LONGO DIA 35
Luholo Tuajiya Guzula ba Desizio Abonga
Mukut’etu agasue tuana khala nu ba desizio a guzula. Ba desizio ene avula ajiya gukhala abonga nga abola mukunda nu esue hakhetu nga mukunda nu Yehowa. Ha gufezegesa, tuajiya guzula desizio diatadila fundo mbatujinga, mudimo mbatukalagala, nga muthu mbatudizula n’enji mu ulo. Gula tuazula ba desizio abonga, tuajiya gukhala nu gusuanguluga mu monyo wetu, tuajiya nji gusuanguluisa Yehowa.
1. Luholo lutshi Biblia yajiya gugukuatesa ha guzula ba desizio abonga?
Gutuama dia guzula desizio, toga Yehowa mu gisambu ha gugukuatesa, tanga nji Biblia ha gumona matangi enji mukunda nu mulonga wene. (Tanga Ishima 2:3-6.) Matangua ako, Yehowa wana hana mukhuala mukunda nu ndaga yene. Gula idi ngenyi, mbayikhala yabonga gula wazula desizio dia gutumagela mukhuala wene.
Uvi itshi wajiya gutshita gula gushigo nu mukhuala wa Biblia udi mumonesa haphelo ndaga udi naye gutshita? Yehowa mbawugutuameza ‘mu njila udi naye gulandula.’ (Yeshaya 48:17) Luholo lutshi? Gudi nu malongo a Biblia ajiya gugutuameza. Malongo ene adi ndaga jia giamatshidia jiana monesa matangi a Nzambi nga luholo luana gudivua muene. Tuana jiya luholo Nzambi wana gudivua mukunda nu ndaga tudi mutagana najio tangua tudi mutanga Biblia. Gula tuakotelesa luholo ludi gudivua Yehowa, tuajiya guzula ba desizio abonga.
2. Ndaga jitshi tudi naye gutadila gutuama dia guzula desizio?
Biblia yana zuela egi: ‘Muthu watema ha guwenda wana gudikengelela.’ (Ishima 14:15) Yakotelesa egi gutuama dia guzula desizio, tudi naye guzula tangua dia gutangigiza ndaga tudi mutshigina gutshita. Gula watadila ndaga jiagasue muabonga, wajiya gudihula egi: ‘Malongo atshi a Biblia ngajiya gukalegela? Ndaga itshi yajiya gunguhana guhuima mu matangi? Desizio diami diajiya gusuanguluisa athu ako nga guahana lamba? Uvi muhu wa gubalega ndando udi egi, desizio diene mbadisuanguluisa Yehowa ba?’—Mikhuala 32:29.
Yehowa udi nu ufumu wa gutuwambela egi ndaga eyi idi yabonga uvi eyi idi yabola. Gula tudi mutshigina gujiya muabonga mikhuala nu malongo enji, nu tuazula desizio dia gualandula, tuana longesa mutshima wetu (conscience). Mutshima udi umuthu wa mukatshi wana gutuwambela gula ndaga imoshi ngenyi idi yabonga nga yabola. (Roma 2:14, 15) Mutshima wetu mbawutukuatesa ha guzula ba desizio abonga gula tudi guwulonga muabonga.
TUKAMBE GUJIYA NDAGA JIAVULA
Kamba gujiya muabonga luholo malongo a Biblia nu mutshima wetu wajiya gutukuatesa ha guzula ba desizio abonga.
3. Biblia yajiya gugutuameza
Luholo lutshi malongo a Biblia ajiya gututuameza tangua tudi mutshigina guzula ba desizio? Tala VIDEO, gungima zuelelenu mihu eyi yalandula.
-
Khapho ditshi dia ndando Yehowa watuhanele?
-
Mukunda natshi Yehowa watuhanele luendu lua gudizudila ba desizio?
-
Itshi Yehowa watuhanele yana gutukuatesa ha guzula ba desizio abonga?
Ha gumona gifezegeselo gia longo dia Biblia, tanga Efeso 5:15, 16. Gungima zuelelenu luholo wajiya gukalegela “tangua mu luholo luabonga” . . .
-
ha gutanga Biblia lusugu nu lusugu.
-
ha gukhala yala nga mukhetu wabonga mu ulo, mvuaji, nga mona wabonga mu fami.
-
ha guya mu gudibungisa gua mu hungu.
4. Longesa mutshima waye ha guzula ba desizio abonga
Gula gudi nu mukhuala wa Biblia watadila ndaga udi mutshigina gukalagala, yana khala yaleba ha gujiya ndaga ya gutshita. Uvi itshi wajiya gutshita gula mukhuala wa Biblia ushigo guene? Tala VIDEO, gungima zuelelenu muhu owu walandula.
-
Mu video tuatala, ndaga tshi phangi wa mukhetu watshitshile ha gulongesa mutshima wenji nu ha guzula desizio diajiya gusuanguluisa Yehowa?
Mukunda natshi tushigo naye gutoga athu ako ha guzula ba desizio ha fundo dietu? Tanga Hebelu 5:14, gungima zuelelenu mihu eyi:
-
Gula tuahula athu ako ndaga ajiya gutshita ha fundo dietu, ndaga itshi tudi naye gujiya gukhaphumuna muabonga?
-
Ikadigilo itshi yajiya gugukuatesa ha gulongesa mutshima waye nu ha guzula ba desizio abonga?
Mutshima wetu wana khala gifua karte, wana gutukuatesa ha guya fundo diagasue tuatshigina
5. Monesa egi wana tshigina nji luholo athu ako ana tadila ndaga
Athu agasue ana zulago ba desizio a luholo lumoshi. Luholo lutshi tuajiya gumonesa egi tudi munemesa luholo athu ako ana tadila ndaga? Tutadilenu ndaga eji mbadi:
Ndaga ya 1: Phangi mumoshi ya mukhetu wana tshigina gusudiga miphano tangua didi muene mutshita midimo yenji, uvi waya mu hungu dihe-dihe; mu hungu diene, aphangi a akhetu ana tshigina ndo gusudiga miphano.
Tanga Roma 15:1 nu 1 Kolinto 10:23, 24, gungima zuelelenu mihu eyi:
-
Ha gutadila verse eji, desizio ditshi phangi wa mukhetu wajiya guzula? Itshi wajiya gutshita gula udi fundo dimoshi nu muthu munu gashigo mutshigina ndaga inyi aye udi mumona egi ishigo yabola?
Ndaga ya 2: Phangi mumoshi wa yala wana jiya egi Biblia yana tunyisago gunua ndambo ya matombe, uvi muene watuna egi gajiyilego guanua. Mafut’enji amutamega ha guya mubalegesa n’enji tangua hamoshi, gungima aphangi ene asendesa gunua matombe.
Tanga Mulongeshi 7:16 nu Roma 14:1, 10, gungima zuelelenu mihu eyi:
-
Ha gutadila verse eji, desizio ditshi phangi wa yala wajiya guzula? Itshi wajiya gutshita gula wamona muthu mumoshi mutshita ndaga inyi aye wana tangiza egi idi yabola?
Ndaga jitshi jiajiya gugukuatesa ha guzula ba desizio abonga?
1. Toga Yehowa agukuatese ha guzula desizio gu ndaga udi naye gutshita.—Yakoba 1:5.
2. Tshita ba recherche mu Biblia nu mikanda yetu ha gumona malongo a Biblia ajiya gugukuatesa. Wajiya nji guta maga nu Aklisto a gukula mu nyuma.
3. Tangiza ndaga jiajiya gugubuila gungima mukunda nu desizio diaye nu jiajiya nji gubuila athu ako.
ATHU AKO ANA ZUELA EGI: “Wajiya gutshita ndaga yagasue watshigina. Nanyi wana gudisagesa gu ndaga jia athu ako?”
-
Mukunda natshi tudi naye gutadila matangi a Nzambi, nu luholo athu ako ana gudivua?
NDAGA WALONGUGA
Tuana zula ba desizio abonga tangua tuana kamba gujiya matangi a Nzambi mukunda nu mulonga tudi nawo, nu tangua tuana kamba gujiya gula makalegelo etu ajiya gukuatesa athu ako nga guahana lamba.
Mihu ya Guvutugila
-
Luholo lutshi wajiya guzula ba desizio adi musuanguluisa Yehowa?
-
Luholo lutshi wajiya gulongesa umuthu waye wa mukatshi?
-
Luholo lutshi wajiya gumonesa egi udi munemesa luholo athu ako ana tadila ndaga?
NDAGA JIKO JIA NDANDO
Luholo lutshi wajiya guzula ba desizio anyi ajiya gukolesa ufuta waye nu Nzambi?
“Prenons des décisions qui honorent Dieu” (Inzo Yaleha ya Mutaledi ya 15 Avril 2011 ya français)
Longuga ndaga jiavula ha gujiya luholo Yehowa wana gutuhana malongo.
Tala ndaga jiakuatesele yala mumoshi ha guzula desizio mu ndaga imoshi ya lamba.
Longuga ndaga jiavula ha gujiya luholo wajiya gusuanguluisa Yehowa ikhale gahanelego mukhuala mu ndaga imoshi ngenyi udi mutshigina gutshita.
“Vous faut-il un commandement pour tout?” (Inzo Yaleha ya Mutaledi ya 1 Decembre 2003 ya français)