GITSHINYI 5
Mvula ya Vula
Mu hugo dia Nowa athu avula akhalele mutshita ndaga jia bola. Gisendeselo 6:5
Adama nu Eva abutshile ana, hene athu avudile holu dia mavu. Gualeha ndo, anjelo ako ahatele gutshianuga gua Satana.
Ajile hamavu nunji asudigile mila ya’athu hagu haya akhetu. Akhetu ene abutshile ana a luholo luko. Ana ene akhalele enya nkuta nunji enya ngolo.
Mavu agasue azalele nu athu akhalele mutshita ndaga jia bola. Bibiliya idi muzuela egi: “Athu abalegele gubola mu mafundo agasue, nu muho wakhalele mitshima yawo ya guzala pha nu matangi abola makumbi agasue.”
Nowa wavuile mbimbi ya Nzambi hene gatungile mushete. Gisendeselo 6:13, 14, 18, 19, 22
Nowa wakhalele muthu wa bonga. Yehowa walezele Nowa egi ngumutshigina gushiya athu abola mu mvula ya vula.
Nzambi wawambelele luko Nowa egi atunge masuwa a koma, atamegewe egi mushete, hangima anginyise fami yenji nu luholo luagasue lua shitu.
Nowa watemesele athu egi mvula ya vula mbaimunoga, uvi athu avuile gawo ndo. Athu avula alelele Nowa; ako amusegulugile.
Hahuile Mushete, Nowa wanginyishile shitu mukatshi.
