Lumene lua bonga luakatuga gudi Yehowa, Nzambi wa gusuanguluga nu watshigina egi fami jikhale nu gusuanguluga. (1 Timote 1:11) Muene udi gisendeselo gia wulo. Wulo wa makuela udi nu ndado ha gusuanguluga mu katshi dia fami mukunda wanabamba yala, mukhetu nu ana.—Tanga Luka 2:1, 4, 5.

Luholo lutshi Nzambi anatalela wulo? Watshigina egi wukhale gibungishilo gia tangua diagasue gua yala nu mukhetu. Aklisto adi naye gutumagela mikhuala ya dimbo imutalela gusonegesa wulo. Yehowa watshigina egi yala nu mukhetu adidimbigo akhale agujidinginyina ene muyadi. (Hebelu 13:4) Nzambi wanatuna kushiya wulo. (Malaki 2:16) Uvi wahana njila gua muklisto hagushiya wulo nga guhaga luko gula mungoshi mu katshi diawo wakita uthambi.—Tanga Matayo 19:3-6, 9.

Yehowa wafugile yala nu mukhetu ha gudikuatesa mu wulo. (Gisendeselo 2:18) Luholo udi fumu ya fami, yala udi naye guzangula fundo dia thomo mu fami ha gutagenesa nzala ya fami yenji enji gualonga ha gujiya Nzambi. Udi naye guzumba mukaji’enji nu gudihana gua gasue. Yala nu mukhetu adi naye gudizumba nu gudinemesa. Guditotesela gudi nu ndando yavula ha gukhala nu gusuanguluga mu wulo, mukunda mala nu akhetu agasue ashigo athu agutagana.—Tanga Efeso 4:31, 32; 5:22-25, 33; 1 Phetelo 3:7.

Gula wulo wenu udi nu malamba, muthu nu muthu mu katshi dienu ahage ngolo ha gukitshila muko jindaga mu  guzumba. (1 Kolinto 13:4, 5) Mbimbi ya Nzambi yanamonegesa ndo egi gudikapha gudi njila yabonga ya gumanesa malamba anazoga muavula mu wulo.—Tanga 1 Kolinto 7:10-13.

Yehowa watshigina egi mukhale nu gusuanguluga. Udi gumihana malongo ha gukhala nu gusuanguluga mu ulenge wenu. Watshigina egi ndunge nu makalegelo a mvuaji jienu amikuatese. (Kolosai 3:20) Yehowa watshigina egi mukhale nu gusuanguluga ha gumukitshila muene Mufugi nu Munenji mudimo.—Tanga Mulongeshi 11:9–12:1; Matayo 19:13-15; 21:15, 16.

Mudi naye gusha ngolo ha gudisa, gukamba inzo nu gusudigisa ana enu. (1 Timote 5:8) Uvi ana ha gukhala nu gusuanguluga, mudi naye gualonga ha guzumba Nzambi enji adibembe Nzambi a’alonge. (Efeso 6:4) Luholo luenu lua gumonegesa guzumba guenu gudi Nzambi guajiya guakuatesa muavula. Gula malongo enu adi mulandula Mbimbi ya Nzambi, ajiya gukuatesa matangi a’ana enu muavula.—Tanga Mikhuala 6:4-7; Ishima 22:6.

Ana anuvua muabonga tangua udi guakolesa nu guashimana. Adi nji nu funu ya guabalela nu gualongesa. Gukuatesa gua luholo lununu ludi guabamba ha gukonda gutotesa gukhala nu gusuanguluga. (Ishima 22:15) Ata ngenyi, guabalela nga gualonga guajilego gukhala gua kola nga gua khuta.—Tanga Kolosai 3:21.

Mathemua a Yehowa anuzola mikanda yavula mukunda nu gukuatesa mvuaji nu ana. Gishina gia malongi adi mu mikanda yene idi Biblia.—Tanga Lungimbo 19:7, 11.