Ha mavu agasue, athu ana tadila matombe mu maluholo a gudisha. Athu ako ana suanguluga gunua matombe hamoshi nu mafuta awo. Ako ana guanua ndo. Uvi ako ana nua matombe avula, ana guakuata nji. Itshi Biblia yana zuela mukunda nu matombe?

1. Idi ndaga yabola ha gunua matombe ba?

Biblia yana tunyisa ndo gunua matombe. Tangua Biblia yana tanga makhapho atuhanele Nzambi, yana zuela egi: ‘Matombe ana suanguluisa mutshima wa muthu.’ (Ngimbo 104:14, 15) Biblia yana tanga mala nu akhetu a gujinginyina gudi Nzambi akhalele munua matombe.​—1 Timote 5:23.

2. Longo ditshi Biblia yana hana athu anyi ana nua matombe?

Yehowa gana tshigina ndo egi tunue matombe avula nga tukuatewe matombe. (Galatiya 5:21) Biblia idi muzuela egi: ‘Ukuatshigo ufuta nu athu ana nua matombe avula.’ (Ishima 23:20) Hene, gula tudi munua matombe​—ikhale tangua tudi hakhetu—​tushigo naye gunua matombe avula ajiya gutubuisa wuga, nga tobo-tobo nga gutshita ndaga jiabola; tudi naye gubamba sante yetu. Gula ushigo mujiya uvudilo wa matombe wana nua, wajiya gubemba guanua.

3. Luholo lutshi tuajiya gunemesa desizio dia athu ako mu ndaga yatadila matombe?

Muthu wagasue udi naye guzula desizio dia gunua matombe nga ndo. Tushigo naye gumona gubola gula muthu udi munua matombe mu luholo luabonga; tushigo naye nji gushinjiga athu ako ha gunua matombe. (Roma 14:10) Gula gunua matombe gudi mutuma athu ako ha gubua mu gubola, tudi naye gubemba guanua. (Tanga Roma 14:21.) Tushigo naye gukamba ‘phamba gubonga guetu, uvi tukambe nji gubonga gua athu ako.’​—Tanga 1 Kolinto 10:23, 24.

 TUKAMBE GUJIYA NDAGA JIAVULA

4. Zula desizio gula udi naye gunua matombe nga ndo

Luholo lutshi Yesu wakhalele mutadila gunua matombe? Ha guheta mvutu, tutadile ndaga ya gushimana ya thomo yakalegele muene. Tanga Yone 2:1-11, gungima zuelelenu mihu eyi:

• Ha gutadila ndaga eyi ya gushimana, luholo lutshi Yesu wakhalele mutadila matombe nu athu anyi akhalele guanua?

• Yesu gatunyishilego gunua matombe, na luholo lutshi Muklisto udi naye gutadila muthu udi munua matombe?

Ikhale Muklisto gatunyishiwego gunua matombe, ishigo mukotelesa egi wajiya genji guanua tangua diagasue. Tanga Ishima 22:3, gungima zuelelenu luholo ndaga eji jialandula jiajiya gugutuma ha gunua matombe nga ndo:

• Gula udi muwendesa gamiyo nga udi mukalegela mashinyi ako.

• Gula udi gu vumo.

• Gula munganga wagutunyishile gunua matombe.

• Gula ushigo mujiya uvudilo wa matombe udi naye gunua.

• Gula mukhuala wa leta udi mutunyisa gunua matombe (alcool).

• Gula udi nu muthu munu wana tuna gunua matombe handaga mu masugu abalega wakhalele mukuatewa matombe.

Wajiya guhana athu matombe gu fete ya ulo nga gu fete jiko ba? Ha gujiya ndaga yajiya gugukuatesa ha guzula desizio, tala VIDEO.

Tanga Roma 13:13 nu 1 Kolinto 10:31, 32. Gungima dia gutanga mukhapho wagasue, zuelelenu muhu owu:

• Luholo lutshi gukalegela longo edi guajiya gugukuatesa ha guzula desizio dinyi mbadisuanguluisa Yehowa?

 5. Jiya uvudilo wa matombe udi naye gunua

Gula wazula desizio dia gunua matombe, udi naye gujiya egi: Ikhale Yehowa gatunyishilego gunua matombe, uvi wana zuela egi gunua matombe avula gudi ndaga yabola. Mukunda natshi? Tanga Hoshea 4:11, 18, gungima zuelelenu muhu owu:

• Itshi yajiya gubuila muthu munu udi munua matombe avula?

Itshi yajiya gutukuatesa ha gubemba gunua matombe avula? Tudi naye gukamba gudijiya muabonga. Tanga Ishima 11:2, gungima zuelelenu muhu owu walandula:

• Mukunda natshi idi ndaga yabonga ha gujiya uvudilo wa matombe tudi naye gunua?

6. Ndaga yajiya gukuatesa muthu ha gubemba gunua matombe avula

 NDAGA WALONGUGA

Yehowa watuhanele matombe ha gutusuanguluisa, uvi wana gututunyisa egi tukuatewago matombe nga guanua avula.

Mihu ya Guvutugila

• Luholo lutshi Biblia yana tadila matombe?

• Malamba atshi ajiya gugubuila gula udi munua matombe avula?

• Luholo lutshi tuajiya gunemesa desizio dia athu ako mu ndaga yatadila gunua matombe?