LONGO DIA 32
Ufumu wa Nzambi udi Muhinyina Mangino!
Ufumu wa Nzambi wasendesele guhinyina mu dilu mu 1914. Uhinyinyi wa athu wasugile nji mu givo giene. Luholo lutshi tuajiya ndaga eyi? Tutadilenu profesi jia Biblia nu makalegelo a athu nu ndaga jiakalegewe ha mavu sendese mu 1914.
1. Itshi profesi jia Biblia jiadiangele guzuela?
Mukanda wa Danyele wana zuela egi Ufumu wa Nzambi mbawusendesa guhinyina gu gisugishilo gia sungi yana tamegewa egi: ‘Matangua sambadi.’ (Danyele 4:16, 17) Gungima dia ivo yavula, Yesu wazuelediele sungi yene, wayitamegele egi: “Tangua diatombewe mukunda nu ifutshi,” wamonesele egi tangua diene khenji diheta ndo gu gisugishilo. (Luka 21:24) Gifua luholo tuza guyimona, sungi ya matangua sambadi yahuile mu 1914.
2. Ndaga jitshi jiakalegewe ha mavu sendese mu 1914? Makalegelo a athu ana khala gikuatshi sendese mu givo giene?
Alandudi a Yesu amuhudile egi: “Gijiyishilo gitshi mbagimonesa tangua dia guvutuga guaye nu dia gisugishilo gia mavu awa?” (Matayo 24:3) Yesu waamonesele ndaga jiavula jidi naye gukalegewa tangua mbadisendesa muene guhinyina mu dilu gifua Fumu ya Ufumu wa Nzambi. Mukatshi dia ndaga jiene, watangele ita, nu nzala nu gudigita gua mavu. (Tanga Matayo 24:7.) Biblia yadiangele nji guzuela egi mu “masugu a gisugishilo, . . . lamba nu ndaga jiakola mbajikhala guene” mukunda nu makalegelo abola a athu. (2 Timote 3:1-5) Ndaga jiene nu makalegelo ene asendesele gumonega mu 1914.
3. Mukunda natshi ndaga jia ha mavu jiabolele muavula tangua Ufumu wa Nzambi wasendesele guhinyina?
Habuile Yesu Fumu ya Ufumu wa Nzambi, gungima dia tangua diazonda waluile itumba mu dilu nu Satana nu ba demo enji. Satana gabingilego. Biblia yana zuela egi: “Wabishidiwe ha mavu, nu anjelo enji abishidiwe n’enji.” (Gumonesa 12:9, 10, 12) Satana udi nu khabu jiabala handaga udi mujiya egi mbawushiyiwa. Gishina giene wana bata malamba nu usageshi wavula ha mavu. Hene, tuajiyilego gudihula luholo ndaga jia ha mavu jidi mubola muavula! Ufumu wa Nzambi mbawusugisa malamba awa agasue.
TUKAMBE GUJIYA NDAGA JIAVULA
Longuga ha gujiya mukunda natshi tuana zuela egi Ufumu wa Nzambi wasendesele guhinyina mu 1914, nu luholo ndaga eyi idi gugutadila.
4. Gula tuatanga tangua gu ndaga Biblia yadiangele guzuela, idi mumonega egi Ufumu wa Nzambi wasendesele guhinyina mu 1914
Nzambi watshitshile egi Fumu Nebukadenezale ya gu Babilona ikulu alote nzoji ya ndaga jinyi jiakhalele naye gukalegewa gutuama. Ukoteleshi wahanele Danyele mukunda nu nzoji yene wamonesele egi nzoji yene yakhalele mutadila ufumu wa Nebukadenezale nu Ufumu wa Nzambi.—Tanga Danyele 4:17. a
Tanga Danyele 4:20-26, gungima tala tablo didi ha mbongo ha guhana mvutu gu mihu eyi:
-
A) Itshi Nebukadenezale wamonele gu nzoji yenji?—Tala verse 20 nu 21.
-
B) Itshi yakhalele naye gubuila mutshi?—Tala verse 23.
-
C) Itshi yakhalele naye gubua gu suga ya ‘matangua sambadi’?—Tala verse 26.
Luholo Nzoji ya Mutshi idi Mumonesa Ufumu wa Nzambi
PROFESI (Danyele 4:20-36)
Ufumu
A) Mutshi wakoma
Ufumu wabemba guhinyina
B) ‘Batulenu mutshi,’ bembenu uu ‘matangua sambadi abalege’
Ufumu wasendesele luko guhinyina
C) ‘Mbaaguvutuila luko ufumu waye’
Gutagenesewa gua gitshinyi gia thomo gia profesi eyi . . .
-
D) Mutshi wakhalele mumonesa nanyi?—Tala verse 22.
-
E) Luholo lutshi ufumu wenji wabembele guhinyina?—Tanga Danyele 4:29-33.
-
F) Itshi yabuidile Nebukadenezale gu suga ya ‘matangua sambadi’?—Tanga Danyele 4:34-36.
GUTAGENESEWA GUA GITSHINYI GIA THOMO GIA PROFESI
Ufumu
D) Nebukadenezale, Fumu ya gu Babilone
Ufumu wabemba guhinyina
E) Gungima dia givo 606 gutuama dia guvualewa gua Yesu (G.G.Y.), Nebukadenezale wandalele malui (malaji), gakhalelego luko nu luholo lua guhinyina ivo sambadi
Ufumu wasendesele luko guhinyina
F) Nebukadenezale wavile muabonga, wasendesele luko guhinyina
Gutagenesewa gua gitshinyi gia mbadi gia profesi eyi . . .
-
G) Mutshi wakhalele mumonesa nanyi?—Tanga 1 Gudilanduluila 29:23.
-
H) Luholo lutshi ufumu wawo wabembele guhinyina? Luholo lutshi tudi mujiya egi ufumu wene wakhalelego luko muhinyina tangua diakhalele Yesu ha mavu?—Tanga Luka 21:24.
-
I) Tangua ditshi nu fundo ditshi ufumu wene wasendesele guhinyina luko?
GUTAGENESEWA GUA GITSHINYI GIA MBADI GIA PROFESI
Ufumu
G) Mafumu a Isalele khalele mumonesa uhinyinyi wa Nzambi
Ufumu wabemba guhinyina
H) Yelusalema yashiyiwe, mafumu a gu Isalele akhalelego luko nu luholo lua guhinyina ivo 2 520
Ufumu wasendesele luko guhinyina
I) Yesu wasendesa guhinyina mu dilu gifua Fumu ya Ufumu wa Nzambi
Luholo lutshi tuajiya gujiya uvudilo wa matangua sambadi?
Itshinyi yavula ya Biblia yana gutukuatesa ha gukotelesa muabonga itshinyi iko. Ha gufezegesa, mukanda wa Gumonesa wana zuela egi matangua thathu nu ndambo ana hana masugu 1 260. (Gumonesa 12:6, 14) Mutango wene udi naye gungina mbala jiyadi mu matangua sambadi, yakotelesa egi masugu 2 520. Matangua ako, Biblia yana kalegela mbimbi lusugu ha guzuelela givo. (Ezekiele 4:6) Hene, matangua sambadi adi mu mukanda wa Danyele adi mumonesa ivo 2 520.
5. Mavu asombegesele sendese mu givo 1914
Yesu wadiangele guzuelela luholo ndaga jia ha mavu mbajikhala tangua mbadibua muene Fumu mu dilu. Tanga Luka 21:9-11, gungima zuelelenu muhu owu:
-
Ndaga itshi mukatshi dia ndaga eji wana mona nga wana vua?
Mupostolo Phaula wamonesele luholo makalegelo a athu mbaakhala mu masugu a gisugishilo a uhinyinyi wa athu. Tanga 2 Timote 3:1-5, gungima zuelelenu muhu owu:
-
Makalegelo atshi mukatshi dia makalegelo awa udi mumona gudi athu mangino?
6. Uhinyinyi wa Ufumu wa Nzambi wana gutuhana gikhesa
Tanga Matayo 24:3, 14, gungima zuelelenu mihu eyi:
-
Mudimo utshi wa ndando udi mumonesa egi Ufumu wa Nzambi udi muhinyina mangino?
-
Luholo lutshi tuajiya guhana mago mu mudimo wene?
Ufumu wa Nzambi udi muhinyina mangino, gualeha ndo mbawuhinyina mavu agasue. Tanga Hebelu 10:24, 25, gungima zuelelenu muhu owu:
-
Itshi muthu wagasue mukatshi dietu udi naye gutshita luholo “lusugu lua Nzambi luasuena hehi”?
Gula wajiya ndaga imoshi yajiya gukuatesa athu ako nga guahuluisa, itshi wajiya gutshita?
ATHU AKO AJIYA GUHULA EGI: “Mukunda natshi Matemue a Yehowa ana zuelela muavula givo 1914?”
-
Itshi wajiya guzuela?
NDAGA WALONGUGA
Profesi jia Biblia nu matangua nu ndaga jia ha mavu awa jiana monesa diago egi Ufumu wa Nzambi udi muhinyina mangino. Tuana monesa egi tuana tshigina diago ndaga eyi tangua tuana longesa lukuma luabonga nu tuana guya mu gudibungisa gua mu hungu.
Mihu ya Guvutugila
-
Itshi yakalegewe gu suga ya matangua sambadi anyi Biblia yadiangele guzuelela mu mukanda wa Danyele?
-
Itshi idi gugutshiginyisa diago egi Ufumu wa Nzambi wasendesele guhinyina mu 1914?
-
Luholo lutshi wajiya gumonesa egi wana tshigina egi Ufumu wa Nzambi udi muhinyina mangino?
NDAGA JIKO JIA NDANDO
Tala luholo ndaga jiasonegele enya ndunge nu athu ako jiana monesa usombegeshi wakalegewe ha mavu sendese mu 1914.
“Depuis quand ce déclin brutal?” (Réveillez-vous! ya Avril 2007)
Tanga ha gumona luholo profesi idi mu Matayo 24:14 yasombegesele makalegelo a yala mumoshi.
“J’aimais le baseball plus que tout au monde!” (Inzo Yaleha ya Mutaledi No. 3 2017 ya français)
Luholo lutshi tudi mujiya egi profesi idi mu mukanda wa Danyele mukhapho 4 idi muzuelela Ufumu wa Nzambi?
Itshi idi mumonesa egi ‘matangua sambadi’ adi muzuelewa mu Danyele mukhapho 4 asugile mu 1914?
a Tala malongo mbadi a gisugishilo adi mu galuanda gadi muzuela egi Ndaga Jiko jia Ndando mu longo edi.
