Tuzuelele muvuala mumoshi wahuluishile lemba dienji. Lemba dienji muene mutumiwi Pholo. Jina dia muvuala muene tushigo gudijiya, uvi wakalegele mulonga wabonga. Watshigina gujiya mulonga wene ba?—

Pholo wakhadile mu bologo gu Yelusalema. Amukuatele handaga wakhadile gulongesa milonga ya Yesu. Athu amitshima yabola akhadileko gumutshigina, hene amuyidile giphungi. Azuelele egi: ‘Tulombe gua komanda atume masuta abate Pholo gua manzuji. Esue tudisuege munjila, gila Pholo wabalega tuzoge hagumushiya!’

Muehu’a Pholo wavile mulonga wa giphungi giene. Itshi akalegele? Wayile gu bologo haguwambela Pholo mulonga wene. Pholo wamutumine muphushi gudi komanda wa masuta hagumuwambela mulonga wene. Watangiza egi yakhadile yaleba gua muehu’a Pholo haguzuela nu Komanda ba?— Ndo, yakhadileko yaleba, handaga komanda muene wakhadile muthu wakoma. Uvi, muehu’a Pholo wakhadile muenya gikhesa hene ayile muzuela nu komanda.

Gungima, komanda wajiyile gima giagukalagala. Watombele masuta 500 hagubamba pholo! Waadijigile hagumubata muphipha yene gudimbo dia Kaisaliya. Pholo wahuluishiwe ba?— Ayi, athu ene amitshima yabola amushiyileko! Giphungi giawo giataginyileko.

Lumene luene luajiya gugulongesa itshi?— Aye nji, wajiya gukhala nu gikhesa gifua muehu’a Pholo. Tudi naye gukhala nu gikhesa tangua dia guwambela athu ako mbimbi ya Yehowa. Mba ukhala nu gikhesa haguzuelela mbimbi ya Yehowa ba?— Gila udi nu gikhesa, wajiya guhuluisa athu ako.