LONGO DIA 40
Luholo Lutshi Tuajiya Gukhala Athu Aphelegeta gu Meso a Nzambi?
Tangiza gale mama mumoshi wa guzumba udi mulondega mun’enji ha guya gu khalasa. Udi mutala muabonga ha gujiya gula mona muene wazui meya muabonga nu wasudiga milele yaphelegeta. Gutshita ngenyi guana kuatesa mona ha gukhala nu sante yabonga nu yana monesa egi mvuaji jienji jiana gudisagesa mukunda nu muene. Luholo lumoshi nji, Yehowa, Tata wetu wa guzumba wana tshigina egi tukhale athu a phelegeta mu muila, tukhale nji nu makalegelo abonga. Gula tudi athu aphelegeta, tuana heta gubonga esue hakhetu nu tuana tumbuisa nji Yehowa.
1. Luholo lutshi tuajiya gukhala athu aphelegeta mu muila?
Yehowa wana gutuwambela egi: “Mudi naye gukhala athu a gijila.” (1 Phetelo 1:16) Ha gukhala athu a gijila, tudi naye gukhala athu aphelegeta mu muila nu mu makalegelo. Tuajiya gukhala athu aphelegeta gula tudi muzua meya tangua diagasue, tudi muweva milele yetu, tudi mulonda muabonga inzo yetu nga gamiyo getu. Tuajiya nji gukuatesa ha guweva Inzo yetu ya Ufumu. Gula tudi athu aphelegeta, tuana tumbuisa Yehowa.—2 Kolinto 6:3, 4.
2. Makalegelo atshi tudi naye gubemba ha gukhala athu aphelegeta?
Biblia yana gutuwambela egi “tudiwevenu gu ima yagasue yana gubuisa muila nga matangi etu usala.” (2 Kolinto 7:1) Hene, tudi naye gutuna ima yagasue yajiya gubolesa muila nga matangi etu. Ndaga tuana tangiza jidi naye gusuanguluisa Yehowa, ngenyi tudi naye gutshita ngolo ha gukatula matangi abola. (Ngimbo 104:34) Tudi naye nji gutshita ngolo ha guzuela mbimbi jiabonga.—Tanga Kolosai 3:8.
Ndaga jitshi jiko jiajiya gutubuisa enya usala mu muila nu mu makalegelo? Ima iko athu ana dia nga gunua yajiya gubolesa muila wetu. Ha gufezegesa, tudi naye gutuna ima gifua makaya, matombe abala, diamba nga ima iko yabala. Gula tuatuna ima eyi, mbatukhala nu sante yabonga, mbatumonesa nji egi tuana nemesa monyo handaga udi khapho diatuhuile Nzambi. Tudi naye nji gutshita ngolo ha gukhala nu makalegelo abonga; tudi naye gutuna makalegelo abola gifua gukenesa itshinyi ya gubungishila muila nga gutala pornografi. (Ngimbo 119:37; Efeso 5:5) Yajiya gukhala lamba ha gubemba makalegelo awa, uvi Yehowa wajiya gugukuatesa ha guabemba.—Tanga Yeshaya 41:13.
TUKAMBE GUJIYA NDAGA JIAVULA
Tutadile luholo tuana tumbuisa Yehowa gula tudi athu aphelegeta, nu luholo tuajiya gubemba makalegelo abola.
3. Gukhala athu aphelegeta guana tumbuisa Yehowa
Gula tuatanga mikhuala Yehowa wahanele enya Isalele, tudi diago mukotelesa egi Yehowa wana tshigina egi akombeledi enji akhale athu aphelegeta. Tanga Guzoga 19:10 nu 30:17-19, gungima zuelelenu mihu eyi:
-
Luholo lutshi verse eji jidi mumonesa egi Yehowa wana tshigina egi akombeledi enji akhale athu aphelegeta?
-
Makalegelo atshi abonga ajiya gugukuatesa ha gukhala muthu waphelegeta?
Yana toga tangua nu ngolo jiavula ha gukhala muthu waphelegeta. Uvi tuajiya gukhala athu aphelegeta ikhale tuana jinga fundo ditshi, tudi enya umonyi nga tudi getu phutu. Tala VIDEO, gungima zuelelenu muhu owu walandula.
-
Mukunda natshi athu tuana longesa giamatshidia ajiya gunemesa Yehowa gula amona egi ima yetu idi yaphelegeta?
4. Bemba makalegelo abola
Yehowa wajiya gutukuatesa ha gubinga khadilo diagasue diabola
Gula wana nua makaya nga ima iko yabala, yajiya gukhala lamba mukunda nu aye ha gubemba khadilo diene. Itshi yajiya gugukuatesa? Tutadile malamba ajiya gugubuila mukunda nu khadilo diene. Tanga Matayo 22:37-39, gungima zuelelenu luholo makaya nu ima iko yabala yajiya gubolesa . . .
-
ufuta wa muthu nu Yehowa.
-
muthu nu enya fami yenji nu athu ako ana khala nawo hehi.
Dilondege ha gubinga makalegelo abola. a Tala VIDEO.
Tanga Filiphi 4:13, gungima zuelelenu muhu owu:
-
Luholo lutshi programe yabonga ya gutshita gisambu, gulonguga Biblia nu guya mu gudibungisa gua mu hungu guajiya gukuatesa muthu ha gubemba makalegelo abola?
5. Kamba luholo lua gubemba matangi nu makalegelo abola
Tanga Kolosai 3:5, gungima zuelelenu mihu eyi:
-
Luholo lutshi tudi mujiya egi gutala pornografi, nu guditumila ba mesaje nga foto nga ba video a ndaga jia musonyi, nu gudikenesa nu itshinyi ya gubungishila muila idi ndaga jia usala gu meso a Yehowa?
-
Udi mutangiza egi idi ndaga yabonga luholo Yehowa wana gututoga ha gukhala nu makalegelo abonga ba? Mukunda natshi?
Tala luholo wajiya gutshita ngolo ha gubemba matangi abola. Tala VIDEO.
Yesu wahanele gifezegeselo gidi mumonesa egi tudi naye gutshita ngolo ha gukhala nu makalegelo abonga mu ndaga jiagasue. Tanga Matayo 5:29, 30, gungima zuelelenu muhu owu:
-
Yesu gatshiginyilego guzuela egi tudi naye gudikalegela gubola, uvi watshiginyile gumonesa egi tudi naye gutshita ngolo ha gutuna matangi abola. Desizio dia luholo lutshi muthu udi naye guzula ha gubemba gutangiza ndaga jiabola? b
Gula udi mutshita ngolo ha gubemba gutangiza ndaga jiabola, jiya egi Yehowa wana mona ndaga udi mutshita. Tanga Ngimbo 103:13, 14, gungima zuelelenu muhu owu:
-
Gula udi mutshita ngolo ha gubemba khadilo dimoshi diabola, luholo lutshi verse eji jiajiya gugukuatesa ha gulandula gutshita ngolo?
Ulebigo muila gula wabua!
Wajiya gutangiza egi, ‘luholo ngabua ishigo luko nu ndando ha gulandula gutshita ngolo.’ Uvi ujimbilago egi: Gula muthu udi muzula phushi wakhakhuga, wabua, ishigo mukotelesa egi wabuila diago, nga ndo egi udi naye guvutugila phushi gu gisendeselo. Luholo lumoshi nji, gula watshita luko ndaga imoshi yabola, ishigo mukotelesa egi mbawushigo mubemba khadilo diene diabola. Ishigo nji mukotelesa egi ndaga jiagasue wana tshita ha gubemba khadilo diene jidi jia gituhu. Jiya egi luholo udi mutshita ngolo ha gubemba khadilo dimoshi diabola, matangua ako wajiya gudivutugila. Hene, ulebigo muila! Yehowa wajiya gugukuatesa ha gubinga khadilo diene.
ATHU AKO ANA ZUELA EGI: “Ngajiyilego gubemba khadilo diami ngana khala gale nadio.”
-
Verse itshi wajiya gutangela athu ene ha guamonesa egi Yehowa wajiya guakuatesa ha gubemba khadilo diene diabola?
NDAGA WALONGUGA
Tuana suanguluisa Yehowa tangua tuana bamba muila wetu, nu matangi etu nu makalegelo etu aphelegeta.
Mihu ya Guvutugila
-
Mukunda natshi idi nu ndando ha gukhala athu aphelegeta?
-
Luholo lutshi wajiya gukhala muthu waphelegeta mu muila?
-
Itshi wajiya gutshita ha gubamba matangi nu makalegelo abonga?
NDAGA JIKO JIA NDANDO
Ndaga jitshi jiazonda-zonda wajiya gutshita ha gukhala muthu waphelegeta ikhale ushigo nu umonyi wavula?
Weva Mago Tangua Diagasue ha Gukhala nu Sante Yabonga (3:01)
Tala ndaga wajiya gutshita ha gubemba gunua makaya.
Tala malamba pornografi yajiya gugubatela.
“La pornographie: inoffensive ou dangereuse?” (Inzo Yaleha ya Mutaledi ya 1 Aout 2013 ya français)
Tanga longo edi ha gumona luholo yala mumoshi wabembele khadilo dia gutala pornografi.
“J’ai échoué bien des fois avant de réussir” (Inzo Yaleha ya Mutaledi No. 4 2016 ya français)
a Mu gitshinyi Ndaga Jiko jia Ndando gidi mu longo edi gidi nu gamuto ga lumene gadi muzuela egi: “Comment arrêter de fumer.” Malongo adi mukatshi adi mukotelesa ndaga muthu wajiya gutshita ha gubinga khadilo dimoshi diabola.
b Ha gumona luholo wajiya gubemba khadilo dia gudikenesa nu itshinyi ya gubungishila muila, tala mukanda Les jeunes s’interrogent. Réponses ratiques (volume 1), mukhapho 25 udi muzuela egi: “Comment arrêter de me masturber?”