Gubola guasendesele ha mavu tangua Satana ambile mambo athomo. Mu gisendeselo, Satana wakhalele muanjelo watagana, uvi “ganamaganago mu ndaga ya giamatshidia.” (Yone 8:44) Watshiginile egi amukombelele, uvi gukombelela guatagana phamba gua Nzambi. Satana wadimbile mukhetu wa thomo, Eva; wamupushile ha gumuvila muene hafundo dia guvila Nzambi. Adama wahatele Eva, nu muene wakondele gutumaga gua Nzambi. Ndanga yene yabata malamba nu gufua.—Tanga Gisendeselo 3:1-6, 19.

Tangua Satana apushile Eva ha gutuna gutumagela Nzambi, wazolele gulumbuga gu ufumu udi nawo Nzambi ha gutuameza. Athu avula akabuile Satana enji atunyile Nzambi akhale Fumu wawo. Hene, Satana “abuile fumu ya ha mavu awa.”—Tanga Yone 14:30; 1 Yone 5:19.

Midimo yagasue ya Nzambi idi ya gutagana. Athu nu anjelo afugiwe gua Nzambi akhalele agutagana muabonga ha gutumagela Nzambi. (Mikhuala 32:4, 5) Watuhanele luendu lua gutomba etue hakhetu ha gukita ndaga yabonga nga yabola. Luendu luene lua guditombela luanagututuma ha gumonegesa guzumba guetu gudi Nzambi.—Tanga Yakoba 1:13-15; 1 Yone 5:3.

Yehowa wabembele gulumbuga gu ufumu wenji mukunda nu tangua dia zonda. Mukunda na tshi? Ha gudijiga egi gukamba gudihinyina gukonda Nzambi gushigo gua bonga gu’athu. (Mulongeshi 7:29; 8:9) Gungima dia ivuo 6 000 yandiga athu alumbugile Nzambi, ndaga jiagasue jiazoga haphelo egi athu ajiyilego gumana ita, khuta, ndaga jia bola nu misongo.—Tanga Yelemiya 10:23; Loma 9:17.

 Hagudisha nu ufumu w’athu, ufumu wa Nzambi wanabatela gubonga gua athu anaguwutshigina. (Yeshaya 48:17, 18) Gualeha ndo, Yehowa umuza mushiya baguvernema agasue a’athu. Phamba athu anagutomba gutuamegezewa gu ufumu wene mbakhala ha mavu.—Yeshaya 11:9.—Tanga Danyele 2:44.

Satana wazuelele egi gushigo nu muthu mba ukalegela Yehowa mudimo mu guzumba guenji. Wajiya gutondolola mambo a Satana ba? Ayi, wajiya guyikalagala! Guhuiminyina gua mutshima gua Nzambi gua tuhua luendu lua gumonesa gula tuamutshigina muene akhale Mfumu’etu nga gulandula athu. Khalelo dietu dianadijiga njila itshi tuatomba.—Tanga Yobo 1:8-12; Ishima 27:11.

Tuajiya gutomba Nzambi Fumu wetu gula tuakamba enji tuakalegela gikombelelo gia matshidia gidi gudivua nu Mbimbi yenji, Biblia. (Yone 4:23) Tuajiya gutuna Satana akhale fumu wetu gula tuatuna gudihana mu politiki, ita, luholo Yesu wayitunyile.—Tanga Yone 17:14.

Satana wanakitshila ngolo jenji ha gututuma ha gutshigina ndaga jia sonyi nu jia bola. Gula tuatuna ndaga jiene, mafuta nu aphangi’etu ako ajiya gutusegulula nga guzola umbalagaji. (1 Phetelo 4:3, 4) Hene tudi naye gutomba: Tudi mutomba gudibungisa nu athu adi muzumba Nzambi? Tudi mulandula mikhuala ya Nzambi yidi ya guzala nu ndunge nu guzumba? Gula tuataya ayi, tuadijiga egi Satana wambile mambo ha guzuela egi mu tangua dia lamba, gushigo ata muthu mungoshi wajiya gutumagela Nzambi.—Tanga 1 Kolinto 6:9, 10; 15:33.

Guzumba gua Nzambi gudi athu gudi gututshiginyisa egi gubola nu malamba mba muhua. Athu adi mumonegesa egi adi mutshigina ndaga jiene mbajinga gashidi ha mavu.—Tanga Yone 3:16.