LONGO DIA 15
Yesu Udi Nanyi?
Yesu udi mukatshi dia athu ajiyiwa muavula ha mavu. Uvi athu avula ana jiya phamba jina dia Yesu, ana jiya ndo ndaga jiavula jiamutadila; athu avula ana khala nu matangi a gudisha ha gujiya gula Yesu udi diago nanyi. Na itshi Biblia yana zuela mukunda nu muene?
1. Yesu udi nanyi?
Yesu udi muanjelo wa ngolo, wana khala mu dilu. Yehowa Nzambi wamufugile gutuama dia gufuga ima yagasue. Gishina giene, ana gumutamega egi “somi ya ima yagasue yafugiwe.” (Kolosai 1:15) Biblia yana tamega Yesu egi mun’a Nzambi “mumoshi ha mumoshi,” handaga phamba Yesu wafugiwe mbala imoshi gudi Yehowa. (Yone 3:16) Yesu wakhalele mutshita mudimo hamoshi nu Yehowa, wamukuatesele ha gufuga ima iko yagasue. (Tanga Ishima 8:30.) Yesu walanduile gukolesa ufuta wenji nu Yehowa. Wakhalele gifua “Mbimbi” mukunda nu Nzambi, handaga muene wakhalele mubata mbimbi nu malongo a Nzambi gudi athu nu anjelo.—Yone 1:14.
2. Mukunda natshi Yesu wajile ha mavu?
Ivo 2 000 yabalega gale, Yehowa wakatuile monyo wa Yesu mu dilu mu ngolo jia nyuma yenji, wawumbile mu vumo dia muvuala mumoshi wa mukhetu, jina dienji Madiya; Madiya wakhalele khenji gabungishilego muila nu yala. Ngenyi, Yesu wavualewe gifua muthu. (Tanga Luka 1:34, 35.) Yesu wajile ha mavu ha gubua Masiya nga Klisto munu watendelewe, ha guhuluisa athu. a Watagenesele profesi jiagasue jia Biblia jiatadila Masiya, yakuatesele athu ha gujiya egi Yesu wakhalele “Klisto, Mun’a Nzambi wa monyo.”—Matayo 16:16.
3. Yesu udi gui mangino?
Gungima dia gufua gua Yesu ha mavu, Nzambi wamufuzumuine nu muila wa mu nyuma, gungima wavutugile mu dilu. Hahetele muene mu dilu, “Nzambi wamukanduishile holu dia ima yagasue.” (Filiphi 2:9) Henyaha, Yesu udi nu ufumu wakoma—muene udi muthu wa ngiadi gungima dia Yehowa.
TUKAMBE GUJIYA NDAGA JIAVULA
Tala ndaga jiavula jidi mumonesa gula Yesu udi nanyi, nu mukunda natshi idi nu ndando egi tulonguge ndaga jiavula jiamutadila.
4. Yesu gashigo Nzambi wa Ngolo Jiagasue
Biblia yana longesa egi ngatshima Yesu udi muanjelo wa ngolo jiavula mu dilu, uvi wana tumagela Sh’enji, Yehowa Nzambi. Mukunda natshi tuazuela ngenyi? Tala VIDEO ha gumona luholo Biblia yana monesa egi Yesu udi ya gudisha nu Yehowa.
Verse eji jialandula, jiza gutukuatesa ha gukotelesa gudivua gudi mukatshi dia Yehowa nu Yesu. Tanga verse yagasue, gungima zuelelenu mihu eyi yalandula.
Tanga Luka 1:30-32.
-
Luholo lutshi Muanjelo wamonesele gudivua gudi mukatshi dia Yesu nu Yehowa “Nzambi wa Gudinyinyiga”?
Tanga Matayo 3:16, 17.
-
Tangua Yesu wabatijiwe, dijui diazogele mu dilu diazuelele egi itshi?
-
Udi mutangiza egi dijui diene diakhalele dia nanyi?
Tanga Yone 14:28.
-
Nanyi udi mbuta nu udi nu ufumu wavula? Tata nga mona?
-
Itshi Yesu watshiginyile guzuela tangua diatamegele muene Yehowa egi Tata?
Tanga Yone 12:49.
-
Yesu watangijile egi muene nu Sh’enji adi muthu mumoshi ba? Aye itshi udi mutangiza?
5. Yesu wamonesele egi udi Masiya
Biblia yana khala nu baprofesi avula anyi ajiya gukuatesa athu ha gujiya Masiya—muthu Nzambi watombele ha guhuluisa athu. Tala VIDEO ha gumona ndambo ya baprofesi anyi atagenesele Yesu tangua diajile muene ha mavu.
Tanga profesi eji jia Biblia, gungima zuelelenu mihu eyi yalandula:
Tanga Mika 5:2 ha gujiya fundo diakhalele naye guvualewa Masiya. b
-
Guvualewa gua Yesu guatagenesele profesi yene ba?—Matayo 2:1.
Tanga Ngimbo 34:20 nu Zakaliya 12:10 ha gumona ndaga jiadiangele guzuela Biblia mukunda nu gufua gua Masiya.
-
Profesi jiene jiatagenele ba?—Yone 19:33-37.
-
Udi mutangiza egi Yesu watshitshile egi profesi jiene jitagane gudi muene ba?
-
Ndaga yene idi gugutshiginyisa itshi mukunda nu Yesu?
6. Tuana heta gubonga tangua tuana longuga ndaga jiatadila Yesu
Biblia yana monesa egi idi nu ndando ha gulonguga ndaga jiatadila Yesu nu mudimo wamuhanele Nzambi. Tanga Yone 14:6 nu 17:3, gungima zuelelenu muhu owu walandula:
-
Mukunda natshi idi nu ndando ha gulonguga ndaga jiatadila Yesu?
Yesu wakanguile njila ha gubua futa dia Nzambi. Walongesele giamatshidia giatadila Yehowa, mu njila yenji tuajiya guheta monyo wa ivo nu ivo
ATHU AKO ANA ZUELA EGI: “Matemue a Yehowa ana sha ndo gutshigina gudi Yesu.”
-
Mvutu itshi wajiya guhana?
NDAGA WALONGUGA
Yesu udi muanjelo wa ngolo. Udi mun’a Nzambi, udi nji Masiya.
Mihu ya Guvutugila
-
Mukunda natshi Yesu wana tamegewa egi “somi ya ima yagasue yafugiwe”?
-
Itshi Yesu gakhalele mutshita gutuama dia guza ha mavu?
-
Luholo lutshi tudi mujiya egi Yesu udi Masiya?
NDAGA JIKO JIA NDANDO
Longuga ndaga jiavula jiana gutukuatesa ha gujiya egi Yesu udi Masiya.
“Les prophéties messianiques prouvent-elles que Jésus était le Messie” (Longo edi didi mu jw.org)
Tala gula Biblia yana zuela egi Nzambi wavualele Yesu gifua luholo athu ana vuala ana.
“Pourquoi Jésus est-il appelé le Fils de Dieu?” (Longo edi didi mu jw.org)
Tala ha gujiya mukunda natshi longo dia uthathu (trinité) dishigo longo dia Biblia.
“Jésus est-il Dieu?” (Inzo Yaleha ya Mutaledi ya 1 Avril 2009 ya français)
Tanga longo edi ha gujiya luholo makalegelo a mukhetu mumoshi asombegesele hakambele muene gujiya ndaga Biblia yana zuela mukunda nu Yesu.
“Une femme juive explique pourquoi elle a remis sa foi en question” (Réveillez-vous! ya Mai 2013)
a Longo 26 nu 27 mbadimonesa mukunda natshi yakhalele mutoga egi athu ahuluishiwe, nu luholo Yesu watuhuluishile.
b Tala Malongo a Gisugishilo 2 ha gumona profesi imoshi yadiangele gumonesa tangua Yesu wakhalele naye guza ha mavu.
