Tangiza ndaga eyi: Hadi guditala Julia mu nganza, udi gudimona wakoma. Udi gudizuelela muene hakhenji egi, “Ngudi naye gubululuga.” Uvi mvuaji jienji nu mafuta enji adi gumuwambela egi “udi nu muila wazonda.”

Masugu abalega, Julia wazudile desizio diakola hagula abulumune phamba “kilo thano” gia ginemo gienji. Wazudile desizio dia gubanda nzala masugu azonda hagula abululuge . . .

Gula udi gudiva gifua Julia, itshi wajiya gukalagala?

Gudisagesa mukunda nu luholo udi gushigo ndaga yabola. Biblia nji idi muzuelela muabonga ndaga jiatadila luholo mala nu akhetu akhalele mumonega gumeso a athu, gifua Sara, Rachel, Abigayile, Yozefe, nu Davidi. Biblia idi muzuela egi mon’a mukhetu mumoshi mu jina dia Abishage, wakhalele “wabonga sha gu meso.”—1 Mafumu 1:4.

Uvi, mavuala avula ana gudisagesa muavula mukunda nu luholo adi mumonega gumeso a athu. Gudisagesa ngenyi guajiya guaabatela milonga yakola. Tala ndaga eji:

• Enya ndunge amonesa egi 58% ya an’akhetu akhalele mutangiza egi adi akoma gubalega; uvi muguzuela guabonga phamba 17% mukatshi diawo akhalele diago akoma gubalega.

• Enya ndunge ako amonele egi 45% ya akhetu adi nu mila yazonda, uvi ene hakhawo akhalele mutangiza egi adi akoma!

• Tangua mavuala ako ana gukamba guzonda, ana gukata misongo idi mutamegewa egi anorexie—misongo yene yana gutuma muthu ha gutuna gudia, hene yana gukhuwisa muthu muavula.

 Gila wamona egi udi nu misongo eyi nga wadimona egi udi nu ungubu wagudia, toga ukuateshi. Sendesa guleza mvuaji jiaye nga mukhulutu mumoshi wana gushila mutshima. Biblia idi muzuela egi: “Mafuta anaditshigina masugu agasue, aphangi anadikuatesa mu makumbi a malamba.”—Ishima 17:17.

Yadiago, ndaga yana kalagala egi muthu akhale wabonga nga ndo gu meso a athu idi umuthu wenji wa mukatshi. Tuzuelele gale Abasaloma, mun’a fumu Davidi. Biblia idi muzuela egi:

“Muakhalelego muthu muko washimanewe iphala gubonga. . . . Muila wenji wakhalele wabonga diago.”—2 Samuele 14:25.

Uvi, muvuala muene wakhalele muenya lulendo luavula, mukambi wa ndaga jiakoma nu muenya mambo! Hene, Biblia ishigo muzuelela Abasaloma gifua muthu wabonga, uvi idi mumonesa egi wakhalelego muthu wagujinginyina gudi Nzambi nu wakhalele mbundudi yakola.

Gudi nu gishina giabonga Biblia yana gutuhana malongo awa:

‘Sudigenu umuthu uhe-uhe.’ Kolosai 3:10.

“Uvi gudibongesa guenu gukhadigo gudibongesa gua gumeso . . . , uvi gubonga guenu gukhale gubonga gua moshi.”—1 Phetelo 3:3, 4.

Yadiago, ishigo mulonga wabola ha gukamba gukhala nu phala yabonga, uvi ndaga yabalega ndando idi umuthu waye wamoshi. Jiya egi mu masugu adi muza, makalegelo aye abonga mbaasuanguluisa athu ako ha gusuena hehi nu aye, uvi ishigo ngolo jia muila nga gubonga gua phala guajiya gunana athu hehi nu aye! Muvuala mumoshi wa mukhetu mu jina dia Phylicia, wazuelele egi: “Gubonga guajiya gunana athu gudi aye, uvi jiya egi athu mbaagubuitshigo diago mutshima gula udi nu umuthu wamoshi nu khadilo diaye diabonga.”

Wana guvua gikenene mukunda nu luholo udi ba?

Wana gutangiza egi gudiwasa maji nu savo nga gutuna gudia ima iko idi luholo luabonga lua gulondega muila waye ba?

Itshi wajiya gubalumuna gu muila waye gula udi nu luholo lua guyikalagala? (Tomba ndaga wajiya gubalumuna.)

• GITALA

• GUKOMA

• SANGA

• LUHOLO LUA MUILA WAYE

• PHALA

• GILEMA GIA MUILA WAYE

Gila wahanyi mvutu egi ayi gu muhu wathomo nu wambadi, nga watombi mulonga umoshi gu muhu wa thatu, jiya egi: yajiya gukhala egi athu ashigo gugutadila muabola luholo udi guditadila hakhaye. Idi ndaga yaleba egi utangize muavula nu udisagese muavula mukunda nu luholo udi.—1 Samuele 16:7.