LONGO DIA 17

Yesu Wakhalele Muthu ya Luholo Lutshi?

TEGELELA MU

Tangua tualonguga ndaga jiazuelele Yesu nu jiatshitshile muene ha mavu, tuamonyi makalegelo enji abonga anyi ajiya gututuma ha gusuena hehi n’enji nu Yehowa. Makalegelo atshi abonga Yesu wana khala nawo? Luholo lutshi tuajiya gulandula gifezegeselo gienji?

1. Mu ndaga jitshi Yesu wana khala gifua Sh’enji?

Hakhalele Yesu mu dilu, wakhalele mutala Sh’enji muabonga, nu walongugile ndaga jiavula gudi muene ivo yavula. Hene, wana tangiza nu wana tshita ndaga gifua Sh’enji. (Tanga Yone 5:19.) Idi yadiago egi Yesu walanduile makalegelo a Sh’enji muabonga diago, hene wazuelele egi: “Muthu wangumona ame, wamona nji Tata.” (Yone 14:9) Luholo udi mulonguga umuthu wa Yesu, mbawujiya Yehowa muabonga. Ha gufezegesa, luholo Yesu wakhalele muvila athu khenda, idi mumonesa egi Yehowa nji wana gutuvila khenda.

2. Luholo lutshi Yesu wamonesele egi wakhalele muzumba Yehowa?

Yesu wazuelele egi: “Hagula mavu agasue ajiye egi ngana zumba Tata, ngana kalagala ndaga jiangutogele Tata ha gutshita.” (Yone 14:31) Hakhalele Yesu ha mavu, wamonesele egi wakhalele muzumba Sh’enji hakhalele gumutumagela muene ikhale tangua yakhalele lamba ha gutumaga. Yesu wakhalele nji musuanguluga guzuelela Sh’enji nu gukuatesa athu ha gukuata ufuta wakola n’enji.—Yone 14:23.

3. Luholo lutshi Yesu wamonesele egi wakhalele muzumba athu?

Biblia yana zuela egi Yesu wakhalele ‘musuanguluga nu athu.’ (Ishima 8:31) Wamonesele guzumba guene tangua diakhalele muhana muene athu gikhesa nu guakuatesa. Ndaga jia gushimana jiatshitshile muene jiakhalelego mumonesa phamba ngolo jienji uvi jiakhalele nji mumonesa khenda jienji. (Mako 1:40-42) Wakhalele mumonesela athu gisemo, gakhalelego nji mutomba-tomba. Mbimbi jienji jiakhalele muhana gikhesa nu felela gudi athu a mitshima yatagana anyi akhalele gumutegelela. Yesu watshiginyile gumona lamba nu gufua handaga wakhalele muzumba athu. Uvi wakhalele muzumba muavula athu anyi akhalele mulandula malongo enji.—Tanga Yone 15:13, 14.

TUKAMBE GUJIYA NDAGA JIAVULA

Tala ndaga jiavula jiatadila umuthu wa Yesu. Tala nji luholo wajiya guzumba athu ako nu guamonesela khadilo dia guyamba.

4. Yesu wana zumba Sh’enji

Gifezegeselo gia Yesu gidi gutumonesa luholo tuajiya guzumba Nzambi. Tanga Luka 6:12 nu Yone 15:10; 17:26. Gungima dia gutanga verse yagasue, zuelelenu muhu owu walandula:

Luholo lutshi tuajiya gulandula gifezegeselo gia Yesu ha guzumba Yehowa?

Yesu wakhalele muzumba Sh’enji wa mu dilu nu wakhalele muzuela n’enji mu gisambu

5. Yesu wakhalele gudisagesa mukunda nu athu ako

Yesu wakhalele mukamba thomo gubonga gua athu ako uvi guenji ndo. Ikhale tangua wakhalele ya guhuila, wakhalele muzula tangua nu gutshita ngolo ha gukuatesa athu ako. Tanga Mako 6:30-44, gungima zuelelenu mihu eyi yalandula:

Mu lumene elu, mu maluholo atshi Yesu wamonesele egi wakhalele gudihaga ha fundo dia athu ako?—Tala verse 31, 34, 41, nu 42.
Itshi yakhalele mutuma Yesu ha gukuatesa athu ako?—Tala verse 34.
Luholo Yesu walanduile makalegelo a Yehowa, idi gugulongesa itshi mukunda nu Yehowa?
Mu maluholo atshi ako tuajiya gudihaga ha fundo dia athu ako gifua muatshitshile Yesu?

6. Yesu wakhalele nu khadilo dia guhana

Yesu wakhalele nu khadilo dia guhana ikhale gakhalelego nu ima yavula; wana gututoga nji esue ha gukhala nu khadilo diene. Tanga Makalegelo 20:35, gungima zuelelenu muhu owu walandula:

Ha gutadila ndaga jiazuelele Yesu, itshi tuajiya gutshita ha gukhala nu gusuanguluga?

Tala VIDEO, gungima zuelelenu muhu owu walandula.

VIDEO: “Muthu udi muhana wana khala nu gusuanguluga guavula”—Gitshinyi (4:00)

Mu maluholo atshi tuajiya gumonesa khadilo dia guhana ikhale tushigo nu ima yavula?

Wana guyijiya ba?

Biblia yana gututoga ha gukombelela Yehowa mu jina dia Yesu. (Tanga Yone 16:23, 24.) Gula tuakombelela mu luholo elu, tudi mumonesa egi tudi muhana mersi mukunda nu ndaga yatshitshile Yesu ha gutukuatesa ha gubua mafuta a Yehowa.

ATHU AKO ANA ZUELA EGI: “Nzambi gana gudisagesa ndo mukunda nu malamba etu.”