1-3. Mukut’etu agasue tudi mu bologo dia gima gitshi? Luholo lutshi Yehowa mbawutuzola mu bologo diene?

TANGIZA thomo gifua wanginyishiwa mu bologo uvi wakalegelego gubola. Ushigo nu luholo lua guzolewa. Ushiko luko nu gima gia gukalagala ndo, felela diagasue diahua. Uvi mu tangua diene, aguwambela egi gudi muthu mumoshi wajiya guguzola mu bologo diene, muthu muene wazuela egi mbawugukuatesa! Mbawudivua luholo lutshi?

² Mukut’etu agasue tudi mu bologo dia gufua. Tushiko nu luholo lua gudizola ndo. Uvi Yehowa wajiya gutuzola mu bologo diene dia gufua. Watuhanele laji egi: ‘Mbalagaji wa gisugishilo, gufua, mbawukatudiwa.’—1 Kolinto 15:26.

³ Tangiza luholo mbawudivua tangua woma wa gufua mbawuhua! Yehowa mbawusugisa gufua, mbawufuzumuna nji athu afile gale, hagula ajinge luko. Tangiza luholo ndaga yene mbayigusuanguluisa. Yehowa watendelele egi “athu afile gale” mbaazuga luko. (Yeshaya 26:19) Biblia yana gutamega ndaga yene egi Gufuzumuga.

4. (a) Gima gitshi giajiya gutukuatesa gula phangi’etu nga futa dietu wafua? (b) Akhuatshi akhadile mafuta a Yesu a mutshima?

⁴ Gila phangi’etu nga futa dietu wamutshima wafua, yana gutusagesa. Tuana guvua gikenene giavula. Gushiko nu gima tuajiya gukalagala ha guvutula luko  muthu muene mu lujingu. Uvi Biblia yana gutukuatesa muavula. (Tanga 2 Kolinto 1:3, 4.) Tutadile lumene lumoshi ludi gumonesa egi Yehowa nu Yesu adi nu nzala ya guzugisa aphangi’etu afile gale, hagula ajinge luko. Hakhadile Yesu ha mavu, wakhadile muya mutala Lazalo nu aphangi’enji a akhetu, Malata nu Madiya. Khungi’awo agasue akhadile mafuta a Yesu amutshima. Biblia yazuela egi: ‘Yesu wakhadile guzumba Malata nu phangi’enji wamukhetu nu Lazalo.’ Uvi, lusugu luko Lazalo wafile.—Yone 11:3-5.

5, 6. (a) Itshi Yesu wakalegele tangua wamonele aphangi’a Lazalo nu mafut’enji mudila? (b) Mukunda natshi gujiya luholo Yesu wadivile ha mulonga nu gufua, guana gutukuatesa?

⁵ Yesu wayile mutala Malata nu Madiya. Havile Malata egi Yesu yowu muza, wayile gumutagana gusuga ya dimbo. Wasuangulugile ha gumona Yesu, uvi wamuwambelele egi: ‘Nga ukhale hene, nga mun’etu gafilego.’ Malata watangijile gifua Yesu washiphile ha guza. Gungima dienji, Yesu wamonele phangi’a Lazalo Madiya mudila. Hamonele Yesu lamba dia Madiya, yahanele Yesu gikenene hene adidile. (Yone 11:21, 33, 35) Wavile gikenene giavula, luholo tuana guvua gila muthu tuana guzumba wafua.

⁶ Gujiya egi Yesu wavile luholo tuana gudivua gila muthu wafua, guana gutuhana gikhesa. Yesu wakhala gifua Sh’enji. (Yone 14:9) Yehowa udi nu ngolo jia gukatula gufua mayilago, gualeha ndo mbawuyikalagala.

7, 8. Mukunda natshi Malata watunyile egi akatulago seso gu ndumba ya Lazalo?

⁷ Hahetele Yesu gu ndumba guahagewe muila wa Lazalo, guakhadile nu seso diakoma gu mufulo. Yesu  wazuelele gamba: “Katudienu seso.” Uvi Malata atshiginyileko ndo. Handaga Lazalo wakalegele muene “masugu awana.” (Yone 11:39) Malata gajiyileko ndaga Yesu watshiginyile gukalegela phangi’enji.

⁸ Yesu wawambelele Lazalo egi: “Zoga!” Malata nu Madiya amonele mulonga wagushimana. ‘Muthu wakhalele wagufua wazogele wagulalewa milele gu mago nu gu malu.’ (Yone 11:43, 44) Lazalo wavutugile luko mu lujingu! Wamonele luko mafut’enji nu aphangi’enji. Amuyambele, amukuatele, azuelele luko n’enji. Yakhadile diago ndaga ya gushimana! Yesu wafuzumuishile Lazalo.

9, 10. (a) Nanyi wakhadile guhana Yesu ngolo jia gufuzumuna athu? (b) Mukunda natshi mene jia gufuzumuga jidi nu ndando yavula?

⁹ Yesu wakhadile mufuzumuna athu nu ngolo jienji ba? Ndo. Hagufuzumuna Lazalo, Yesu wakombelele Yehowa, hene amuhanele ngolo jia gufuzumuna Lazalo. (Tanga Yone 11:41, 42.) Ishigo phamba Lazalo wafuzumuishiwe ndo. Biblia yazuelela mona mumoshi wa mukhetu wa ivo 12 wakhadile mukata muavula. Sh’enji , Yayilo, gakhadilego luko nu felela, hene watogele Yesu egi asage mun’enji. Yayilo wakhadile nu mona phamba mumoshi. Hakhadile Yayilo muzuela nu Yesu, athu amoshi ajile gumuwambela egi: ‘Mun’aye wa mukhetu wafuigale! Usagesako luko Mulongeshi.’ Uvi Yesu wawambelele Yayilo egi: “Ukhadigo nu woma tshigina khuta gutshigina, mun’aye mboweluga.” Ayile nu Yayilo gu inzo yenji. Tangua ahetele hehi nu inzo yene, Yesu wavile nu wamonele athu mudila. Yesu waawambelele gamba:  “Mudidigo, muene gafuilego uvi udi mubanda tulo.” Yajiya gukhala egi sha mona nu gina mona akoteleseleko mbimbi jiene jia Yesu. Yesu watogele athu agasue azoge hanze, watombele phamba mvuaji jia mona muene, wanginyine najo monzo muakhadile mona. Yesu wakuatele mona muene gu koko wamutamega egi: “Mona zuga!” Tangiza luholo mvuaji jia mona muene jiasuangulugile, tangua jiamonele mun’awo wasendesa luko guwenda! Yesu wafuzumuishile mun’awo. (Mako 5:22-24, 35-42; Luka 8:49-56) Sendesa lusugu luene, tangua diagasue akhadile gumona mun’awo, akhadile guwunguluga luholo Yehowa waakuatesele mu njila ya Yesu. *

¹⁰ Athu agasue afuzumuishiwe gudi Yesu afuile luko gungima. Uvi mene jia gufuzumuga guawo jidi nu ndando yavula. Yehowa wakhala nu nzala ya gufuzumuna athu, mbawuyikalagala.

11. Mukanda wa Mulongeshi 9:5 udi gutuhana longo ditshi mukunda nu Lazalo?

¹¹ Biblia yana guzuela haphelo gamba “athu a gufua gashigo mujiya gima.” Yamonegele tangua Lazalo afuile. (Mulongeshi 9:5) Luholo Yesu wazuelele, yakhadile gifua Lazalo wabandele tulo. (Yone 11:11) Hakhadile Lazalo mu ndumba gakhadilego “mujiya gima.”

12. Mulonga utshi wana gutumonesa egi Lazalo wafuzumugile diago?

 ¹² Hafuzumuishile Yesu Lazalo, athu avula amonele. Mbalagaji jia Yesu, jiakhadile nji gujiya egi Yesu wakalegele mulonga wene wa gushimana. Lazalo wakhadile nu lujingu, yene yakhadile mumonesa egi wafuzumugile. (Yone 11:47) Athu avula akhadile muya mutala Lazalo, hakiene, asendesele gutshigina egi Yesu watumiwe gua Nzambi. Mbalagaji jia Yesu jiakhadileko gutshigina guvua ndaga yene, hene jiadivile ha gushiya Yesu nu Lazalo.—Yone 11:53; 12:9-11.

13. Mukunda natshi tuajiya gudifelela egi Yehowa mbawufuzumuna athu afile gale?

¹³ Yesu wazuelele gamba athu “agufua agasue adi mu ndumba” mbaafuzumuga. (Yone 5:28) Yakotelesa egi athu agasue adi mu matangi a Yehowa, mbaajinga luko. Uvi, hagufuzumuna muthu, Yehowa udi naye guwunguluga ndaga jiagasue jiatadila muthu muene. Yehowa wajiya lume guwunguluga ndaga jiene ba? Ujimbilago egi, themua jiakhala inunu yavula gosa. Uvi, Biblia yana guzuela egi Yehowa wajiya jina dia themue imoshi imoshi. (Tanga Yeshaya 40:26.) Luholo Yehowa ana guwunguluga majina a themua jiagasue, yamonesa lume egi wajiya guwunguluga nji ndaga jiagasue jiatadila athu mbaafuzumuga. Mulonga uko wandando udi egi, Yehowa muene wafugile ima yagasue, ndaga yene yamonesa sha egi udi nu ngolo jia gufuzumuna athu.

14, 15. Mbimbi jia Yobo jiajiya gutulongesa itshi mukunda nu gufuzumuga?

¹⁴ Yobo wakhadile gudifelela egi athu mbaafuzumuga. Wahudile egi: “Gula muthu wafua muene wajiya guzuga gu gufua ba?” Gungima, wawambelele Yehowa gamba: “Gula wangutamega hawatshigina  gungumona, ame, muthu iwafugile, mbangutaya.” Yobo wajiyile egi Yehowa mbawumuwunguluga tangua mbaafuzumuna athu.—Yobo 14:13-15.

¹⁵ Luholo lutshi wana gudivua mukunda nu felela dia gufuzumuga? Wajiya gudihula egi, ‘Aphangi’ami nu mafut’ami afile gale, nu ene mbaafuzumuga ba?’ Gujiya egi Yehowa mbawuzugisa lume athu agufua yana gutuhana gikhesa. Tutale ndaga Biblia yana guzuela mukunda nu athu ene mbaafuzumuga nu fundo mbaajinga.

16. Athu mbaafuzumuga mbaakhala nu lujingu lua luholo lutshi?

¹⁶ Athu afuzumugile ajingile luko fundo dingoshi nu anya fami jiawo nu mafut’awo. Ndaga yene mbayitagana luko masugu adi muza, mbayisuanguluisa muavula gubalega. Mukunda natshi? Handaga athu mbaafuzumuga ha mavu mbaakhala nu felela dia gujinga ivo nu ivo, uvi dia gufua ndo. Enji mbaajinga ha mavu agudisha diago nu mavu a masugu awa. Ita, gudishiya, nu misongo mbayikhadigo luko.

17. Akuatshi mbaafuzumuga?

¹⁷ Akuatshi mbaafuzumuga? Yesu wazuelele egi “agufua agasue adi mu ndumba mbavua dizui dienji, ene mbazuga.” (Yone 5:28, 29) Mukanda wa Yatuwuwe 20:13 watumonesa egi: “Meya akoma azolele athu agufua akhalele muene. Gufua nu fundo di’athu agufua yazolele agufua akhalele muene.” Inunu y’athu mbayijinga luko. Mupostolo Pholo wazuelele luko egi ‘athu abonga nu abola’ mbaafuzumuga. (Tanga Makalegelo 24:15.) Ndaga yene yakotelesa itshi?

18. ‘Athu atshi atshitshile ndaga jiabonga’ mbaafuzumuga?

 ¹⁸ Mukatshi dia ‘athu atshitshile ndaga jiabonga’ mudi akombeledi agutshigina a Yehowa ajingile gutuama dia guza gua Yesu ha mavu. Athu gifua, Nowa, Abalahama, Sala, Moise, Luta nu Ester mbaafuzumuga hagujinga hamavu. Wajiya gutanga mene jia athu ako mukatshi diawo mu mukanda wa Hebelu mukhapho wa 11. Itshi tuajiya guzuela mukunda nu akombeledi  a Yehowa agutshina a masugu etu adi mufua? Ene nji adi “Athu abonga,” mbaafuzumuga.

19. Athu ‘atshitshile ndaga jiabola’ adi akhuatshi? Yehowa mbawuhana athu ene luendu lua gukalagala itshi?

¹⁹ ‘Athu atshitshile ndaga jiabola’ adi athu afile gale uvi ahetelego luendu lua gujiya Yehowa. Athu ene adi nji mu matangi a Yehowa. Mbawuafuzumuna, hagula ahete tangua dia gumujiya nu dia gumukombelela.

20. Luholo lutshi tuajiya egi athu ako afile gale mbaashiko gufuzumuga?

²⁰ Ndaga yene yakotelesa egi athu agasue afile gale mbaafuzumuga ba? Ndo. Yesu wazuelele egi athu ako mbaashigo gufuzumuga. (Luka 12:5) Nanyi mbawuzula desizio dia gufuzumuna athu? Yehowa udi nzuji wa suga, uvi wahanele nji Yesu ufumu ha ‘gusophesa athu adi mujinga nu athu agufua.’ (Makalegelo 10:42) Muthu wagasue mbawumonewa egi udi muthu wabola, wajiyilego gubalumuna makalegelo enji, mbashigo gufuzumuga.—Tala longo 19 gu gisugishilo gia mukanda.

21, 22. (a) Gufuzumuga ha guya mu dilu guakotelesa itshi? (b) Nanyi wakhadile muthu wathomo wafuzumugile ha gujinga mu dilu?

²¹ Biblia yana gutuwambela luko egi athu ako mbaaya mujinga mu dilu. Tangua athu ako mbaafuzumuga mukunda nu guya gosa, mbaashiko mufuzumuga gifua athu nu mila ya umuthu. Uvi, mbaafuzumuga ha guya mu dilu gifua nyuma.

²² Yesu wakhadile muthu wathomo ha guheta lujingu lua luholo luene. (Yone 3:13) Masugu 3 gungima dia gufua guenji, Yehowa wamufuzumuishile. (Ngimbo 16:10; Makalegelo 13:34, 35) Yesu afuzumugilego nu muila wa musunyi. Mupostolo Pholo  wakotelesele egi Yesu ‘washiyiwe mu muila wa uthu uvi wavutuluishiwe mu lujingu gifua nyuma.’ (1 Phetelo 3:18) Yesu wavutugile mu lujingu nu muila wa nyuma wa ngolo jiavula! (1 Kolinto 15:3-6) Uvi Bibila yazuela egi gudi nu athu ako mbaazugishiwa nji luholo luene, ishigo phamba muene.

23, 24. “Thundu yazonda” yazuelele Yesu idi akuatshi? Athu ene adi guvula gutshi?

²³ Gutuama diagufua, Yesu wawambelele alandudi enji egi: ‘Ngudi muya ha gumilondela fundo.’ (Yone 14:2) Yakotelesa egi alandudi enji ako mbaafuzumuga ha gujinga mu dilu. Alandudi ene mbakhala guvula gutshi? Yesu wazuelele egi mbaakhala “thundu yazonda.” (Luka 12:32) Mupostolo Yone wahanele guvula gua athu ene tangua wamonele Yesu ‘mumagana [mu dilu] ha mulundu wa siona nu athu 144 000.’—Yatuwuwe 14:1.

²⁴ Tangua ditshi athu ene 144 000 akhadile naye gufuzumuga? Biblia yatuwambela egi akhadile naye gufuzumuga tangua Klisto mbaasendesa guhinyina mu dilu. (1 Kolinto 15:23) Tudi mujinga mu tangua diene, athu avula mukatshi di’athu ene 144 000 afuzumugile gale mukunda nu guya mu dilu. Anyi asala ha mavu mu masugu etu, gila afua ana gufuzumuga mbala imoshi ha guya mujinga mu dilu. Uvi mu masugu adi muza, athu avula gubalega mbaafuzumuga ha gujinga mu phaladiso ha mavu.

25. Ndaga jitshi mbatulonguga mu mukhapho walandula?

²⁵ Gualeha ndo, Yehowa mbawukula athu agasue mu uhiga wa gufua, enji gufua mbagukatudiwa mayilago! (Tanga Yeshaya 25:8.) Uvi athu ene mbaya mu dilu, mbaya mukalagala ndaga itshi guene? Biblia yakotelesa egi mbahinyina nu Yesu mu Ufumu wenji. Mbatulonguga ndaga jiavula jiatadila guvernema wene mu mukhapho walandula.