Wamona muvuala wamukhetu udi hafoto ba?— Jina dia sh’enji Yefeta. Mu Biblia mushiko jina dienji ndo, uvi tuajiya egi wasuanguluishile sh’enji nu Yehowa. Tute lumene lua mun’a mukhetu muene nu lua sh’enji Yefeta.

Yefeta wakhadile muthu wabonga, wabalekesele tangua diavula hagulongesa mun’enji wa mukhetu mbimbi ya Yehowa. Wakhadile muenya ngolo jiavula nu mutuameji wabonga. Hene ana Isalele amutombele haguatuameza gu ita aluile nu mbalagaji jiawo.

Yefeta watogele Nzambi amukuatese. Walayele Yehowa egi gila wanunga ita, mba wumuhana muthu wa thomo wagasue mba uzoga monzo y’enji hagumuyamba tangua mba avutuga guembo. Muthu muene mba ukalegela  Yehowa, mu inzo ya tenta ya gitaginilo (tabernacle), monyo wenji wagasue. Inzo ya tenta ya gitaginilo, yakhadile fundo athu akhadile guza gukombelela Yehowa mutangua diene. Yefeta wanungile ita! Wajiya muthu wathomo wazogele monzo haguyamba Yefeta tangua avutugile gumbodienji?—

Ayi, mun’enji wa mukhetu! Yefeta wakhadile nu mona phamba mumoshi, heniaha, yatogele egi amutume gualeha. Yamuhanyile gikenene giavula. Uvi jiya egi, wakhadi walayile gale Yehowa. Hene, mun’enji wa mukhetu wazuelele egi: ‘Tata, luholo walayi Yehowa, udi naye gutagenesa laji diaye.’

Mun’enji muene wa mukhetu wavile gikenene. Gu inzo ya tenta ya gitaginilo, yakhadile ndo gulomba ahagewe nga avuale ana. Uvi watshiginile gutaginyisa laji dia sh’enji nu gusuanguluisa Yehowa. Gua muene laji diene diakhadile nu ndando yabaleka guya gu ulo nga guvuala ana. Hene, wabembele inzo yawo, wayile mukhala gu inzo ya tenta ya gitaginilo masugu agasue a monyo wenji.

Watangiza egi makalegelo enji asuanguluishile sh’enji nu Yehowa ba?— Wa asuanguluishile lume! Gila udi guzumba nu gunemesa Yehowa, wajiya guteta mun’a Yefeta wa mukhetu. Aye nji, wajiya gusuanguluisa mvuaji jiaye nu Yehowa.