LONGO DIA 38
Nemesa Monyo
Tuajiya gutshita ndaga jiavula jia gushimana nu gukhala nu gusuanguluga handaga tudi nu monyo. Ikhale tudi mutagana nu malamba, tuajiya gusuanguluga nu ndaga jiko mu monyo wetu. Luholo lutshi tuajiya gumonesa egi tuana hana Yehowa mersi mukunda nu monyo watuhanele muene? Ndaga itshi yajiya gututuma diago ha gumuhana mersi?
1. Mukunda natshi tudi naye guzula monyo nu ndando?
Tudi naye guzula monyo nu ndando handaga udi khapho diatuhuile Yehowa Sh’etu wa guzumba. Muene udi ‘gito gia monyo’—wafugile ima yagasue idi nu monyo. (Ngimbo 36:9) “Muene wana hana athu agasue monyo nu muhehe nu ima yagasue.” (Makalegelo 17:25, 28) Yehowa wana gutuhana ima tudi naye funu ha gukhala nu monyo. Uvi ndaga yabalega ndando idi egi, wana gutukuatesa ha gukhala nu gusuanguluga mu monyo wetu.—Tanga Makalegelo 14:17.
2. Luholo lutshi tuajiya gumonesa Yehowa egi tuana zula monyo nu ndando?
Yehowa wana gugukuatesa sendese tangua wakhalele mu vumo dia mama waye. Nyuma ya Nzambi yakuatesele Davidi, mukombeledi wa Nzambi ha gumuwambela egi: ‘Meso aye angumonele tangua ngakhalele mu vumo.’ (Ngimbo 139:16) Yehowa wana zula monyo waye nu ndando. (Tanga Matayo 10:29-31.) Wana vua diago lamba diavula gula muthu wadishiya nga gula washiya muthu muko. a (Guzoga 20:13) Yehowa wana gudisagesa nji gula tuahaga monyo wetu mu gingonza nga ndo gula tushigo mutshita nga gima gimoshi ha gubamba monyo wa athu ako. Gula tuabamba monyo wetu muabonga nu tudi munemesa monyo wa athu ako, tudi diago mumonesa egi tuana zula monyo nu ndando handaga udi kado gatuhuile Yehowa.
TUKAMBE GUJIYA NDAGA JIAVULA
Tala maluholo wajiya gumonesa egi wana zula monyo nu ndando.
3. Bamba sante yaye muabonga
Gula Muklisto wadihana gudi Nzambi, wana gumulaya ha gutshita ndaga jiana tshigina muene, hene udi naye guhana monyo wenji wagasue gudi Yehowa. Idi gifua wamuhana muila wenji gifua mulambu. Tanga Roma 12:1, 2, gungima zuelelenu mihu eyi:
-
Itshi idi naye gugutuma ha gubamba sante yaye muabonga?
-
Mu maluholo atshi wajiya gubamba sante yaye?
4. Monesa gutema mu ndaga jiagasue udi mukalagala hagula nga muthu mumoshi ganamanago nga gufua
Biblia yana gututemesa ha gutuna makalegelo ajiya gumba monyo wetu mu gingonza. Tala VIDEO ha gujiya ndaga wajiya gutshita ha gudibamba.
Tanga Ishima 22:3, gungima zuelelenu luholo aye nu athu ako muajiya gudibamba . . .
-
gu inzo.
-
ha fundo dia mudimo.
-
tangua mudi mutshita saga.
-
tangua udi mu gamiyo nga ha moto.
5. Nemesa monyo wa mona udi mu vumo
Davidi wamonesele egi Yehowa wana gudisagesa muavula mu ndaga jiagasue jiana buila mona udi mu vumo dia gin’enji. Tanga Ngimbo 139:13-17, gungima zuelelenu muhu owu:
-
Gu meso a Yehowa, monyo wa muthu wana sendesa hadi gin’enji gu vumo nga tangua mona wana vualewa?
Mikhuala Yehowa wahanele enya Isalele yakhalele mubamba mukhetu nu mun’enji udi mu vumo. Tanga Guzoga 21:22, 23, gungima zuelelenu mihu eyi:
-
Luholo lutshi Yehowa wakhalele mutadila muthu wakhalele mushiya mona udi mu vumo gu aksida?
-
Luholo lutshi Yehowa wana gudivua gula muthu washiya muthu muko nu khuta yagasue? b
-
Udi mutangiza egi mukhuala wa Nzambi watadila ndaga eyi udi wabonga ba?
Matangua ako, ikhale mukhetu munu wana mona egi monyo udi nu ndando, wajiya gutangiza egi phamba udi naye guzola vumo ha gukhala muabonga. Tanga Yeshaya 41:10, gungima zuelelenu mihu eyi:
-
Gula athu adi mushinjiga mukhetu mumoshi ha guzola vumo, udi naye gutoga ukuateshi gudi nanyi? Mukunda natshi?
ATHU AKO ANA ZUELA EGI: “Mukhetu wagasue udi naye gutomba gula udi naye guzola vumo, handaga udi muila wenji.”
-
Itshi idi gugutshiginyisa egi Yehowa wana zula nu ndando monyo wa mama nu wa mun’enji udi mu vumo?
NDAGA WALONGUGA
Biblia yana gutulongesa ha guzumba monyo, nu guwunemesa, nu guwubamba handaga udi khapho Yehowa watuhanele. Yakotelesa egi monyo wetu nu wa athu ako.
Mihu ya Guvutugila
-
Mukunda natshi monyo wa muthu wana khala nu ndando gu meso a Yehowa?
-
Luholo lutshi Yehowa wana gudivua gula muthu mumoshi washiya muthu muko?
-
Mukunda natshi udi naye guhana mersi mukunda nu monyo watuhanele Yehowa?
NDAGA JIKO JIA NDANDO
Luholo lutshi tuajiya guhana Yehowa mersi mukunda nu monyo watuhanele muene?
Tanga longo edi ha guheta mvutu gu muhu owu: Nzambi wajiya gutotesela mukhetu yonu wazolele gale vumo ba?
“L’avortement: qu’en dit la Bible?” (Longo edi didi mu jw.org)
Luholo Nzambi wana talela monyo luajiya gutukuatesa ha gutuna gutshita saga jinyi jiajiya gumba monyo wetu mu gingonza.
“‘Sports de l’extrême’: doit-on faire abstraction des risques?” (Réveillez-vous! ya 8 Octobre 2000)
Itshi muthu wajiya gutshita gula matangi a gudishiya adi gumujila? Tala luholo Biblia yajiya gumukuatesa.
a Yehowa wana gudisagesa muavula mukunda nu athu adi nu gikenene. (Ngimbo 34:18) Wana kotelesa muabonga lamba dinyi diajiya gutuma muthu ha gudishiya, wana khala nji hehi ha gumukuatesa. Ha gumona luholo Yehowa wajiya gukuatesa muthu muene, tanga longo didi muzuela egi: “Je veux mourir—Est-ce que la Bible peut m’aider si j’ai des idées suicidaires?” didi mu gitshinyi “Ndaga Jiko jia Ndando” mu longo edi.
b Muthu munu wazolele gale vumo gashigo naye gulandula gudisagesa mukunda nu ndaga yene, handaga Yehowa wajiya gumutotesela. Ha gujiya ndaga jiavula, tala longo didi muzuela egi: “L’avortement: qu’en dit la Bible?” didi mu gitshinyi “Ndaga Jiko jia Ndando” mu longo edi.
