LONGO DIA 26
Mukunda Natshi Gubola nu Malamba adi ha Mavu?
Gula ndaga ya lamba yabuila muthu, tuana gudihula egi: “Mukunda natshi ?” Tudi diago nu gusuanguluga ha gujiya egi Biblia yana hana mvutu ya muhu owu!
1. Luholo lutshi Satana wabatele gubola ha mavu?
Satana Diabulu walumbugile Nzambi. Wana tshigina gubua mutuameji, hene wahuigile athu a thomo Adama nu Eva ha gulumbugila nji Nzambi gifua muene. Wambidile Eva mambo hagula alumbuge. (Gisendeselo 3:1-5) Watumile Eva ha gutangiza egi Yehowa wakhalele guasuegela gima gimoshi giabonga. Wamonesele egi athu mbaakhala nu gusuanguluga gula atuna gutumagela Nzambi. Satana wambile mambo a thomo hawambelele muene Eva egi mbagashigo mufua. Hene, Biblia yana tamega Satana egi: “Muenya mambo nu sha mambo.”—Yone 8:44.
2. Ndaga itshi Adama nu Eva atshitshile?
Yehowa wahanele Adama nu Eva ima yavula. Waawambelele egi adi naye gudia mabundu a mitshi yagasue mu gilanga gia Edene, uvi ajiyilego gudia mabundu phamba a mutshi umoshi. (Gisendeselo 2:15-17) Uvi azudile desizio dia gudia bundu dia mutshi wene. Eva “wazanguile bundu dimoshi wadile.” Gungima, Adama nji “wadile.” (Gisendeselo 3:6) Mukut’awo agasue alumbugile Nzambi. Luholo Adama nu Eva akhalele athu atagana, akhalele naye gutshita ndaga jiabonga. Luholo alumbugile Nzambi nu mutshima wawo wagasue, atshitshile gubola guakoma, akhalelego naye luko gutuamezewa gudi Nzambi. Desizio diene diaabatele malamba avula.—Gisendeselo 3:16-19.
3. Desizio diazudile Adama nu Eva didi gutubatela malamba atshi?
Tangua Adama nu Eva atshitshile gubola, akhalelego luko athu atagana, nu an’awo nji ajile muvuala akhalelego athu atagana. Biblia yana zuela mukunda nu Adama egi: “Gubola guanginyine ha mavu agasue mu njila ya muthu mumoshi. Gubola guabatele gufua, hene gufua guana kuata athu agasue.”—Roma 5:12.
Tuana mona malamba mukunda nu ndaga jiavula. Matangua ako, tuana mona malamba mukunda nu ba desizio abola tuana zula, nga mukunda nu ba desizio abola a athu ako. Uvi matangua ako, tuana mona nji malamba handaga tudi ha fundo diabola nga mu tangua diabola.—Tanga Mulongeshi 9:11.
TUKAMBE GUJIYA NDAGA JIAVULA
Tutadile gishina tudi muzuela egi Nzambi gashigo ha gishina gia malamba nu ndaga jiabola jidi ha mavu mangino, nu luholo Nzambi wana gudivua tangua tuana mona malamba.
4. Muthu munu udi ha gishina gia malamba etu
Athu avula ana tshigina egi Nzambi udi mutuameza mavu agasue. Ndaga yene idi ya giamatshidia ba? Tala VIDEO.
Tanga Yakoba 1:13 nu 1 Yone 5:19, gungima zuelelenu muhu owu:
-
Nzambi udi ha gishina gia malamba nu ndaga jiabola tudi mumona ba?
5. Ndaga jiana kalegewa mu uhinyinyi wa Satana
Tanga Gisendeselo 3:1-6, gungima zuelelenu mihu eyi yalandula:
-
Mambo atshi Satana wambile?—Tala verse 4 nu 5.
-
Luholo lutshi Satana wamonesele egi Yehowa wakhalele musuegela athu ima yabonga?
-
Ha gutadila ndaga jiazuelele Satana, athu adi nu funu ya utuameji wa Yehowa hagula akhale nu gusuanguluga ba?
Tanga Mulongeshi 8:9, gungima zuelelenu muhu owu walandula:
-
Ndaga jitshi jiana kalegewa sendese Yehowa wabembele gutuameza mavu?
-
Adama nu Eva akhalele athu atagana, akhalele mu phaladiso. Uvi avile ndaga jiaawambelele Satana, alumbugile Yehowa
-
Gungima dia gulumbugila Nzambi, gubola guazalele pha ha mavu, nu malamba nu gufua
-
Yehowa mbawusugisa gubola, nu malamba nu gufua. Athu agasue mbaabua nji athu atagana nu mbaakhala mu Phaladiso
6. Yehowa wana gudisagesa mukunda nu malamba etu
Nzambi wana gudisagesa mukunda nu malamba etu ba? Tutadile ndaga jiasonegele Fumu Davidi nu mupostolo Phetelo. Tanga Ngimbo 31:7 nu 1 Phetelo 5:7, gungima zuelelenu muhu owu:
-
Luholo lutshi udi gudivua tangua wajiya egi Yehowa wana jiya malamba etu nu wana gudisagesa mukunda nu malamba ene?
7. Nzambi mbawusugisa malamba agasue a athu
Tanga Yeshaya 65:17 nu Gumonesa 21:3, 4, gungima zuelelenu muhu owu walandula:
-
Mukunda natshi idi muhana gikhesa ha gujiya egi Yehowa mbawukatula malamba agasue ana tagana nawo athu?
Wana guyijiya ba?
Tangua Satana wambile mambo a thomo, washingile diago Yehowa. Wabolesele lukuma lua Yehowa, watumile nji athu ha gutangiza egi Yehowa gashigo Fumu wa guzumba. Tangua Yehowa mbawumanesela malamba agasue mu masugu adi muza, mbawunemesa jina dienji. Mu guzuela guko, Mbawumonesa diago egi utuameji wenji udi wabonga. Gunemesewa gua jina dia Yehowa gudi ndaga imoshi yabalega ndando ikhale gosa nga ha mavu.—Matayo 6:9, 10.
ATHU AKO ANA ZUELA EGI: “Nzambi wana tshigina egi tukhale mumona malamba.”
-
Itshi wajiya guawambela?
NDAGA WALONGUGA
Satana Diabulu nu Adama nu Eva ene adi ha gishina gia ndaga jiabola nu malamba ha mavu. Yehowa wana gudisagesa muavula mukunda nu malamba etu, gualeha ndo mbawudi guasugisa.
Mihu ya Guvutugila
-
Mambo atshi Satana gambidile Eva?
-
Malamba atshi gulumbuga gua Adama nu Eva guatubatele?
-
Luholo lutshi tudi mujiya egi Yehowa wana gudisagesa mukunda nu malamba etu?
NDAGA JIKO JIA NDANDO
Longuga ndaga Biblia yana zuela mukunda nu gubola.
Tanga longo edi ha gujiya milonga yazolele Satana Diabulu mu gilanga gia Edene.
“Pourquoi Dieu permet-il les souffrances?” (Inzo Yaleha ya Mutaledi ya 1 Janvier 2014 ya français)
Tala mvutu jiabonga jiatadila muhu wakola athu ana gudihula.
“Pourquoi la Shoah a-t-elle eu lieu? Pourquoi Dieu n’a-t-il rien fait?” (Longo edi didi mu jw.org)
Tala malongo azudile yala mumoshi gu ndaga yatadila malamba tuana mona mangino.
