LONGO DIA 13
Ikombelelo ya Mambo Yana Shingisa Nzambi
Gula Nzambi udi guzumba, mukunda natshi ikombelelo yavula inyi yana zuela egi idi amoneshi enji yana tshita ndaga jiavula jiabola? Handaga idi ikombelelo ya mambo, yana shingisa Nzambi. Mu luholo lutshi? Nzambi wana gudivua gikuatshi? Muene mbawutshita itshi mukunda nu ndaga yene?
1. Luholo lutshi ikombelelo ya mambo yana shingisa Nzambi mu malongo awo?
Ikombelelo ya mambo yana “sombegesa giamatshidia gia Nzambi nu mambo.” (Roma 1:25) Ha gufezegesa, ikombelelo yavula yana longesa ndo athu jina dia Nzambi. Uvi Biblia yana longesa egi athu adi naye gukalegela jina dia Nzambi. (Roma 10:13, 14) Gula ndaga imoshi ya lamba yabua, mafumu ako a mangumba ana zuela egi idi gutshigina gua Nzambi. Uvi idi ndaga ya mambo, malamba ana katuga ndo gudi Nzambi. (Tanga Yakoba 1:13.) Idi lamba ha gumona egi ndaga eji jia mambo jiana tuma athu ha gutuna Nzambi.
2. Luholo lutshi ikombelelo ya mambo yana shingisa Nzambi mu makalegelo awo?
Ikombelelo ya mambo yana kalegela ndo athu ndaga gifua luholo Yehowa wana tshigina. Biblia yana zuela egi gubola gua ikombelelelo ya mambo “guadivudisa nu guakanduga uu nu mu dilu.” (Gumonesa 18:5) Sendese mualeha, ikombelelo ya mambo yana gudinginyisa mu ndaga jia politike, yana hana mago gu ita, yana shiyisa athu nga gutshigina egi athu avula ashiyiwe. Mafumu ako a ikombelelo ana tshigina gukhala nu mbongo jiavula, hene ana toga enya ikombelelo yawo mbongo. Ndaga eji jiana monesa egi ana jiya ndo Nzambi nga hazonda, ajiyilego nji gukhala amoneshi enji.—Tanga 1 Yone 4:8.
3. Nzambi wana gudivua gikuatshi mukunda nu ikombelelo ya mambo?
Gula ndaga jiana tshita ikombelelo ya mambo jiana guguhana khabu, udi mutangiza egi Yehowa wana gudivua gikuatshi? Muene wana zumba athu, uvi wana vila mafumu a ikombelelo khabu luholo ana gumushingisa nu luholo ana kalegela athu awo ndaga mu luholo luabola. Walayele egi ikombelelo ya mambo mbayishiyiwa nu ‘mbayimonegago luko nga hazonda.’ (Gumonesa 18:21) Gualeha ndo, Nzambi uza mushiya ikombelelo yagasue ya mambo.—Gumonesa 18:8.
TUKAMBE GUJIYA NDAGA JIAVULA
Tala ndaga jiavula jidi mumonesa luholo Nzambi wana gudivua mukunda nu ikombelelo ya mambo. Uza mumona nji ndaga jiavula ikombelelo yene yatshitshile gale, uvi ndaga jiene jiajiyilego gugukanga njila ha gujiya Yehowa.
4. Nzambi gana suanguluga ndo nu ikombelelo yagasue
Athu avula ana tangiza egi ikombelelo yagasue yana khala gifua njila jiavula jia gudisha jidi mubata gudi Nzambi. Ndaga yene idi ya giamatshidia ba? Tanga Matayo 7:13, 14, gungima zuelelenu muhu owu walandula:
-
Itshi Biblia idi muzuela mukunda nu njila idi mubata gu monyo?
Tala VIDEO, gungima zuelelenu muhu owu walandula.
-
Biblia yana zuela egi Nzambi wana suanguluga nu ikombelelo yavula ba?
5. Ikombelelo ya mambo yana monesa ndo guzumba gua Nzambi
Ikombelelo ya mambo yana shingisa Nzambi mu maluholo avula. Ha gufezegesa, yana gudinginyisa mu ndaga jia itumba. Ha gumona ndaga yene, tala VIDEO. Gungima zuelelenu mihu eyi yalandula.
-
Ndaga tshi ikombelelo yavula yastshitshile mu Ita ya Mbadi ya ha Mavu Agasue?
-
Luholo lutshi udi gudivua mukunda nu ndaga jiatshitshile ikombelelo yene?
Tanga Yone 13:34, 35 nu 17:16. Gungima zuelelenu mihu eyi yalandula:
-
Yehowa wana gudivua gikuatshi tangua ikombelelo yana gudinginyisa mu ndaga jia ita?
-
Ikombelelo ya mambo yana tshita ndaga jiavula jiabola. Ndaga tshi wana mona ikombelelo ya mambo mutshita idi mumonesa egi ashigo mulandula gifezegeselo gia Nzambi?
Ikombelelo ya mambo yana monesa ndo guzumba gua Nzambi
6. Nzambi wana tshigina gukuatesa athu ha gukatuga mu gikombelelo gia mambo
Tanga Gumonesa 18:4, a gungima zuelelenu muhu owu walandula:
-
Udi gudivua gikuatshi tangua wajiya egi Nzambi udi mutshigina gukuatesa muthu wagasue wana huigiwa mu ikombelelo ya mambo?
7. Landula gulonguga ndaga jiatadila Nzambi wa giamatshidia
Ndaga jiabola jiana tshita ikombelelo ya mambo jiana sombegesa luholo luaye lua gutadila Nzambi ba? Tangiza gale egi mona mumoshi watuna gutegelela malongo a sh’enji. Wakatuga gumbo diawo, waya mutshita ndaga jiabola. Sh’enji gashigo musuanguluga nu ndaga jidi mutshita mona muene. Udi mutangiza egi idi ndaga yabonga gula athu asendesa gubela sh’enji mukunda nu lujingu lua mun’enji wa mbundudi ba?
-
Idi ndaga yabonga ha guhana Yehowa fote nga gubemba gulonguga ndaga jiamutadila muene mukunda nu makalegelo a ikombelelo ya mambo ba?
ATHU AKO ANA ZUELA EGI: “Ngana suanguluga ndo nu Nzambi handaga ikombelelo yana tshita ndaga jiavula jiabola.”
-
Aye nji wana tangiza ngenyi ba?
-
Mukunda natshi ndaga jiana tshita ikombelelo ya mambo jiajiyilego gusombegesa luholo luaye lua gutadila Yehowa?
NDAGA WALONGUGA
Ikombelelo ya mambo yana shingisa Nzambi mu malongo awo a mambo nu mu ndaga ana tshita. Nzambi mbawushiya ikombelelo ya mambo.
Mihu ya Guvutugila
-
Luholo lutshi udi gudivua mukunda nu malongo ana longa ikombelelo ya mambo nu ndaga ana tshita?
-
Yehowa wana gudivua gikuatshi mukunda nu ikombelelo ya mambo?
-
Itshi Nzambi mbawutshita ikombelelo ya mambo?
NDAGA JIKO JIA NDANDO
Tala ndaga mbadi jianago gusuanguluisa Nzambi jinyi ikombelelo yavula ya mambo yana tshita.
“Toutes les religions se valent-elles? Mènent-elles toutes à Dieu?” (Longo edi didi mu jw.org)
Mukunda natshi Yehowa wana tshigina egi tumukombelele hamoshi nu athu ako?
“Est-il nécessaire d’appartenir à une religion organisée?” (Longo edi didi mu jw.org)
Muphe mumoshi wakhalele gudisagesa mukunda nu gikombelelo gienji. Uvi ndaga yene yamukangelego njila ha gulonguga giamatshidia giatadila Nzambi.
“Pourquoi un prêtre a quitté son Église” (Réveillez-vous! ya Fevrier 2015)
Sendese mualeha, ikombelelo yana huiga athu egi Nzambi gana gudisagesa ndo mukunda nu athu, wakhala nu khuta. Longuga giamatshidia giatadila mambo thathu mukatshi dia mambo ene.
“Des mensonges qui empêchent d’aimer Dieu” (Inzo Yaleha ya Mutaledi ya 1 Novembre 2013 ya français)
a Ha gujiya mukunda natshi mukanda wa Gumonesa wana monesa ikombelelo ya mambo gifua mukhetu mumoshi mu jina dia Babilona Yakoma, tala Malongo a Gisugishilo 1.
