LONGO 11
Athu Asonegele Lumene Lua Yesu
Wamona athu adi ha foto?— Majina awo Matayo, Mako, Luka, Yone, Phetelo, Yakoba, Yuda, nu Pholo. Athu ene akhadile ha mavu mutangua dia Yesu. Tute mene jiawo.
Mala awa adi akhuatshi?
Mukatshi diawo muakhadile atumiwi thatu akhadile gulongesa nu Yesu. Wajiya majina awo ba?— Matayo, Yone, nu Phetelo. Matayo nu Yone akhadile atumiwi ajiyile Yesu muabonga, hene muthu nu muthu mukhatshi diawo, wasonegele mukanda wazuelela monyo wa Yesu. Mutumiwi Yone wasonegele luko mukanda watamegewa egi Yatuwuwe nu mikanda iko thatu yatamegewa: 1 Yone, 2 Yone nu 3 Yone. Mutumiwi Phetelo wasonegele mikanda mbadi mu Biblia. Majina amikanda yene 1 Phetelo nu 2 Phetelo. Mu mukanda wenji wambadi, Phetelo watele lumene luholo Yehowa azuelele mudilu, hamulonga nu Yesu egi: ‘You udi mun’ami. Ngana gumuzumba, wana gungusuanguluisa.’
Athu ako adi ha foto asonegele mikanda yamene jia Yesu. Mumoshi jina dienji Mako. Yajiya gukhala egi wamonele luholo Yesu akuatewe. Muthu muko Luka. Muene wakhadile Munganga, yajiya gukhala egi wabuile muklisto gungima dia gufua gua Yesu.
Asonegi ako a Biblia mbadi udi mumona ha foto akhadile alenge a Yesu. Wajiya majina awo ba?— Majina awo Yakoba nu Yuda. Hathomo, akhadileko gutshigina Yesu ndo. Akhadile gumumona gifua muthu watshigina gukata malui. Uvi gungima amutshiginyile, hene abuile Aklisto.
Musonegi wa Biblia wasuga udi mumona ha foto jina dienji Pholo. Gutuama dia gubua muklisto, jina dienji diakhadile Saula. Wakhadile mbalagaji ya aklisto, waamonesele lamba diavula. Itshi yatumine Pholo hagubua Muklisto?— Lusugu lumoshi, Pholo wayile munjila, wavile mbimbi ya muthu yakatugile mudilu yakhadile guzuela nenji. Yakhadile Yesu! Wahudile Pholo egi: ‘mukunda n’atshi udi mumonesa athu ami lamba?’ Gungima dia ndaga yene, Pholo wabalumuine khadilo dienji, wabuile muklisto. Pholo wasonegele mikanda ya Biblia 14, sendesa mukanda wa Lomo uu nu mukanda wa Hebelu.
Tuana gutanga Biblia masugu agasue, ishiko luholo luene ndo ba?— Tangua tuana tanga Biblia, tuana gulonguga ndaga jiavula jia tadila Yesu. Watshigina gujiya mene jiavula jiatadila Yesu?—
