Tangiza ndaga eyi: Lusugu lumoshi Timote wakhalele muta ndundu nu mafut’enji. Wawasa ndundu gu fenetre ya inzo yangene.

Nga wakhalele ha fundo dia Timote, itshi wakhalele naye gukalagala?

UDI NU NDAGA THATU WAJIYA GUKALAGALA:

1. Ulenge.

2. Umbile muthu muko mambo.

3. Uwambele afumi’a inzo egi aye wawashi ndundu, gila yabolesa gima watshigina gugifuta.

Matangi ajiya gugujila egi utombe gitshinyi gia A. Uvi gutshigina gubola guaye gudi mulonga wawaha—ikhale ndundu yene yabolesa fenetre nga gima giko.

1. Idi ndaga yabonga.

   Biblia yazuela egi: ‘Tudi mutshigina gudiwendesa muabonga mu ndaga jiagasue.’—Hebelu 13:18.

2. Athu ana gutshigina muavula gutotesela athu ana gutaya gubola guawo.

   Biblia yazuela egi: ‘Muthu udi musuega ndaga jienji jiabola, mbagabingigo. Uvi wajilondolola nu wajibemba, Nzambi mbawumufuila jikhenda.’—Ishima 28:13.

3. Guana gusuanguluisa diago Nzambi.

   Biblia yazuela egi: ‘Yehowa ganago guzumba enya mambo, uvi wana gukuata ufuta wakola nu athu abonga.’—Ishima 3:32.

Karina wakhalele nu ivo 20, watunyile guwambela sh’enji egi amutogele amande handaga wawendesele gamiyo mu phushi jiabala. Uvi, gajiyilego gusuega mulonga wene mayilago. Karina udi muzuela egi: “Gungima dia givo gimoshi, tata wajiyile egi angutogele amande handaga ngawendesele gamiyo mu phushi jiabala. Yangusagesele muavula!”

Longo ditshi tuajiya guzula? Karina wazuela egi: “Gusuega ndaga jiabola guana gubolesa diago milonga. Mbayigubatela malamba!”

Biblia yazuela egi: “Khungi yetu yagasue tuanajimbila mu ndaga jia miho yavula.” (Yakoba 3:2) Luholo tuayimonyi, gula udi mutshigina gubola guaye gatshididi, mbawumonesa egi udi muthu wagudibulumuisa nu wagukula.

Gungima, zula malongo gu ndaga jiabola wana gukalagala. Mona mukhetu mumoshi mu jina dia Vero wazuela egi: “Ngana gumona ndaga jiabola ngana gukalagala gifua luholo lua guzula malongo ajiya gungukuatesa ha gukhala muthu wabonga, nu ha gumanesela ndaga jiene mu luholo luko mu masugu adi muza.” Tala luholo wajiya guyikalagala.

Wazula velo dia sh’aye gungima wadibolesa. Itshi wajiya gukalagala?

• Guhuena tedie, nu gutangiza egi sh’aye gashigo mujiya nga gima ndo.

• Guwambela sh’aye ndaga yagasue wakalagala.

• Guwambela sh’aye luholo ndaga yabalega, uvi wumbile muthu muko mambo.

Wabingilego gizame mu khalasa handaga watangelego. Itshi wajiya gukalagala?

• Guhana foti gu gizame giene.

• Gutshigina egi luholo wabingilego, idi foti yaye.

• Guzuela egi ndombi wenu ganago guguzumba ndo.

 Henyaha, talela muabonga ndaga eyi tudi muzuelela, tangiza egi udi ha fundo dia (1) sh’aye nga dia (2) ndombi waye. Gula watshigina gubola guaye mbala imoshi, sh’aye nga ndombi waye wajiya gugumona gikuatshi? Itshi adi naye gutangiza mukunda nu aye gila wasuega gubola guaye?

Tangiza ndaga yabola wakalegele mu givo giabalega, gungima hana mvutu gu mihu eyi:

Ndaga itshi yabola wakalegele? Luholo lutshi wamanesele ndaga yene?

• Ngayisuegele.

• Ngambidile muthu muko mambo.

• Ngayitshiginyile mbala imoshi.

Gula watuna gutshigina gubola guaye, luholo lutshi wajiya gudivua?

• Ngajiya gudivua muabonga gifua ngamanesela mulonga wene!

• Ngajiya gudivua gifua ngabata mulonga, ngakhadile naye guzuela giamatshia.

Luholo lutshi luabonga wakhalele naye gumanesela ndaga yene yabola?

Longo ditshi wazula mu ndaga yabola eyi wakalagala?

Mukunda natshi athu ako anago gutshigina ndaga jiawo jiabola ana gukalagala?

Gula tangua diagasue udi musuega ndaga jiabola wana kalagala, itshi athu mbaagutangijila? Uvi gula watshigina gubola guaye, athu mbaagumona gikuatshi?—Luka 16:10.