Nzambi walondegele ajigulu a Abalahama mu gifutshi enji wahanele mikhuala. Watamegele egi “Yisalele” enji washile abambi a gikombelelo gia matshidia nu a Mbimbi yenji. (Lungimbo 147:19, 20) Hene, mu njila ya Yisalele, athu a ifutshi yagasue mba aheta gubonga.—Tanga Gisendeselo 22:18.

Nzambi watombele ana Yisalele ha gukhala mathemua enji. Mene jiawo jikulu jiamonegesa egi gutumaga gu mikhuala ya Nzambi yanabata gubonga. (Mikhuala 4:6) Mu njila yawo, athu ako ajiya gulonguga gujiya Nzambi wa matshidia.—Tanga Yeshaya 43:10, 12.

Gungima, Nzambi watunyile Yisalele. Hafundo diawo, Yehowa washile hunji dia Klisto. (Matayo 21:43; 23:37, 38) Mangino, hafundo di’ana Yisalele, aklisto a matshidia adi mathemua a Yehowa.—Tanga Makalegelo 15:14, 17.

Yesu walondegele alandudi enji ha gulonga nu gubuisa athu a mu ifutshi yagasue alandudi. (Matayo 10:7, 11; 24:14; 28:19, 20) Mudimo wene wakula muavula mu gindongo gigi gietu gia gisugishilo. Idi giphungu gia thomo mu mene jia athu, Yehowa hagubungisa inunu nu inunu y’athu a mu ifutshi yagasue mu gikombelelo gienji gia matshidia. (Yatuwuwe 7:9, 10) Aklisto a matshidia adi agulondega ha gudikolesa nu gudikuatesa. Mu mavu agasue, adi muhata malongi a Biblia a luholo lumoshi mu gudibungisa guawo.—Tanga Hebelu 10:24, 25.

Mu ivuo 1870, hunji dia zonda diakhalele mu longuga Biblia diahetele matshidia a Biblia anyi athu ajimbidile. Ene ajiyile egi Yesu walondegele dihungu di’aklisto ha gulonga Ufumu mu ifutshi yagasue, asendesele mudimo wa gulonga Ufumu mu ifutshi yagasue. Mu ivuo 1931, azanguile jina dia Mathemua a Yehowa.—Tanga Makalegelo 1:8; 2:1, 4; 5:42.

Gungima dia gufa gua Yesu, mahungu a aklisto mu ifutshi yavula akhalele mukuatesewa gu hunji dia akulu atuameji, enji hunji diene dimujiya Yesu gifua Fumu wa dingumba. (Makalegelo 16:4, 5) Luholo lungoshi mangino, Mathemua a Yehowa agasue adi muhata utuameji wa Hunji dia Akulu Atuameji. Hunji diene dianatala midimo ya mabilo a filiyale a Mathemua a Yehowa ana gubalumuna, guzola enji gukhapa mikanda ya gulongugila Biblia mu mazuelelo gubalega 600. Hene, Hunji dia Akulu Atuameji ajiya gukolesa nu gutuameza mahungu gubalega 100 000 a mavu agasue nu matangi a Biblia. Mu katshi dia hungu diagasue, mudi nu akulu, nga nji atadi. Mala ene anabamba giphuta gia Nzambi giagasue nu guzumba.—Tanga 1 Phetelo 5:2, 3.

Mathemua a Yehowa adi agulonda hagujiyisa lukuma lua bonga lua Biblia nu gubuisa alandundi. Gifua apostolo, tuanalonga nzo nu nzo. (Makalegelo 20:20) Tuanakamba athu anutshigina ha gulonguga nawo Biblia. Uvi Mathemua a Yehowa tushigo phamba ulondegi. Tudi fami idi nu Tata wa guzumba. Tudi aphangi a mala nu akhetu adi gudiwunguluga. (2 Tesalonike 1:3) Mukunda athu a Yehowa adi agulondega ha gusuanguluisa Nzambi nu gukuatesa athu ako, adi fami ya gubalega gusuanguluga ha mavu.—Tanga Lungimbo 33:12; Makalegelo 20:35.