MUHU 3
Luholo Lutshi Ngajiya Guta Maga nu Mvuaji Jiami?
ITSHI WAJIYA GUKALAGALA?
Tangiza ndaga eyi: Tudi mu lusugu lua thatu mu ngueze. Geoff udi nu ivo 17 wamanesa gukalagala midimo yagasue yamuhuiwe, gungima waheta tangua dia guhululuga. Wakangula televizio, enji wakhala ha gife gienji ana gutshigina muavula.
Mutangua diene, sh’enji wangina ha salon, uvi gashigo nu gusuanguluga.
“Shienji wamuwambela egi Geoffrey! Hafundo dia gubalegesa tangua nu gutala Televizio, wakhalele naye gukuatesa galenge gaye ha gukalagala devuare dienji. Wanago gukalagala ndaga ana guguwambela!”
Geoff wazuela mu mbimbi yazonda egi: “Yasendesa luko!” Uvi shenji wavua.
Shenji wamuwambela egi, “mon’eye itshi umuzuela?”
Geoff wamba gisugu, walangumuna meso, wazuela egi, “gima ndo tata.”
Tata wavua diago jikhabu. Wamuwambela egi “Unguzuelelago nu dijui diangenyi.”
Nga wakhalele ha fundo dia Geoff, itshi wakhalele naye gukalagala ha gula mulonga wa luholo elu ugubuilago nu shaye?
TANGIZA THOMO HA GUKALAGALA NDAGA!
Guta maga nu mvuaji jiaye gudi gifua udi muwendesa gamiyo (mashinyi). Gila njila idi yazala nu maseso nu ibunji, wajiya guya mu njila iko.
TUFEZEGESE:
Mona mukhetu mumoshi mu jina dia Leya udi muzuela egi: “Ngakhala nu lamba dia guta maga nu tata. Matangua ako gula ngudi gumuwambela ndaga, khenji ngumanesela guzuela ndo, muene anguhudi egi ‘udi gunguwambela ame?’”
LEYA UDI NU NDAGA THATU AJIYA GUKALAGALA.
-
Gubalela shenji.
Leya wakaluluga egi “iza utegelele ndaga ya funu ngudi nawo!”
-
Gutuna guzuelesa shenji.
Leya watuna genji guwambela shenji ndaga jenji.
-
Gunengenena tangua diabonga ha gusendesa luko guta maga nu shenji.
Gungima, Leya wata maga nu shenji hakhenji, nga wamusonegela mukanda ha gumuwambela ndaga jienji.
Ndaga itshi wajiya guwambela Leya ha gukalagala?
TALA NDAGA EYI: Matangi a sha Leya adi fundo diko tangua Leya adi gumuwambela ndaga jienji
Luholo wana gukamba njila iko gila wamona egi njila udi muya idi nu maseso nu ibunji, wajiya nji gukamba luholo luko lua guta maga nu mvuaji jiaye
Ndaga ya gitshinyi gia B yajiya gukhala yaleba ha gukalagala, uvi ishigo mumonesa gutema ndo. Mukunda natshi? Handaga ha gula egi Leya amanesele muabonga ndaga nu sh’enji, udi naye guta nenji maga. Enji, hagula sh’enji amukuatese, udi naye gujiya ndaga jidi musagesa mun’enji. Guhena tedie guanago gumanesela ndaga nga hazonda.
Uvi, gila Leya watomba gukalagala ndaga idi mu gitshinyi gia C, idi mumonesa egi ashigo muhana nga ndaga imoshi njila ya gutuna guta maga nu sh’enji. Udi mukamba tangua diko ha guzuelela ndaga yene nu shenji. Gila Leya watomba gusonegela sh’enji mukanda, mbawudivua muabonga gungima.
Gusonega mukanda guajiya luko gumukuatesa ha gufunda ndaga eji akhalele naye diago guzuela. Tangua sha Leya mbaatanga mukanda wene, mbawujiya ndaga Leya akhalele naye gumuwambela eyi yajiya gumukuatesa ha gukotelesa diago phashi jia mun’enji. Ndaga idi mu gitshinyi gia C yajiya gubatela Leya nu sh’enji gubonga. Guta maga nu muthu hakhenji nga gumusonegela mukanda idi ndaga yabonga, handaga idi mulandula longo edi dia Biblia: “Tulandule ndaga jidi munethesa guhuima.”
Ndaga jitshi luko Leya akhalele naye gukalagala?
Tangiza ndaga imoshi, enji tangiza luko mulonga wajiya gugubuila gula wakalagala ndaga yene.
UZUEDIGO MBIMBI JIDI MUTUMA ATHU HA GUGUTANGIJILA MUABOLA
Ujimbilago egi tangua diagasue, mvuaji jiaye jianago gukotelesa ndaga udi muzuela luholo udi mutangiza.
TUFEZEGESE:
Mvuaji jiaye jiaguhula egi mukunda natshi udi mumonega gifua udi nu gikenene. Aye wazuela egi “ngushigo nu funu yaguzuelela ndaga yene ndo.”
Uvi mvuaji jiaye jiakotelesa gifua wazuedi egi: “Ngajiyilego gumiwambela ndaga jiami handaga nganago gumishila mutshima. Ngajiya gujiwambela mafuta ami, uvi enue ndo.”
Tangiza gale egi udi nu ndaga idi gugusagesa muavula, enji mvuaji jiaye jiatshigina gugukuatesa. Uvi aye wazuela egi: “Mudisagesago. Ngudi guyimanesela hakhami.”
-
Itshi mvuaji jiaye jiajiya gukotelesa?
-
Gudi aye, mvutu itshi yajiya gukhala yabonga?
