Tute lumene lua dimbo dia Yeliko. Mu dimbo diene athu anako gutshigina Yehowa ndo. Mukhetu mumoshi jina dienji Rahaba, wakhadile guene.

Tangua Rahaba akhadile muvuala, Wavile mene jia Moise luholo akaphumuine muta wakoma wabenga nu luholo azolele ana isalele mu Ejipito. Wavile luko luholo Yehowa aakuatesele hagununga mbalagaji jiawo. Wavile luko egi ana isalele adi hehi nu gutambula dimbo dia Yeliko!

Lusugu lumoshi mu ngueze, ana Isalele mbadi akobelele mu gisuegi hagutala dimbo dia Yeliko. Ahetele gu inzo ya Rahaba. Muene waanginyishile mukatshi dia inzo. Mu phipha, athu alezele fumu wa Yeliko egi athu a funji (asongi) mbadi adi mu dimbo, gumbodia Rahaba. Fumu watumine athu gudi Rahaba hagukuata athu ene afunji. Uvi, Rahaba waasuegele holo dia plafo ya inzo y’enji. Walezele enya mudimo a fumu egi: ‘Athu mudi mukamba akhadi haha, uvi azogi kale mu dimbo. Gila muaalandula heni’aha, muajiya guakuata!’ Wajiya gishina Rahaba asuegele athu afunji ene ba?— Yakhadile handaka watshiginyile Yehowa nu wajiyile egi mba uhana enya Isalele mavu a Kanana.

Tangua diaguzoga mu inzo ya Rahaba, athu ene amulayile egi mba amubamba nu aphangi’enji tangua Yeliko mba ishiyiwa. Wajiya gima amutogele akalagale?— Azuelele gamba: ‘Zula lungonji luabenga ulukande ha fenetre yaye luzenzele hanze. Gila wakalagala luholo luene, muthu wagasue mba ukhala mu inzo yaye mba uhuluishiwa.’ Rahaba wakalegele lume luholo amuwambelele. Wajiya luholo milonga yabalegele gungima ba?—

Masugu azonda gungima, enya Isalele ajietele dimbo dia Yeliko, mbimbi imoshi yazogileko mu makano awo. A gimoshi gu jietele masugu 6, giphungu lusugu. Uvi lusugu luasambadi, ajetele dimbo diene iphungu 7. Lusugu luene, mukut’awo agasue ahagile matululu akola. Yehowa wabuishile ibayi yagasue ya dimbo diene. Uvi inzo yakhadile nu lungonji luabenga lumuzenzelela yabuileko ndo!  Wamona foto ya inzo yene ba?— Rahaba nu fami y’enji ahuluishiwe!

Lumene lua Rahaba luajiya gugulongesa itshi?— Rahaba washile mutshima gua Yehowa mukunda nu milonga y’enji yagasue yabonga avile. Ana gugulongesa ima yavula yatadila Yehowa. Wana gushila Yehowa mutshima luholo Rahaba akalegele ba?— Tuajiya egi wana gumushila mutshima!