LONGO DIA 4
Yesu Klisto udi nanyi?
1. Monyo wa Yesu wasendesele luholo lutshi?
Makalegelo atshi Yesu akhalele nawo hagula athu amuvuila ndo woma ha gumusuena?—MATAYO 11:29; MAKO 10:13-16.
Yesu udi gifugilo kia somi gia Nzambi. Hagudisha nu athu ako, Yesu wajingile mudilu gifua wanjo gutuama dia guvualewa ha mavu. (Yone 8:23) Wahanele mago mu gufuga yima yiko yagasue. Phamba muene hakhenji wafugiwe mbala imoshi gua Yehowa; hene wanatambegewa egi Mona “mungoshi ha mungoshi” wa Nzambi. (Yone 1:14) Luholo muene wakhalele Muzueledi wa Nzambi, natambegewa egi “Mbimbi.”
2. Mukunda natshi Yesu ajile ha mavu?
Nzambi watumine Munenji ha mavu. Wakatuile monyo wenji mu dilu nu waunginyishile mu vumo dia mona mukhetu mungoshi wa Muyuda, khenji ajile mala ndo; jina dienji Mariya. Enji, Yesu ashi ndo nu shenji wamubutshile ha mavu. (Luka 1:30-35) Wajile ha mavu (1) ha gutulonga giamatshidia gia talela Nzambi, (2) ha gutubembela khalelo ha gukita matangi a Nzambi ata mu tangua dia lamba, enji (3) ha guhana monyo wenji wagutagana gifua “giba.”
3. Mukunda natshi tudi nu funu ya giba?
Giba gidi ndando yanufutshi ha gukula muthu wakuatewa mukunda nu gumushiya. (Guzoga 21:29, 30) Mu gisendeselo, matangi a Nzambi akalele ndo egi athu adi naye gufua nu gukola. Luholo lutshi tuayijiya? Nzambi wadijigile muthu wa thomo, Adama, egi gula wakalagala ndaga Biblia yanatamega “disumu,” mbawu mufua. Gula Adama akalegelego disumu, nga afuilego ata lusugu lumoshi. (Gisendeselo 2:16, 17; 5:5) Mu gutalela Biblia, gufua “guanginyine” gua athu agasue mu njila ya Adama. Ngenyi, Adama wabembelele anenji nu ajigulu enji agasue disumu nu lamba dienji, gufua. Tudi nu funu ya giba ha gukatuga mu lamba dia gufua diatubembele Adama.
Nanyi wajiyile kushimbiga giba ha gutukula mu gufua? Tangua tuanafua, tuanushimbiga lamba dia masumu etu hakhetu. Gushi ndo nu muthu mumoshi wa kukonda gutagana wajiya gushimbiga giba mukunda nu masumu a athu ako.
4. Yesu wafile mukunda natshi?
Yesu akhalele ndo gifua esue; wakhalele muthu watagana. Akhalele ndo nu funu ya gufua mukunda nu masumu enji, mukunda akalegele disumu ndo ata lusugu lumoshi. Wafuile mukunda nu masumu a’athu ako. Nzambi wamonegesele guzumba gua gubalega gudi athu luholo atumile Mun’enji atufuile. Yesu akhenji watudijigile guzumba luholo amutumagele Shenji enji wahanele monyo wenji ha gutukula mu masumu.
5. Yesu udi mukita itshi mangino?
Hakhalele muene ha mavu, Yesu wasagele akhashi, watugumushile athu agufua, enji wakuatesele athu akhalele mu mona lamba. Walezele ndaga jia mbaakalegela athu adi gumutumagela mu masuku mba amuza. (Matayo 15:30, 31; Yone 5:28) Gu ngima Yesu afuile, Nzambi wamutugumuishile udi nu muila wa nyuma. (1 Phetelo 3:18) Wanengelele gu koko dia gitata wa Nzambi tii Yehowa wamuhuile ngolo jia kuhinyina mavu. (Hebelu 10:12, 13) Mangino owu, Yesu udi Fumu mudilu, enji alandudi enji adi mulonga lukuma luene lua bonga ha mavu agasue.
Gualehando, Yesu udi mukalegela ngolo jia kifumu gienji ha gukatula malamba agasue nu athu adi mu gishina gia malamba. Athu agasue adi mumonegesa gutshigina gua Yesu ha gumutumagela mbaheta monyo mu paladiso ha mavu.