LONGO DIA 47

Udi Hehi ha Gubatijiwa Ba?

TEGELELA MU

Walonguga ndaga jiavula jiatadila Yehowa mu ulongugi waye wa Biblia. Yajiya gukhala egi wasombegesa makalegelo aye mu ndaga jiko, ha gutumagela ndaga walonguga. Uvi, guajiya gukhala nu ndaga iko yajiya gugutuma ha gutangiza egi ushigo hehi ha gudihana gudi Yehowa nu gubatijiwa. Longo edi diza muzuelela ndaga jiajiya gugukanga njila ha gubatijiwa, nu luholo wajiya gubinga ndaga jiene.

1. Ndaga guvula gutshi udi naye gulonguga gutuama dia gubatijiwa?

Ha gubatijiwa, udi naye gukhala nu “ujiyi wa diago wa giamatshidia.” (1 Timote 2:4) Ishigo mukotelesa egi udi naye gujiya mvutu jia mihu yagasue ya Biblia gutuama dia gubatijiwa. Ikhale Aklisto anyi abatijiwe gale mualeha, ana landula gulonguga. (Kolosai 1:9, 10) Uvi udi naye gukotelesa muabonga malongo a gisendeselo a Biblia. Akulu a mu hungu mbaagukuatesa ha gujiya gula aye mujiya malongo ene muabonga.

2. Ndaga jitshi udi naye gukalagala gutuama dia gubatijiwa?

Gutuama egi ubatijiwe, udi naye ‘gubalumuna mutshima . . . nu gusombegesa makalegelo aye.’ (Tanga Makalegelo 3:19.) Yakotelesa egi udi naye gudibela mangololo mukunda nu gubola guagasue wakalegele mu masugu abalega nu gutoga Yehowa ha gugutotesela. Udi naye gutuna makalegelo agasue abola, nu gukalagala ndaga jidi musuanguluisa Nzambi. Udi naye nji gusendesa guya mu gudibungisa gua mu hungu nu gulongesa lukuma luabonga hamoshi nu aphangi mu hungu.

3. Mukunda natshi ushigo naye gubemba egi woma uguvutule gungima?

Athu ako ana vua woma egi mbala jiko mbaashigo mutagenesa ndaga alayele Yehowa. Idi yadiago egi matangua ako wajiya gujimbila; akombeledi a Nzambi a mu tangua dikulu tuana tanga mu Biblia akalegele nji ndaga jiabola. Uvi Yehowa gana toga ndo egi akombeledi enji akhale athu atagana. (Tanga Ngimbo 103:13, 14.) Muene wana suanguluga tangua udi mutshita ngolo ha gukalagala ndaga jiabonga! Mbawugukuatesa. Yehowa wana gutuwambela egi gushigo nga gima gimoshi giajiya “gutukhaphumuna mu guzumba [guenji].”—Tanga Roma 8:38, 39.

TUKAMBE GUJIYA NDAGA JIAVULA

Tala luholo wajiya gujiya Nzambi muabonga nu gutshigina ukuateshi wenji hagula ubinge ndaga jiajiya gugukanga njila ha gubatijiwa.

4. Jiya Yehowa muabonga

Mukunda natshi udi naye gujiya Yehowa muabonga gutuama dia gubatijiwa? Udi naye gumujiya muabonga ha gumuzumba nu gumusuanguluisa. Tala VIDEO ha gumona luholo mala nu akhetu a ha mavu agasue anyi ana longuga Biblia ana kalagala ndaga yene. Gungima zuelelenu muhu owu walandula.

VIDEO: Njila idi Mubata gu Gubatijiwa (3:56)

Mu video eyi tuatala, itshi yakuatesele athu ako ha gudilondega mukunda nu gubatijiwa?

Tanga Roma 12:2, gungima zuelelenu mihu eyi:

Wana khala nu ba dute mu malongo a Biblia nga ha gutshigina egi Matemue a Yehowa ana longesa diago giamatshidia ba?
Gula idi ngenyi, itshi wajiya gutshita?

5. Wajiya gubinga ndaga jiajiya gugukanga njila ha gubatijiwa

Mukut’etu agasue tuana tagana nu malamba tangua tuana zula desizio dia gudihana gudi Yehowa nu gubatijiwa. Ha gufezegesa, tala VIDEO, gungima zuelelenu mihu eyi yalandula.

VIDEO: Tuajiya Gubinga Ndaga Jiajiya Gutukanga Njila ha Gubatijiwa Gula Tudi Muzumba Yehowa (5:22)

Mu video eyi, ndaga jitshi Narangerel wakhalele naye gubemba ha gukombelela Yehowa?
Luholo lutshi guzumba guenji mukunda nu Yehowa guamukuatesele ha gubinga ndaga jiene?

Tanga Ishima 29:25 nu 2 Timote 1:7, gungima zuelelenu muhu owu:

Itshi yana gutuhana ngolo ha gubinga malamba?

6. Sha mutshima mu ukuateshi wa Yehowa

Yehowa mbawugukuatesa ha gumusuanguluisa. Tala VIDEO, gungima zuelelenu mihu eyi yalandula.

VIDEO: Yehowa Nzambi Mbawugukuatesa (2:50)

Mu video eyi tuatala, itshi yakhalele mukanga muthu wakhalele mulonguga Biblia njila ha gubatijiwa?
Ndaga itshi yalongugile muene yamukuatesele ha gushila Yehowa mutshima?

Tanga Yeshaya 41:10, 13, gungima zuelelenu muhu owu:

Mukunda natshi wajiya gusha mutshima egi mbawutagenesa ndaga walayele Yehowa mu lusugu wadihanele gudi muene?

7. Khala muhana mersi mu luholo Yehowa wana guguzumba

Gula watangiza muavula luholo Yehowa wana guguzumba, mbawumuhana mersi nu mbawumukombelela mayilago. Tanga Ngimbo 40:5, gungima zuelelenu muhu owu:

Ishimbigo itshi ya Yehowa yana gugusuanguluisa muavula?

Profete Yelemiya wakhalele muzumba Yehowa nu mbimbi yenji muavula, wakhalele nji musuanguluga muavula nu mudimo wenji wa gulongesa jina dia Yehowa. Wazuelele egi: ‘Mbimbi yaye yasuanguluishile mutshima wami, handaga ngana bata jina diaye, O Yehowa Nzambi.’ (Yelemiya 15:16) Wajiya guhana mvutu jia mihu eyi: