Gutumagela mvuaji jiaye tangua diagasue gudi mulonga waleba ba?— Tangua diko yana gukhala lamba. Wajiyile gale egi Yesu wakhadile gutumagela Yehowa nu mvuaji jienji ba?— Lumene lua Yesu luajiya gugukuatesa hagutumagela mvuaji jiaye ata mutangua dia lamba. Tute lumene luenji.

Yesu wakhadile gosa nu sh’enji Yehowa gutuama dia guza ha mavu. Yesu wakhadile nu mvuaji ha mavu haha. Majina awo Yosefe nu Mariya. Wajiya luholo Yosefe nu Mariya abuile mvuaji jia Yesu ba?—

Yehowa wakalegele mulonga umoshi wa kushimana (guyitugisa), wakatudile monyo wa Yesu gosa, waumba mu vumo dia Mariya hagula Yesu avalewe ha mavu! Yesu wakalegele mbeji ivo 9 mu vumo dia Mariya, gula mona wagasue. Hene Mariya nu Yosefe abuile mvuaji jia Yesu hashi’amavu.

Tangua atagenesele ivo 12, wakalegele ndaga imoshi yamonesele egi wana guzumba shenji, Yehowa muavula. Yakhadile tangua Yesu nu enya fami y’enji awendele njila yaleha uu nu gu Yelusalema hamulonga nu feti ya Paki. Lusugu luaguvutuga guawo, Yosefe nu Mariya amoneleko Yesu ndo. Wajiya fundo diakhadile Yesu?—

Yozefe nu Mariya avutugile muphushi gu Yelusalema gumukamba mafundo agasue. Avile gikenene giavula handaga akhadileko gumumona ndo. Uvi, gungima dia masugu thatu, ayile gumusanga gu temphelo! Wajiya mukunda natshi Yesu asalele gu temphelo?— Mukunda nu gulonguga milonga ya sh’enji, Yehowa. Wakhadile gutshigina Yehowa, watshiginyile gujiya luholo lua gumusuanguluisa. Tangua Yesu akudile, wakhadile gutumagela Yehowa, ata mu milonga ya kola, nga tangua adi mujiya egi gutumaga guene mba gumubatela malamba. Yesu watumagele Yosefe nu Mariya ba?— Ayi, Biblia yazuela egi wakhadile guatumagela.

Lumene lua Yesu luajiya gugulongesa itshi?— Udi naye gutumagela mvuaji jiaye, ata tangua idi lamba haguyikalagala. Wajiya guyikalagala ba?—