LONGO DIA 34
Itshi Tuajiya Gutshita ha Gumonesa egi Tuana Zumba Yehowa?
Wana zumba Nzambi muavula sendese tangua wasendesele gulonguga Biblia ba? Udi mutshigina gulandula gukolesa ufuta waye n’enji ba? Gula idi ngenyi, jiya egi gula Yehowa wamona luholo udi gumuzumba, muene nji mbawuguzumba muavula. Luholo lutshi wajiya gumonesa egi wana gumuzumba?
1. Luholo lutshi tuajiya gumonesa egi tuana zumba Yehowa?
Tuana monesa egi tuana zumba Yehowa tangua tuana gumutumagela. (Tanga 1 Yone 5:3.) Muene ganushinjigago nga muthu mumoshi gu ngolo ha gumutumagela. Uvi, wana hana muthu wagasue mukatshi dietu luendu lua gutomba muene hakhenji gula udi naye gumutumagela nga ndo. Mukunda natshi? Handaga Yehowa wana tshigina egi ‘tumutumagele nu mutshima umoshi.’ (Roma 6:17) Mu guzuela guko, Nzambi gana tshigina ndo egi wumutumagele handaga udi naye gutumaga, uvi udi naye gumutumagela handaga wana gumuzumba. Gitshinyi gia 3 nu gia 4 gia mukanda owu mbayigukuatesa ha guzumba Yehowa nu ha gutshita ndaga jiana gumusuanguluisa, nu gutuna ndaga jinyi jianago gumusuanguluisa.
2. Mukunda natshi yajiya gukhala lamba ha guzumba Yehowa?
‘Muthu wabonga wana mona malamba avula.’ (Ngimbo 34:19) Mukut’etu agasue tuana tagana nu malamba handaga tushigo athu atagana. Tuajiya gutagana nu lamba dia makuta, usageshi nga malamba ako. Gula tuatagana nu malamba awa, yajiya gukhala lamba ha gutumagela Yehowa, ngenyi tuajiya gutshita ndaga jiabola. Uvi gula watshita ngolo ha gutshita ndaga jidi gugutoga Yehowa, mbawumonesa egi wana gumuzumba muavula gubalega ima yagasue. Mbawumonesa nji egi udi ya gujinginyina gudi muene. Muene nji mbawukhala ya gujinginyina gudi aye. Mbagagubembigo nga hazonda.—Tanga Ngimbo 4:3.
TUKAMBE GUJIYA NDAGA JIAVULA
Longuga ha gujiya mukunda natshi gutumagela Yehowa guana gumusuanguluisa, nu ndaga yajiya gugukuatesa ha gusala ya gujinginyina gudi muene.
3. Ndaga imoshi idi gugutadila aye
Ha gutadila ndaga jidi mu mukanda wa Yobo, Satana gafundjilego phamba Yobo, uvi wafundjile nji athu agasue ana tshigina gukombelela Yehowa. Tanga Yobo 1:1, 6–2:10, gungima zuelelenu mihu eyi:
-
Satana wazuelele egi Yobo wana tumagela Yehowa mukunda nu itshi?—Tala Yobo 1:9-11.
-
Itshi Satana gazuelele mukunda nu athu agasue, ikhale aye?—Tala Yobo 2:4.
Tanga Yobo 27:5b, gungima zuelelenu muhu owu:
-
Luholo lutshi Yobo wamonesele egi wakhalele diago muzumba Yehowa?
Yobo wamonesele egi wakhalele muzumba Yehowa hasalele muene ya gujinginyina
Tuana monesa egi tuana zumba Yehowa tangua tuana sala ya gujinginyina gudi muene
4. Suanguluisa Yehowa
Tanga Ishima 27:11, gungima zuelelenu mihu eyi:
-
Luholo lutshi Yehowa wana gudivua gula wamonesa gutema nu wamutumagela? Mukunda natshi?
5. Wajiya gusala ya gujinginyina gudi Yehowa
Guzumba guetu mukunda nu Yehowa guana gututuma ha gulongesa athu ako ndaga jiamutadila. Tuana tshita ngenyi ikhale ishigo yaleba handaga tuana khala ya gujinginyina gudi muene. Tala VIDEO, gungima zuelelenu mihu eyi yalandula.
-
Yana khala lamba gudi aye ha guwambela athu ako ndaga jiatadila Yehowa ba?
-
Mu video tuatala, itshi yakuatesele Grayson ha gukatula woma?
Idi yaleba ha gusala ya gujinginyina gudi Yehowa gula tudi muzumba ndaga jiana zumba muene nu tuatuna ndaga jinyi jiana tuna muene. Tanga Ngimbo 97:10, gungima zuelelenu mihu eyi:
-
Ha gutadila ndaga walonguga, ndaga jitshi Yehowa wana zumba? Ndaga jitshi jiana tuna muene?
-
Luholo lutshi wajiya gulonguga ha guzumba ndaga jiabonga nu gutuna ndaga jiabola?
6. Tuana heta gubonga gula tuatumagela Yehowa
Gutumagela Yehowa guana bata gubonga tangua diagasue. Tanga Yeshaya 48:17, 18, gungima zuelelenu mihu eyi:
-
Udi mutangiza egi tuajiya gusha mutshima egi Yehowa wana jiya muabonga ndaga jidi jiabonga mukunda nu esue ba? Mukunda natshi?
-
Luholo lutshi gulonguga Biblia nu giamatshidia giatadila Yehowa Nzambi wa giamatshidia guagubatele gubonga?
ATHU AKO ANA ZUELA EGI: “Ndaga ngana tshita jiana sagesa ndo Nzambi nga gumusuanguluisa.”
-
Verse itshi wajiya guatangela ha guamonesa egi ndaga tuana tshita jiajiya gusuanguluisa Yehowa nga gumuhana gikenene?
NDAGA WALONGUGA
Wajiya gumonesa egi wana zumba Yehowa gula wamutumagela nu wasala ya gujinginyina ikhale udi mutagana nu malamba.
Mihu ya Guvutugila
-
Malongo atshi wazula mu gifezegeselo gia Yobo?
-
Luholo lutshi wajiya gumonesa egi wana zumba Yehowa?
-
Itshi yajiya gugukuatesa ha gusala ya gujinginyina gudi Yehowa?
NDAGA JIKO JIA NDANDO
Tala luholo wajiya gusala ya gujinginyina gudi Yehowa nu mu hungu.
Longuga ndaga jiavula ha gumona luholo Satana wana funda athu agasue.
“L’intégrité de Job” (La Bible: quel est son message? gitshinyi 6)
Longuga ha gujiya luholo ana a zonda ajiya nji gumonesa egi ana zumba Yehowa.
Luholo lutshi muvuala wajiya gusala yagujinginyina gudi Yehowa ikhale mavuala ako adi gumutuma ha gutshita ndaga yabola?