Mu ikombelelo yagasue, tuanamona athu adi gudihana nu mutshima wagasue. Lumene lua bonga ludi egi Nzambi wanaguamona enji wanaguatangiza. Mu khenda jiagasue, ndaga jiavula jiabola jiakitshiwe mu jina dia gikombelelo. (2 Kolinto 4:3, 4; 11:13-15) Ha gutalela mene tuanuva, ikombelelo iko yadinginyishile mu gushiya gua guhana woma, mu gushiya athu a iphuta iko, mu ita, enji mu gubungisa muila nu ana. Jidi diago ndaga jia lamba diavula gudi athu anatshigina gukalegela Nzambi nu mutshima ungoshi.—Tanga Matayo 24:3-5, 11, 12.

Gikombelelo gia matshidia giana tumbuisa Nzambi, uvi gikombelelo gia mambo gianagumusuanguluisa ndo. Gianalonga matangi ashigo mu Biblia, gifua, mambo mukunda nu Nzambi enji nu athu afuile gale. Uvi Yehowa wanatshigina egi athu ajiye giamatshidia mukunda nu muene.—Tanga Ezekiele 18:4; 1 Timote 2:3-5.

Ha gusuanguluga guagasue, Nzambi anadimbiwago gua athu a ikombelelo yanazuela egi anazumba Nzambi, uvi atshigina mavu a Satana. (Yakoba 4:4) Mbimbi ya Nzambi yanatamega hunji dia ikombelelo yagasue ya mambo “Babilone Akoma.” Jina diene diakatuga mu dimbo dikulu, fundo diasendesele ikombelelo ya mambo gu ngima dia Mvula ya Nowa. Gualeha ndo, Nzambi mbaushiya mu gisagumuisa ikombelelo yagasue yanadimba nu guhana athu lamba.—Tanga Yatuwuwe 17:1, 2, 5, 16, 17; 18:8.

Uvi lumene lua bonga luasugile go haha. Yehowa wanajimbilago athu adi gudihana nu mutshima umoshi mu gukombelela enji adi agumuangana mu ikombelelo ya mambo  ha mavu agasue. Udi guabungisa ha gualonga giamatshidia.—Tanga Mika 4:2, 5.

Yehowa wanatangiza athu anazumba ndaga jia matshidia enji jia bonga. Udi guatoga azoge mu pushi mu ikombelelo ya mambo. Athu anazumba Nzambi adi hehi ha gubalumuna khalelo diawo ha gumusuanguluisa.—Tanga Yatuwuwe 18:4.

Gu ngima dia gufa gua Yesu, athu agudihana nu mutshima umoshi ayambele nu gusuanguluga guagasue mene jiabonga jia khalele mulonga atumiwi. Yehowa walongele luholo lua bonga lua gujinga ludi nu gusuanguluga, nu gikuma enji nu felela. Adi gifezegeselo gia bonga gudi esue mangino, mukunda atshiginyile mene jia bonga ha gusha Yehowa fundo dia thomo mu monyo wawo.—Tanga 1 Tesalonike 1:8, 9; 2:13.

Yehowa wanayamba mu fami y’akombeledi enji athu anyi agasue anabemba ikombelelo ya mambo. Gula watshigina gutamega gugu gua Yehowa, mba ukhala futa dienji, mu fami ya gihegihe enji ya guzumba y’akombeledi enji, nu monyo wa ivuo nu ivuo.—Tanga Mako 10:29, 30; 2 Kolinto 6:17, 18.

Gusophesa gumuza gua ikombelelo ya mambo gudi lumene lua bonga. Mba gukatula athu a mavu agasue mu lamba. Mba gukhadi luko ndo nu ikombelelo ya mambo mukunda nu kudimba nga gukhapha athu. Athu agasue adi nu monyo mba adibungisa mu gikombelelo gia Nzambi mumoshi wa matshidia.—Tanga Yatuwuwe 18:20, 21; 21:3, 4.