lutshi gudibungisa nu athu ako guajiya gugubatela gubonga?
Yehowa udi gututoga ha “gudisagesa mukunda nu athu ako ha gudizumba nu ha gukalagala midimo yabonga, tubembigo guya mu gudibungisa guetu.” (Hebelu 10:24, 25) Mu gudibungisa guetu, mbawumona athu ana guditshigina muavula nu ana suanguluga muavula ha gujiya ndaga jiatadila Nzambi gifua aye. Mbawumona luholo adi gudihana gikhesa mu njila ya Biblia. (Tanga Roma 1:11, 12.) Mbawuta maga nu athu adi nu gusuanguluga luholo abingile malamba ataganele nawo ikhale adizudile gale mu ulo nga adi undumbu. Ndaga eji tuatanga jidi mumonesa gishina Yehowa wana tshigina egi tukhale gudibungisa hamoshi phoso nu phoso!
TUKAMBE GUJIYA NDAGA JIAVULA
Kamba gujiya ndaga jiana kalegewa mu gudibungisa gua Matemue a Yehowa; kamba nji gujiya mukunda natshi idi nu ndando ha guya mu gudibungisa guene.
4. Gudibungisa gua Matemue a Yehowa
Mu siekle ya thomo, Aklisto akhalele gudibungisa muavula ha gukombelela Yehowa. (Roma 16:3-5) Tanga Kolosai 3:16, gungima zuelelenu muhu owu walandula:
-
Luholo lutshi Aklisto a mu siekle ya thomo akhalele mukombelela Yehowa?
Mangino, Matemue a Yehowa ana gudibungisa nji muavula mu Jinzo jia Ufumu. Ha gujiya ndaga jiana kalegewa mu gudibungisa guawo, tala VIDEO. Gungima, tala gifuanesa gidi mumonesa athu adi mu gudibungisa gua mu hungu, zuelelenu nji mihu eyi yalandula.
-
Luholo lutshi ndaga jiana kalegewa mu Inzo ya Ufumu jidi luholo lumoshi nu ndaga watangi mu Kolosai 3:16?
-
Ndaga itshi iko ya gusuanguluisa mu video eyi nga mu gifuanesa, yana kalegewa mu gudibungisa guetu?
Tanga 2 Kolinto 9:7, gungima zuelelenu muhu owu walandula:
-
Mukunda natshi Matemue a Yehowa anago gutoga athu mbongo ha gungina mu gudibungisa guawo?
Henyaha zuelelenu ndaga mbajilongugiwa mu gudibungisa gua mu hungu gua phoso yalandula nu muthu udi gugulongesa Biblia.
-
Gitshinyi gitshi gia gudibungisa gua mu hungu gidi gugusuanguluisa muavula?
Wana guyijiya ba?
Mu jw.org, wajiya guheta fundo nu tangua gudibungisa gua Matemue a Yehowa guana kalegewa ha mavu agasue.
-
Mu gudibungisa guetu ana tshita ba diskur, ba démonstrations, nu ana tala ba video. Gudibungisa guana sendesa nu lungimbo nu gisambu, guana suga nji luholo lumoshi
-
Mu itshinyi iko ya gudibungisa guene, ana toga athu anyi atshigina ha guhana mvutu
-
Athu agasue ajiya guza mu gudibungisa: mvuaji nu an’awo, athu adi undumbu nu athu a gukola
-
Ana toga ndo mbongo ha gungina mu gudibungisa. Matemue a Yehowa ana kungula ndo mbongo
5. Tshita ngolo ha guya mu gudibungisa
Tuzuelele gifezegeselo gia enya fami ya Yesu. Givo nu givo, akhalele mutshita vuayaje ya bakilometre 100 mu njila jia milundu sendese gu Nazaleta uu nu gu Yelusalema. Tanga Luka 2:39-42, gungima zuelelenu mihu eyi yalandula:
-
Udi mutangiza egi gukatuga gu Nazaleta ha guya gu Yelusalema guakhalele ndaga yaleba ba?
-
Mukunda natshi udi naye gukalagala ngolo ha guya mu gudibungisa?
-
Udi mutangiza egi guya mu gudibungisa gua mu hungu gudi nu ndando ngatshima ishigo ndaga yaleba ba? Mukunda natshi wazuela ngenyi?
Biblia yana zuela egi gudibungisa ha gukombelela Nzambi gudi nu ndando yavula. Tanga Hebelu 10:24, 25, gungima zuelelenu muhu owu walandula:
-
Mukunda natshi tudi naye guya mu gudibungisa gua mu hungu phoso nu phoso?
ATHU AKO ANA ZUELA EGI: “Guya mudibungisa nu athu ako gushigo nu ndando. Wajiya gulonguga Biblia phamba gumbo diaye.”
-
Verse itshi, nga ndo gifezegeselo gitshi gia Biblia gidi mumonesa ndaga jiana tshigina Yehowa?
NDAGA WALONGUGA
Guya mu gudibungisa gua mu hungu mbagugukuatesa ha gulonguga ndaga jiavula jiatadila Yehowa, nu ha gukolesa ufuta waye n’enji, nu ha gumukombelela hamoshi nu athu ako.
Mihu ya Guvutugila
-
Mukunda natshi Yehowa udi gututoga ha guya mu gudibungisa gua mu hungu?
-
Ndaga jitshi mbawulonguga mu gudibungisa gua Matemue a Yehowa?
-
Udi mutangiza egi guya mu gudibungisa guajiya gugubatela gubonga guko ba?
NDAGA JIKO JIA NDANDO
Itshi wajiya gutshita gula wana vua woma ha guya mu gudibungisa? Tala ndaga yakuatesele yala mumoshi ha guzumba gudibungisa muavula.
Tala luholo muvuala mumoshi wasuangulugile nu gudibungisa, nu ndaga yakalegele muene ha gulandula guya mu gudibungisa.
Tala luholo athu ako ana gudivua tangua ana guya mu gudibungisa gua mu hungu.
“Pourquoi assister aux réunions tenues à la Salle du Royaume?” (Longo edi didi mu jw.org)
Tala luholo gudibungisa gua Matemue a Yehowa guakuatesele yala mumoshi wakhalele mbundudi ha gusombegesa makalegelo enji.
“Je ne sortais jamais sans mon arme” (Inzo Yaleha ya Mutaledi ya 1 Juillet 2014 ya français)
