Tala ndaga eyi: Helena wadijiyile nu Mike mbeji phamba jiyadi, uvi muene udi gudivua gifua adijiyile gale nenji mualeha. Tangua diagasue ana gudisonegela ba mesaje, ana guditamega matangua avula gu telefone, ana gudiwambela ndaga jiagasue jidi mu mitshima yawo! Henyaha, Mike watshiga egi ufuta wawo usugigo pamba mu guta maga.

Mu mbeji jiene jiyadi, Mike nu Helena ayilego gualeha ndo, akhalele gudikuata phamba gumago nu gudihana babize hazonda-zonda. Helena ashigo mutshigina gukalagala mulonga wabola. Uvi ashigo mutshigina egi Mike amutune. Gula udi fundo dimoshi nu Mike, wana gudivua egi udi mukhetu wabonga nu watagana diago. ‘Luko,’ wazuela egi, ‘Ame nu Mike tuana gudizumba diago!’

Gila watagenesa gale ivo ya gungina mu ulo, nga wakhalele ha fundo dia Helena, itshi wakhalele naye gukalagala?

Gila muthu washiya mukhuala wa pesanteur, gifua wakanduga gosa a mutshi nu wadibemba wabua, wajiya gubooga nga gufua. Ndaga yene idi luholo lumoshi nu muthu washiya mukhuala wa Biblia, gifua owu udi muzuela egi: “Mudikande gu uthambi.”—1 Tesalonike 4:3.

Malamba atshi ajiya gubuila muthu gila washiya mukhuala wene? Biblia idi muzuela egi: ‘Muthu udi mudihana gu uthambi, udi mutshitshiila muila wenji diago gubola.’ (1 Kolinto 6:18) Idi diago ya giamatshidia!

 Enya ndunge amonesa egi mavuala avula abungishile gale muila ataganele nu malamba gifua:

• GUDISAGESA MU MATANGI. Alenge avula ana gubungisa muila gutuama dia gungina mu ulo ana guzuela egi gu ngima dia gukalagala ndaga yene, ana guvua lamba diakola mu mutshima.

• WOMA. Gungima dia gubungisa muila, yala nu mukhetu ana gudihula egi, ‘Nani muko abungishile gale nenji muila?’

• GIKENENE. Mona mukhetu wana gutshigina yala mbawumubamba, uvi ganago gusuanguluga nu yala watshigina phamba gumukenesa. Mona yala ganago gusuanguluga luko nu mona mukhetu, gila abungishile gale nenji muila.

• Mu mbimbi jiazonda: Gula wabungisa muila nu muthu uvi aye khenji ungina gale mu ulo ndo, mbawudihana musonyi luholo watotesa diago gima giaye gia ndando yavula. (Lomo 1:24) Muila waye udi diago nu ndando yavula, uwuzangelago!

Monesa egi udi nu ngolo jia ‘gudikanda gu uthambi.’ (1 Tesalonike 4:3) Gila wangina mu ulo, wajiya gubungisa giwa muila. Ngenyi, mbawusuanguluga diago nu ndaga yene mu luholo luatagana, mbawukhadigo nu woma, nu gikenene nga nu malamba ana gubuila athu ana gubungisa muila gutuama dia gungina mu ulo.—Ishima 7:22, 23; 1 Kolinto 7:3.

• Muthu owu wana guguzumba diago, wajiya gutshigina egi ukalagale ndaga yajiya gubolesa muila nu matangi aye ba?

• Muthu owu wana guguzumba diago, wajiya gugutuma ha gubolesa ufuta waye nu Nzambi ba?—Hebelu 13:4.